قصة رهيبة عن رهبة التناول من الأسرار المقدسة
مع نيافة الأنبا فام ربنا ينيح روحه
اللي مش مسيحي وارثوذكسي مايتناولش لازم ربنا يعني يوريكم العصايه علشان تخافوا
جه ميعاد التناول وكنت كشماس واقف وماسك شمعه وراء الأنبا فام بدير أبونا يسي .. وفجأه قالي:
" هات المايك يا إبني
جبت المايك بسرعه وسط رهبه شديده في الكنيسه بالدير ووسط الخشوع دا بصوت هادئ نادي الأنبا فام للشعب وقالهم إسمعوني وركزوا معايا كويس في اللي هاقوله دا
- اللي مش مسيحي مايتقدمش للتناول
- اللي مش متعمد ارثوذكسي وبيصلي في كنيسه غير ارثوذكسيه مايتقدمش للتناول
- البروتستانت بجميع طوائفهم مايتقدموش للتناول
- الغير معترف واللي مالوش أب إعتراف مايتقدمش للتناول
- اللي مخاصم حد أو لو أذيت حد ماتتقدمش للتناول
وقال أنا برئ من أي واحد هايتقدم للتناول ويكون مخالف للتنبيهات دي .. وكل واحد هايتناول علي حساب نفسه وبس
وبدأ الأنبا فام يناول الشعب وأنا في الجوار ممسكآ بالصليب والشمعه تتوسطهم لفافه صغيره
بدأت الشمامسه مردات التوزيع سبحوا الله في جميع قديسيه ، والشعب في خشوع تام بيصلي معاهم
وفجأه طابور التناول وقف وسط الكنيسه .. واحد من قدام متسمر خالص مش بيتحرك ومعطل كل اللي وراه
افتكروه مش واخد باله ان الناس فضيت قدامه من الطابور ( سرحان ) .. وقالوله يا إستاذ إتحرك مافيش حد قدامك
ولكنه مش متحرك ومتسمر كتمثال بوقفه غريبه شويه في وضع السير ..
واحد نادي الحق يا سيدنا
انتبهنا كلنا والسكوت حل في الكنيسه والشمامسه من الإستغراب من الموقف وقفوا الالحان
وفجأه سيدنا الأنبا فام شخط فيه وقال /
يا إبني انت .. مش أنا قولت الغير مسيحيين بلاش يتقدموا للتناول .. عاجبك الوضع اللي انت فيه دا وانت بقيت زي العمود ؟
وبص سيدنا للشعب كله وقال هاعيد التنبيهات من تاني وعادها بالنص كلها ...
وقال للشعب اللي هايخالف التعليمات دي مش بس هايحصله زي ما حصل للأخ دا .. دا ممكن يموت خالص
وفجأه لاقينا ناس كتير خرجت من صفوف المتناولين وبسرعه ابتعدوا
راح سيدنا ابتسم وقال / لازم ربنا يعني يوريكم العصايه علشان تخافوا .. ماكنتوش مصدقيني غير لما شفتوا عقاب الاستهتار بعظمة التناول ؟
اتعظوا وفوقوا كفايه
سيدنا طلب مياه من المذبح ورشها علي الشخص المتسمر دا وقاله ماتعملش كدا تاني .. وجسم الراجل اتحرك من جديد وقعد يعيط وسيدنا طبطب عليه وقاله ماتعيطش
ووسط اندهاش الجميع .. سيدنا شاور للشمامسه يكملوا مردات التوزيع من جديد وسيدنا رجع يكمل التناول حتي انتهاء القداس وسط جو روحاني وتمجيد لإسم الله وإكرامآ لقديسيه
وكثير من المعجزات كانت تتم علي يد رجل الصلاه والتعمير نيافة الأنبا فام بدير ابونا يسي بكوم غريب بطما سوهاج
نياحآ وراحة لك يا أبانا وسيدنا الأنبا فام .. اذكرنا أمام عرش النعمه
نقلا عن ابونا موسي بشارة
