لسانه متبري منه

[walaa farouk]

يعني حتي لسانه هو نفسه مش راضي عنه ..
لسانه مركب فيه عقربة ، تلسع اي حد ..

و لانه "حريف أذي" ، يرمي له بالعافية كام كلمة "حلوة" من وقت للتاني علشان يسيب خيط رفيع بينه و بين الناس ، يمشي بيهم "مصالحه" !!
يعني يخبي سمه شوية ، بس اللدغة و اللدعة و اللسعة جاية جاية !!

ابو لسان ده ، شخصية سودا قوي ، بيسيطر علي الناس بلسع لسانه ..

و لا بيراعي حد و لا بيشتري خاطر حد ، مشاعر خشب، و قلب صفيح ..

و يا ويل اللي حواليه لو مسك اي منصب او سلطة ، ح يورينا الويل..

عايش جوه فكرة واحدة انه "صح " .. و بيلم حواليه نوعين من الناس : اللي بيتقوا شر لسانه وبيمشوا مصالحهم معاه لغاية ما يحل عنهم ، او اللي ح يقنعوه انهم "مُخلصين" ، لغاية ما يسيطروا علي عقله و يعملوا من خلال عجرفته كل اللي هم عاوزينه !!

اما العاقلين يشتروا سلامهم بالبعد !!

و حكاية ان لسانه مبرد و قلبه طيب دى ما بقتش تخيل علي حد !!

ابو لسان ده عادة بيقع في شر اعماله ، و حاجة من اتنين : يا بييجي له اللي "اشتم" منه فيطلع عليه عمله السواد اللي عمله ، او بيلاقي نفسه ان عاجلا او اجلا لوحده بعد ما الكل يسيبه، و ساعتها ما بيلاقيش غير مرايته علشان يشتم فيها نفسه !!