واحد يرجمك وواحد يرحمك

[walaa farouk]

فيه واحد يرحمك حتي و انت غلطان و يدافع عنك و انت واقع ،
زي السيد المسيح لما دافع عن المرأة الخاطئة الممسوكة
في ذات الفعل !!

فيه واحد يرجمك و انت مظلوم ، مش بيقتلك و بس ، بيعذبك.قبل ما يعمل عملته و بيشوف قدامه ضحيته و هي بتتلوي من الألم و الوجع و دمها بينزف قدامه ساعات قبل ما يسلم روحه ..

يشتم و يفضح و يعري و انت ما لكش اي ذنب ، و بيعمل كده و ضميره مساعده !!

مصدق انه كده بياخد حقه ، او حق الناس .. متعته في الانتقام و تعذيب الناس بسيف لسانه و خنجر كلامه ..

ما يعرفش يستر و لا يداري علي حد ، لكن او ما حد يحيب سيؤة اخطاؤه هو يبهدله و يمسح بيه الارض !!

عارف ان شتيمة أو إهانة أو فضيحة من غير اي دليل ممكن تخللي حد ينكسر و يتبهدل نفسيا ، و هو مش عارف او مش قادر يرد أو يدافع عن نفسه ، و هو لاقي سمعته اتداس عليها من إنسان لا يعرف معني الحب و الرحمة ..

ياللي بتعذب في غيرك و تاكل لحمهم و هم احياء ، و ياللي بترجم غيرك باحجار غلك و غيظك و كذبك خد بالك :

لكل ظالم ، ظالم جاي له ..

و لكل مظلوم رب بيدافع عنه و يجبر خاطره ، و يداوي جرحه و يرد له حقه المسلوب و يرمم سيرته المجروحة و سمعته المكسورة و يبني له حياته اللي غيره هدمهاله ..