لا يا ابني ما تسافر بدنا نسقي الأرزة! بكفّي وجع يا مار شربل!

[Mary Naeem]

لا يا ابني ما تسافر بدنا نسقي الأرزة! بكفّي وجع يا مار شربل!

بالدم سقيوا الشهداء أرز الوطن! تكسّرنا من جوا يا طبيب السما!

قلمي مغمّس بحبر الدم ودموع الوجع أنا وعم بكتبلك يا طبيب السما… الوجع اللي ما بتقدر الكلمات تحتويه بعد خسارة الغاليين والجروحات المطبوعة فينا اللي إلها أوّل وما إلها آخر…
باسم كل أمّ خسرت قطعة من سما قلبها، بصرخ للسما: تعبنا!
باسم آلاف الجرحى المنكسرين قدام جروحاتن، تعبنا!
باسم اللي انفقدوا أحبابن ولقيوهن بعد أيّام فاقدين الحياة، تعبنا!
باسم اللي خسروا بيوتن وتشرّدوا ع الطرقات، تعبنا!
نعم، تعبنا من درب الجلجلة الطويل اللي ما عم يخلص!
تعبنا من هالدرب المليان بالأشواك، الطريق المزروع بمسامير الحروب وريحة الموت!
تكسّرنا من جوا!
الوجع أكل خلايانا وشو صعب نترمّم!
مين إلنا غير الله يرمّم اللي تكسّر ويرجّع بهاء الصورة القديمة اللي جرّحها الدم!
جروحاتنا ما رح يقدر يشفيها طبيب ع الأرض! هلقد الوجع كبير!
جينا لعندك، يا طبيب السما مار شربل، نطلب شفاعتك لترجع بيروت تقوم من تحت الردم! إنت قادر تساعدنا نرجع نرمّم حالنا، ونوقف من جديد، ونحمل الصليب لنكفّي مشوار الجلجلة!
شو تقيل هالصليب ع أكتاف لبنان! شو معتم هالنفق اللي فتنا فيه! شو بشعة ريحة الموت!
ازرع فينا يا مار شربل الأمل أنو بآخر هالجلجلة رح يضوّي صليب المجد المكلّل بالانتصارات، ويذكّرنا إنو ناطرنا فجر القيامة المجيدة!

[بنت معلم الاجيال]

شكرا علي المعجزة

[Mary Naeem]

شكرا على المرور