مسلسل مريم الحلقة (2)العجوزان

[walaa farouk]

جة ميعاد الحلقة التانية
من مسلسل مريم
اليهود كان عندهم بعض التقاليد الغريبة
خصوصاً فى ولادة الاطفال
كانت الست اللى مش بتخلف تبقى نحس
وعار و يتبصلها بصات حقيرة لانهم
بيفسروا كدا بان الرب غاضب عليها
والمسيا مش ها يجي من نسلها
و ياسلام على الافراح وعلى الهدايا لو المولد ولد
لكن لو بنت بيكون زى العذاء بالظبط
دا حتى فى موقف طريف كان مشهور عند اليهود
فى العصر دا بتقول ان كان فى راجل من الرابين اللى هما
معلمين الشريعة اليهودية خلف بنت
فحضر اصدقاءة علشان يباركوا على المولود
ولما اكتشفوا انها بنت واحد من الاصدقاء
حب يهون علية فقاله
انت زعلان لية ياراجل دى البنت نصف العالم
ولا يكتمل العالم بدون النساء
الراجل نفسيتة بدائت ترتاح شوية
لكن جة صديق تانى غلس وقالة معاك حق
العالم علشان يكمل لازم يكون فى خير وشر
الخير فى الذكور والشر فى النساء 😏
رخم صح ؟ 😀
.
ومن شدة الحزن على خلفة البنت
بيكون فى واحدة ست كدا ديما موجودة فى كل حتة
بتحب تعكنن بزيادة فى الظروف اللى زى دي واكيد الست دى موجودة فى حياتنا احنا كمان طبعا 😃
وياعينى تشوف الاب حزين ومتنكد على خلفة البنت تقوم تيجى جنب ودنة وتقول مقولة كانت مشهورة اوى فى الوقت دا متاخدة من سفر ابن سيراخ وساعات كانت بتغنيها كمان المقولة بتقول
ان البنت هى كنز عديم القيمة لوالدها
فمن قلقه عليها لا ينام ليلا
وفى خلال سنين حياتها الاولى يمكن ان تغوى
وفى سن شبابها يمكن ان تضل
وفى سن زواجها يمكن ان لا تجد شريك الحياة
ومتى تزوجت يمكن ان تكون بلا اولاد
يعنى كانوا بينكدوا على الراجل اللى يخلف اخر نكد
.
ومن بعض المواقف اللى تدل على شدة تميزهم
بين الولد والبنت
ان كان فى نبات مشهور اسمة السذاب
على حسب تقاليدهم ان النبات دا بيحمى الطفل من الحسد
فكانوا البعض بيدهنوا بية راس الولد بس
يعنى كانوا قساة جدا فى ولادة البنات
.
ابطال حلقة انهاردة زوجان عجوزان هما حنة ويواقيم
وكانوا فعلا قديسين ورغم كدا ماخلفوش
لحد ماوصلوا لسن الشيخوخة
لكن الغريب انهم مافقدوش الامل وفضلوا مكملين صلاتهم
ويستحملوا نظرات العار من كل الاقارب
وبرضة بيقدموا صلاة علشان ربنا يرزقهم
والتقليد الكنسي بيحكلنا عن موقف حصل مع يواقيم
انة قضى اربعين يوما فى خلوة بالبرية صوم وصلاة لربنا
وهو بيقدم تقدمة الشكر ظهر تاج كبير فى السماء
والكل شافة فتأكد بهذة الرؤيا ان تقدمتة قبلت امام الله
وفى نفس الوقت حصل قصة تانية مع حنة
اتقالت فى ميمر القديس يعقوب اسقف اورشليم
هو الصراحة موقف مؤلم شوية
حنه كانت قاعده فى حديقة سرحانة فى حالها
و لفت نظرها ان فى عش عصافير على الشجر
وشافت العصافير الكبيرة بتجيب اكل لولادها الصغار
المنظر دا حرك جواها الامومة اللى هى محرومة منها
وصعبت عليها نفسها اوى وفضلت تبكى بحرارة
لحد ماملاك الرب ظهرلها وبشرها بالخبر السعيد
ولما يواقيم رجع من على الجبل علشان يقول لحنه على الرؤيا هى صدقت لان الملاك ظهرلها فى الحديقة وبشرها بميلاد طفلة هاتكون مباركة فى كل الاجيال
وفعلا حبلت حنة وربنا رزقهم و رزقنا معاهم بمريم الجميلة
ويواقيم ماهتمش انة خلف بنت رغم كل اللى قولناه عن
عادات اليهود فى خلفة البنات لكنة فرح بيها جدا واعتبرها
اعظم هدية من السماء
وكان يواقيم وحنة عندهم نذر انهم هايقدموا
اول مولود للهيكل ودا اللى حصل فعلا
ولما مريم تمت ٣ سنين راحت الهيكل
و ربنا رزق يواقيم وحنة بطفلة تانية وسموها مريم برضة
وقالوا ان مريم الاولى ملك الرب ومريم التانية ملكنا
ومريم التانية دى كبرت وبقت مريم زوجة كلوبا
اللى خلفت بعد كدا يعقوب ويهوذا وسمعان ويوسي
ودول على فكرة اللى ذكر فى انجيل يوحنا انهم اخوة
المسيح وفى ناس بتمسك فى كلمة اخوة المسيح
وتقول ان العذراء مريم خلفت تانى
طبعا الكلام دا غلط
لكن دول يبقوا ولاد خالة المسيح بحسب الجسد
وفى عادات اليهود ان ولاد الخالة او ولاد العم
بيعتبروهم اخوة
وبكدا خلصت حلقتنا انهاردة
مستنيكم بكرة فى حلقة مهمة
وهانقضي اليوم كلة مع مريم جوة الهيكل
وهانشوف كانت بتعمل اية وبتشتغل اية
واية اكتر حرفة كانت مشهورة بيها جوة الهيكل
..
اة صحيح كنت هانسي حاجة مهمة كنت عاوزة اقولكم
ان يواقيم والد العذراء يبقى عم يوسف النجار
وحنة أم العذراء تبقى خالة اليصابات وسالومى
يعنى يوسف النجار يبقى ابن عم مريم العذراء
واليصابات وسالومى ولاد خاله مريم العذراء
وهانتكلم عن الشخصيات دى فى الحلقات القادمة
..
وبمناسبة حلقة انهاردة نصلى كلنا ونطلب من ام النور
ان ربنا يرزق كل زوج وزوجة لسة مافرحوش ويفرحهم
زى فرحة حنة ويواقيم 🙏🙏
..
يلا اشوفكم بكرة على خير 👋
..