انا هو لا تخافوا

[walaa farouk]

انا هو لا تخافوا
تفرق قوي كلمة "لا تخافوا" اللي جت في كلمة الله ٣٥ مرة ،
و بين كلمة "انا هو لا تخافوا " اللي جت ٣ مرات بس (مرقس ٦ ، يوحنا ٦ ، و متي ١٤) ..

لا تخافوا أمر الهي جت كتير و السيد المسيح بيتكلم في عظات و توجيهات
، يعني "نصيحة مطمئنة" ..

اما انا هو لا تخافوا دي قالها و هو جاي لتلاميذه وسط العاصفة ،
ماشي علي البحر ، حاطط الموج تحت رجليه ..

دي مش وعظة ، ده "حضور الهي" ، تجلي نوراني وسط المشكلة ..

هنا مش بس بيدي نصيحة، ده جاي بنفسه يقولك ما تخافش لاني انا هنا ،
و مشاكلك محلولة ، بس حطها تحت رجليك زيي، و انت جنبي ..

لما تلاقي الكلام بس مش مأثر فيك ، كده انت محتاج ربنا بنفسه ، بشخصه ..
نادي عليه ، قله عاوزك تزورني في مخدعي، في صلاتي ، في قلبي ..
عاوزك مش بس تكلمني، تحضر بنفسك، و تمسك ايدي و توريني مجدك ..
عاوزك ما تسيبنيش وسط البحر الهايج متعذب، تيجي و انت ماشي عليه و دايس علي أمواجه..
مش مهم الموجة تهدي ، المهم انت تبقي موجود معايا
، قدامي و البحر تحت رجليك ..

كده ح اشوفك بنفسك مش مجرد كلمات توصلني منك ،
كده الموج و الريح ما يفرقوش معايا طول ما جلال حضورك هنا ..
كده ح اطمن أن ابويا معايا و قدامي..

انا عارف ان البحر ح يتكسف منك فورا ما انت اللي خلقته،
وح يلم ريحه و أمواجه و يجري هربان من مجدك ..