على فكرة انتي كدة بتخربي على نفسك

[روشا الفرفوشه]

- على فكرة انتي كدة بتخربي على نفسك

- ليه يا سبعي كدة بس؟

- لازم تسيبك من المواعين اللي بتغسليها دي وتخللي بالك عليا شويا لان الوضع العام بقى مختلف

- مختلف؟ ليه يا حبيبي؟ طلعلك راس تانية وانا مش واخدة بالي؟

- اهو شوفتي؟ كلامك ده اللي هيخليني اعند بقى وانتي حرة

- لا والنبي تعند كدة بس فهمني ناوي على ايه يا ارشدوق الحرانية

- اتريقي براحتك وخليكي كدة اما تفوقي وانا مع واحدة تانية

- معتقدش فيه مطسوسة في نواضرها غيري يا دون چوان كرداسة

- لا فيه... وفيه كتير... وانتي لو مهتمة بالسياسة كنتي اخدتي بالك ان كل حتة حوالينا مولعة والبلد هتتملي ستات زي الفل وهنغسل عينينا بقى من المناظر الجارحة اللي عايشين فيها دي

- انت هتقولي... ده انا في ديك الساعة اما اشوفك كدة مع واحدة تانية... هي اكيد هتبقى بنت حلال وتستاهل وانا هدعيلها انها زاحت الهم من عليا

- على فكرة سوريا مولعة

- طبعا وانت اسم النبي حارسك وصاينك لسانك بينقط مية طرشي... فا السورية اكيد هيعجبها غزلك وكلامك الحلو... انت اخر مرة قولتلي فيها كلمة حلوة يوم ما اتعرفنا على بعض من سبع سنين.. غير كدة طرنش مفتوح للأكل والزعيق بس يا روحي

- مش مهم سوريا... عندك العراق كمان مولعة... ومفيش احلى من جميلات العراق..

- طبعا طبعا... جميلات العراق.. والليل بديع جدا... وانت ارثر قلب الاسد ملك الانجليز اللي بتساعد في البيت ومتعاون... انت اصلك نسيت لما تهت في الشقة ومعرفتش مكان الحمام ودخلت عملتها في اوضة العيال... انت نسيت مكان الدولاب من كتر ما بترمي هدومك على الجزامة يا حبيبي

- يووووه... عادي... مش لازم العراق... اهي لبنان مولعة وربنا هينجدني

- يا ضنايا انت بتجيب لنا الجبنة المثلثات بالواحدة!! انت اخر مرة جبت فيها برتقانة لما طلعت قطفتها من الشجرة اللي في الجنينة بتاعة عم سرياؤوسي وهو مسافر، ده انت جيبك انضف من بورسلين فندق شتايجن برجر.. انت مش مكسوف من نفسك؟ ده انا امي اللي بتدفع وصولات الكهربا

- شوفتي؟ هي التفاهات دي اللي هتخرب عليكي... انا لازم اشوف واحدة تفهمني وتفهم دماغي ونتلاقى فكريا

- تفهمك؟؟ طب الحمدلله مش تقول من الاول... كدة ضمنا ان الحاجة الوحيدة اللي هتتلاقى معاك فكريا هتبقى بأربع رجلين وبديل وأول حرف من اسمها جاموسة... دور يا حبيبي... دور بس حل عن سمايا خليني اكمل غسيل مواعين

[Mary Naeem]

هههههههههههههههههههههه