الشات في العلاقات"

[روشا الفرفوشه]

"الشات في العلاقات"

من أسوأ الوسايل اللي ممكن تزيف علاقاتك وتصنع سوء تفاهم كبير في علاقاتك .. هو الشات
للاسباب التالية :

• انت بتكون مش شايف الشخص اللي قدامك .. فتلقائيا بترسم صورة عنه في ذهنك في الغالب الصورة دي مزيفة مش حقيقية .

• الايموشنس مع الكلام بيعمل حالة غير واقعية بتحسس الشخص انه مبسوط جدا لدرجة تخليه ممكن يميل للشات اكتر من الكلام وجها لوجه .

• الشات بتكون فيه جرئ واكثر تعبيرا وادمانك ليه ممكن يفقدك كل مهارات التواصل في الواقع .

• مش بتقدر تسمع نبرة الصوت ولا تشوف تعبيرات الوجه ولا ال body language .

• بالتالي الكلمة بيكون ليها 50 احتمال .. تقدر تفسرها هزار وتقدر تفسرها سخرية او بجد او تلقيح او عتاب (وبالتالي بينشأ كتير من الخلافات)

غير الصورة المزيفة اللي الشخص بيرسمها عن الاخر حسب خياله .. لانه ميعرفهوش معرفة حقيقية ودي اخطر ما في الموضوع .

نستنج من ده :
• خلي الشات في حجمه الحقيقي .. حوار fun .. كلام خفيف .. اجابة علي سؤال .. بتنكش حد .. بتبعد معاد او توضيح او استفسار .

غير كدة في صداقاتكم وتواصلكم او تعارفكم :
قابلوا بعض واتكلموا فيس تو فيس .. اعرفوا بعض علي الحقيقة شوفوا ريأكشنات وردود افعال بعض .. طوروا من مهارات بعض .. استمتعوا بالصورة الحقيقية والتقييم الحقيقي لبعض .. وفي اضيق الحدود لو ده محصلش يكون المحادثة تليفون علي الاقل يكون الصوت نبرته واضحة والتعبير ادق من الكتابة .

لكن بلاش مناقشات لموضوعات مهمة وخلافات او ما شبه .. وبلاش تحرقوا قصصكم المشوقة علي الشات .. وتيجوا في الواقع متلاقوش كلام تقولوه لان كله اتحكي كتابة وكأنكم بتقروا كتاب مش بتتواصلوا مع بعض .

الشات عظيم ومبهج لو استخدمتوه صح ..
ومؤذي وخادع جدا لو حطيتوه في مكان مش مكانه وحجم مش حجمه

[walaa farouk]

مشاركه جميله
ربنا يبارك خدمتك

[Mary Naeem]

الشات عظيم ومبهج لو استخدمتوه صح ..
ومؤذي وخادع جدا لو حطيتوه في مكان مش مكانه وحجم مش حجمه

صح يا قمر
ربنا يباركك حببتي

[روشا الفرفوشه]

ميرسى على تواجدكم الجميل