في الآخر اختيارك.. تبقي من الرخام ولا من الزجاج.

[مورا مرمر]

من فترة مش طويلة كان مستحيل أعمل أكلة أنا بس في البيت اللي بحبها، أصل هقف وأتعب وفي الآخر أنا بس اللي هاكلها..

لحد مافي يوم بنتي ماكانتش خلصت أكلها وجابتلي الطبق قالتلي:
خدي كمليه مش قادرة أخلصه.
بقولها: بس انتي اللي قلتي عايزاه!
قالتلي: آه، كنت فاكره هخلصه، بس مقدرتش، وعاملة حسابي إنك هتاكلي ال الليفت أوڤر( البواقي يعني)
بسألها: طب انتي متديش البواقي لبابا ليه؟
لقيتها بتقولي: عشان الليفت أوڤر للأم بس

الصراحة كلامها ضايقني و خبط في موقف كان حصل مع صديقة ليا، راجعة بولادها من النادي وركنت قدام السوبر ماركت وقالتلهم:
انزلو هاتولنا كلنا أيس كريم
نزلو ورجعو جايبين ليهم كلهم وبيدوها الفلوس الباقية، بتسألهم: طب فين بتاعي؟
راحت بنتها سألتها: هو انتي عايزة انتي كمان؟
قالتلها: اه انزلي اشتريلي.

وقتها كان الايس كريم ب ١٠ جنيه البنت نزلت ورجعت جايبالها علبة صغيرة مششبه الأيس كريم بتاعهم ف صديقتي بتسأل: هو ده بكام؟
البنت قالتلها: بتاعك ب ٣ جنيه.
صديقتي: طب ليه ماجبتوليش زيكو؟
قالتلها: معرفش انك عايزة زينا، انتي علي طول بتنقي لنفسك أصغر حاجة.

الموقفين خلوني أقف أفكر؛ ليه احنا الستات في مجتمعنا بنستخسر في نفسنا! ليه دايمًا حاطين نفسنا في المرتبة العاشرة بعد العيال والبيت والزوج!

المشكلة ان انا فاكرين ان ده واجبنا ومفروض علينا، وإلا يتقال علينا أنانيين وكخة...مع ان بالعكس انا لما بطلت اكل بواقي العيال وعلمتهم ان بواقي الأكل بتروح للعصافير مش لماما، وبقيت انا كمان اجيب لنفسي لبس العيد زيي زيهم، لما مش بشيل كوباية شربو فيها ورموها واستناهم هما يشيلوها.. ولادي بقو يقدروني ويدلعوني ويحترموني أكتر، لما بقيت بعد ما أعمل أكل وأوصل تمارين وأعمل هوم وورك، اقول عندي وقت خاص بيا بقي بقعد أقرا فيه، بقي ال me time بتاعي خط أحمر.

ليه عاوزين نبقي أمينة رزق في نفسنا، حد فاكر ضحكة أمينة رزق؟ طب حد شافها مرة مبسوطة ومش شايلة الهم؟

الست اللي مابتحبش نفسها ومتقطعة عشان اللي حواليها اكتر ست عصبية وبتزعق وبتضرب في عيالها، اكتر ست بتقدم موديل سيء لولادها عن تقدير الذات.

لكن الست اللي بتحب نفسها وبتدلعها بتعرف تدلع اللي حواليها، بتكلم عن تقدير النفس؛ نفسي في أكلة أنا اللي هقف وأطبخها، محتاجة شوز بدل اللي اتهري مقولش بس الستاير أولي لازم تتغير.

مش بتكلم طبعًا عن الست اللي بتقضي ساعات ع الفيس بوك وفي الكوافير يوميًا ورامية العيال للشغالة تربيهم لأن ده مش تقدير ذات ده تخلي عن المسؤلية.
كلامي للست اللي لو افتكرت نفسها بهدية تحس بالذنب وتقول هما أولي.

في قصة كانت بتحكي عن اسرة عندهم رخامة حاطينها فوق ترابيزة الليڤينج بياكلو عليها ويحطو كوبايات الشاي السخن عليها، واللي يمدد رجله فوق الرخامة، واللي مش لاقي مكان ع الكنب فيقعد عليها، فضلت سنين الرخامة شايلة لحد ما في يوم اتكسرت، وقتها معرفوش يلاقو زيها، واشترو بدالها لوح زجاج؛ بس من يومها محدش بيحط سخن عليها ولا حد يجروء يقعد عليها ولا حتي يمد رجله وبتتلمع كل يوم عشان آثار الايدين بتبان فيها.

في الآخر اختيارك.. تبقي من الرخام ولا من الزجاج.
اختيارك تحطي نفسك في آخر القايمة ولا تبقي أغلي وأولي وكمان أولًا.

[walaa farouk]

ميرس على مشاركتك الجميلة
ربنا يبارك تعبك

[Mary Naeem]

الآخر اختيارك.. تبقي من الرخام ولا من الزجاج.
اختيارك تحطي نفسك في آخر القايمة ولا تبقي أغلي وأولي وكمان أولًا.

مشاركة جميلة جدا
ربنا يبارك حياتك