ويقود المرضعات

[مورا مرمر]

قعدت في البلكونة شوية قلت اتفرج على جيراننا اللي بيبنوا سقف بيتهم ... بما اني بقيت خبرة خلاص في البنا وبقيت عارفة الخطوات 😃😃 .. وفي نفس الوقت شايلة هم المبنى بتاعنا هيخلص امتى ..
لقيت الراعي ( بطل خيالي وصاحبي 😃 ) معدي .. ومعاه غنماته ..
المنظر المرة دي مشدنيش قوي .. لان لقيت عادي خرافه قدامه وهو وراهم ...عينيه عليهم
وبعد ما حود الشارع .. لقيته بيبطئ خطواته وفي نفس الوقت عينيه علي خرافه اللي قدامه .. وكل شوية يبص ورا .. مفهمتش ليه ؟؟
وفجأة لقيت غنمة جاية وراه بعيدة عنه مسافة طويلة وماشية مع الحمل ابنها ..
اول ما حود الراعي الشارع وحست انه بعيد عنها .. فضلت تحاول تجري وهي بتهز ودانها علشان تحصله ..ومتتوهش عنه ... حسيته فعلا ده مجهود عليها لأنها سمينة و حركتها على قدها ..
والراعي لما لاقاها بتجري وقف و استناها ... وفضل يشاورلها بالعصاية وكأنه بيطمنها انه موجود وواخد باله منها مش ناسيها
وقفت كتير عند المنظر ده ..
رنت في وداني كلمة " ويقود المرضعات "
وافتكرت وقتها الاية كلها :
" كَرَاعٍ يَرْعَى قَطِيعَهُ. بِذِرَاعِهِ يَجْمَعُ الْحُمْلاَنَ، وَفِي حِضْنِهِ يَحْمِلُهَا، وَيَقُودُ الْمُرْضِعَاتِ» ( اش 40 )
قعدت اردد كلمة : " ويقود المرضعات .. ويقود المرضعات "
اشمعنا يعنى يارب المرضعات بس اللي ميزتهم في الآية ..
لما بصيت علي الغنمة دي لقيتها فعلا مميزة عن باقي الغنمات لأن حركتها بطيئة عنهم بسبب انها سمينة ..
هتقولوا واحنا مالنا 😃.. خلينا في الهم اللي احنا فيه .. انت رايق و فاضي وبتبص على خرفان ..
لا يا حبايب .. الموضوع ده يهمنا .. خصوصا انتم يا مهمومين ..
اللي شايلين الهم دول هما المرضعات .. الخرفان اللي بسبب همومهم اللي شايلنها حركتهم بطيئة ..
لان المشاكل معطلاهم انهم يمشوا قدام مع باقي الخرفان ..
بس متنسوش ان حتى ولو حركتكم بطيئة بسبب حمولتكم .. الراعي كان كل شوية يبص وراه و كأن الغنمات كلها كوم .. والغنمة دي كوم تاني .. يعني انت موضع اهتمام الراعي وحبه ..
عينيه عليكي .. و بيشاورلك بعصايته ( الصليب ) وبيقولك يلا .. شدي حيلك واركضي علي اثار الغنم ...
ولو حركتك تقيلة بسبب همومك .. ارمي همومك دي عند العصاية ( الصليب ) .. واجري في طريق جهادك وافرحي مع باقية الغنمات ..
اوعي تفكري اني لما حودت الشارع اني نسيتك وسبقت مع الغنمات اللي بتعرف تمشي بسرعة ..
لا يا حبيبتي ..
انا عينيا عليكي .. وقلبي مشغول بيكي .. وكل شوية هشاورلك بصليبي علشان تتشجعي وتجري وتحصلي اخواتك ...
" مُلْقِينَ كُلَّ هَمِّكُمْ عَلَيْهِ، لأَنَّهُ هُوَ يَعْتَنِي بِكُمْ." ( 1 بط 5 : 7 )

[walaa farouk]

انا عينيا عليكي .. وقلبي مشغول بيكي .. وكل شوية هشاورلك بصليبي علشان تتشجعي وتجري وتحصلي اخواتك ...
" مُلْقِينَ كُلَّ هَمِّكُمْ عَلَيْهِ، لأَنَّهُ هُوَ يَعْتَنِي بِكُمْ." ( 1 بط 5 : 7 )

ميرسي على مشاركتك الجميلة

[Mary Naeem]

اوعي تفكري اني لما حودت الشارع اني نسيتك وسبقت مع الغنمات اللي بتعرف تمشي بسرعة ..
لا يا حبيبتي ..
انا عينيا عليكي

رووووووووووعة حببتي
ربنا يفرح قلبك