الحضن دفا .... الحضن حياة

walaa farouk · رقم المشاركة : ( 1 ) 22 - 01 - 2018, 10:56 PM

عارف يعني ايه حضن !!!
الحضن هو الشئ الجسدي الوحيد بين البشر اللي بيلمس روعة الروح
انك تسيب نفسك وكل اللي بيوجعك بين ذراعي اللي بتحبهم
انك تسيب نفسك وكل اللي بيوجعك له
ويتوقف الزمن هناك للحظات ولو بسيطة بس تحس انها عمر تاني
الحضن ...
يعني دفا .. يعني صدق .. يعني احتواء .. يعني كيميا مختلفة
الحضن ده اصدق فعل ممكن يوصل كل المشاعر
ويقولك اللي قصادك ده بيحبك بجد والا بيمثل
الحضن ده بيعرف الناس انت ايه بيوصف تفاصيلك في لحظة
بيرسم مشاعرك جوة اللي بتحضنه بيجسدها
بيقول انت ايه انت بجد والا بلاستيك
صافي بجد ... بريء بجد ... طيب بجد .. حنون بجد .. صادق بجد !!
ساعات كتير تحضن حد وتبقى عارف انه بيكرهك بس حبك وصدقك
بيكسر كرهه ويحسسه بحجمه ويعرفه قد ايه انت صادق
ومش هامك كرهه عشان حضنك اعمق من كل مشاعر الكره اللي اتوجدت في الحياة عشان صدق مشاعرك وعمقها حسسته بضعفه
فتلاقيه اترمي جواك وجوة حلاوة حضنك وعرف قد ايه هو مضيع كتير من عمره في مشاعر تعباه ساحباه لعالم هو مش حابه
وساعات تحضن حد ضعيف فحضنك يقويه ويحسسه انك في ضهره سانده وانك دايما معاه حتى اذا بعيد
وساعات تحضن حد بتحبه فتوصله مشاعرك كلها في الحضن ده هاتلاقي الكلام صغير اوي قصاد كم المشاعر اللي الحضن بيوصلها
الحضن عالم .. قصة .. حكاية .. الحضن حياة تانية !!
الحضن اعمق تعبير عن الذات واعمق تعبير عن الحب

احضنوا بقلبكم احضنوا بكل خلية فيكوا احضنوا نفسكم واحضنوا حبايبكم
ما تضيعوش حياتكم بعيد عن حضن حبايبكم
ولما القلب يقسى احضنوا كتير هاتلاقوه رجع حن تاني للحياة
ودبت فيه الروح وجري حضن الدنيا باللي فيها

#الحضن_عزوة
#الحضن_وطن
#الحضن_دفا
#الحضن_حياة

Mary Naeem · 23 - 01 - 2018, 11:59 AM

احضنوا بقلبكم احضنوا بكل خلية فيكوا احضنوا نفسكم واحضنوا حبايبكم

رووووووووووعة حببتي
ربنا يفرح قلبك

walaa farouk · 23 - 01 - 2018, 07:45 PM

ميرسى على مرورك الغالى الحضن دفا .... الحضن حياة