31 - 12 - 2017, 10:35 PM
|
|
|
|
..::| الإدارة العامة |::..
|
|
|
|
|
|
خلاص الرقم هيتبدل
والسنين هتزيد بواحد
قدام بعض .. دى نهاية سنة وبداية التانية
لكن قدامك حياتنا حاجة واحدة
ولا متقسمة ايام ولا سنين
ولا حتى عندك تواريخ
لأنك موجود من الازل والى الابد
اللى فينا فهم كدة
كل ليل بيعدى عليه بيعتبره نهاية
وكل يوم بيبدأه
بيشكرك عشان سمحت له مرة تانية بفرصة
بس على اد فهمنا وزى ما عشنا
اسمح لنا نكلمك ونقول لك ع اللى جوانا
اصل السنة اللى فاتت
كانت صعبة على ناس كتير
اللى مات له حبيب واللى غدر بيه قريب
اللى لقى نفسه محبوس فى غربة بسبب القرش
واللى قطع قلبه كلام ولاده
خليك يا بابا ماتسافرش
اللى خسر شغل
واللى كان بيترجى منك طفل
اللى اتزنق فى فلوس كتير
واللى تعب من الظلم وموت الضمير
اللى ودانه ملِّت من الاهانة والتجريح
اللى الحمل زاد على كتافه
واللى اليأس ملاه من كتر اللى شافه
اللى الشيطان رسم له
طريق النهاية بالانتحار
واللى رفض الناس ليه ملاه حسرة على حاله
وخلاه عايش علطول فى انكسار
بس اللى يطمن فى كل ده
انك شايف وعارف كل احوالنا
واللى يدى الامل انك اله طيب
ولولا رحمتك وعفوك
ما كناش حسينا اد ايه انت قريب
بمفهومنا .. فيه سنة جديدة جاية
كل واحد مننا مستنى فيها تغيير
لكن انت وحدك العالم بإيه هو الخير
طلباتنا يارب مش كتير
الجعانين سد احتياجهم
والمظلومين رجع حقوقهم
العيانين زيح عنهم وريحهم
واللى شايلين حمول خفف عنهم
المحتاجين للشغل ارزقهم
وادى امل لكل اللى اليأس قتلهم
انت غنى وفى ايدك خير يغرقنا
ماتجازيناش بحسب اعمالنا
ماتحاسبناش على نسياننا ليك
تغاضى عن ضعفاتنا وأخطائنا
املا بيوتنا سلام
حالات الطلاق والانفصال زادت
ومن ساعة الشر ما بقى له مكان فى كلامنا
هرب من جوانا الهدوء وهرب معاه سلامنا
اللى مستنى شريك حياه ابعتله اللى يفرحه
واللى ارادتك انه يكمل لوحده
سكت كل كلمة تجرحه
اللى متشوق لطفل
اديله من عندك فرحة يكمل بيها حياته
واللى مشيئتك انه ما يبقالوش خلف
سدد احتياجه وعوضه عن اشتياقاته
اللى عايش وسط الناس وحيد
واللى بيشحت الكلمة الحلوة
م اللى رايح واللى جى
اللى سابك من زمان وراح بعيد
واللى ناسى انك اصل وجود كل حى
اللى الخطية .. عمت قلبه
واللى الشيطان بنى بينك وبينه سدود
اللى فاكر ان مافيش امل فى رجوعه ليك
وناسى ان حبك وغفرانك مالهوش حدود
كل دول وفيه غيرهم اضعاف كمان
عندهم طلبات كتير فى السنة الجديدة
بس الاكيد ان مجرد وجودك
فى حياة كل واحد فينا
قادر يخلى حياتنا افضل
حتى لو تبان الدنيا عنيدة
بيك هنعدى كل ظروف صعبة وهنكمل
ملخص طلباتنا
رحمتك .. وعفوك .. ورضاك
احنا ماعندناش يارب اله اخر سواك
ولو ارادتنا عكس مشيئتك
علمنا نحط اختياراتنا بين ايديك
ونختار بكل ايمان
نعيش اللى جى بطريقتك
آمين ..
التعديل الأخير تم بواسطة walaa farouk ; 31 - 12 - 2017 الساعة 10:46 PM
|
