عبروا عن حبكوا كفاية صمت

[walaa farouk]

- واحدة كانت بتقول " بعد انفصالنا كنت بقعد كتير افكر ف الكلام اللي جوزي كان بيقوله لما نتخانق علشان احاول اعرف ايه عيوبي و ايه سبب المشاكل اللي كانت بيننا .. و افتكرت مرة انه قالي وهو متعصب انتي عمرك ما حسستيني انك بتبادليني نفس الشعور انتي مبتحبيش غير نفسك " ..

- في جملة حلوة اوي في كتاب " حتي لا نشتكي " بتقول ان المكون الاساسي للحب هو التواجد ..

- دكتور كان بيتكلم عن المشاكل النفسية اللي بتيجي للأطفال ف قال إن كل الأمهات و الأبهات بيحبوا ولادهم جدا و معندهمش أغلي منهم بس الفرق إن في أهالي بيعبروا عن حبهم لولادهم طول الوقت و بيعتبروه جزء أساسي و مهم في حياتهم .. و أهالي تانيين مجربوش ولا مرة يقولوا لولادهم إنهم بيحبوهم ولا حتي يعبروا عن دا ..

- أفلاطون كتب إن " كل إنسان يصبح شاعراً إذا لامس قلبه الحب "

- مرة سألنا بنت لو قدامك فرصة تقضي يوم واحد مع باباكي هتعملي فيه ايه .. قالت هقوله انا قد ايه بحبه هفضل احكيله عن كل حاجة حلوة فيه .. و هحضنه علشان يحس بكدة ..
( باباها متوفي )

- ف حوار عن الجواز التقليدي بنت بتحكي عن جوزها ف بتقول " انا زمان اتجوزته علشان كان شاب كويس و محترم لكن مكانش بيننا قصة حب ولا حاجة .. بس بعد الجواز هو خلاني احبه .. كان طول الوقت بيسألني عن اللي بحبه و بيعمله ..
دايما بيفاجئني و بيفرحني و بيهتم بتفاصيلي .. هو خلق الحب بيننا لدرجة اني بقيت احس اني بحبه من زمان اوي من سنين كتير "

- الكاتب الجميل محمد سعيد كتب مرة " فالمشاعر ان لم تنطق فلا قيمة لها " ..

- قال هي عمرها ما قالتلي انها بتحبني بس لما كنا بنبقي متجمعين ف مكان واحد .. كل اللي قاعدين كانوا بيحلفوا انها بتحبني من غير ما يعرفوها او يعرفوا اي حاجة عن علاقتي بيها .. مع انها كانت بتتعامل عادي ..

- في مقولة بتقول " أجمل شئ ممكن أن تقدمه لأولادك هو أن تحب أمهم " ..

بيتهيألي إن أعظم حاجة ممكن نقدمها لأهلنا و اصحابنا و الناس المميزين ف حياتنا اننا نعبرلهم عن حبنا ليهم
اننا نهتم بتفاصيلهم و مشاكلهم و الحاجات اللي بيحبوها ..
اننا نكون موجودين ..

حتي لما هندور علي أسباب العلاقة السوية بين اي اتنين هنلاقي ان اهم سبب ان الطرفين طول الوقت بيعبروا لبعض عن حبهم بطرق كتير

مينفعش أكتفي بإني أقول انا بحب اهلي او صحابي او شخص معين من غير ما أبين دا ف تصرفاتي ..

مينفعش اكون بحب صاحبتي بس بهرب منها عشان مشاكلها بقت حمل عليا !! ..

مينفعش اخبي عن الناس حبي ليهم و بعدين ازعل انهم فاكرني مبحبهمش ..

مش عيب ان اقول لولادي اني بحبهم و انهم غاليين عندي ..

تعبيرك عن حبك هيفضل دايما حل لكل المشاكل .. هيفضل سبب رئيسي مخليك حاسس بالراحة النفسية ناحية كل الناس اللي بتحبهم ..

عبروا عن حبكوا لأهلكوا و أصحابكوا قبل ما الوقت يعدي و تتمنوا يوم واحد بس تقولولهم فيه قد ايه كنتوا بتحبوهم :')

[Mary Naeem]

هيفضل سبب رئيسي مخليك حاسس بالراحة النفسية ناحية كل الناس اللي بتحبهم
تعبيرك عن حبك هيفضل دايما حل لكل المشاكل ..