تداريب لنهاية السنة

[walaa farouk]

أخر أيام فى السنة زى أخر أيام العمر، المفروض نعمل فيها حاجة:
1- *انك تعترف*.. دى لوحدها وقفة مع النفس ليها قيمتها.. متكسلش عن سر الاعتراف، لأن فيه نعمة وانت محتاجه و نستعد لاستقبال سنة جديدة بالاعتراف


2- شوف اي *تدريب* وعدت ربنا تعمله طول السنة اللى فاتت وغالباً مكنتش أمين فى وعدك، زى مثلاً:
- تدريب انك تصحى فى نصف الليل ولو ½ ساعة تصلى وتكلم ربنا
- صلاة يسوع 100مرة، يجوز ابتديته ومكملتوش
- زيارة مريض كل أسبوع
- نعمل خير بشكل عملى، مع واحد غير مسيحى
- بقدر الامكان كأولاد ربنا ، ميفوتش يوم من غير انجيل وياحبذا ½ ساعة
حاول فى أخر 10أيام، تسترجع الحاجات دي.


3- لو شاطر، تاخد *ساعتين خلوة* من هنا لآخر السنة، تراجع فيهم السنة كلها ولو شاطر تراجع العمر كله، لو كانت قعدة هادية جميلة هتفرق معاك كتير


4- شوف *مين زعلان منك*، ومتدخلش على سنة جديدة من غير ماتصالحه مهما كلفك من محايلة ومن انكسار لكرامتك.


5- ابتدى *احضر تسبحة* جرب كده قول: السنة دى هاخد ليلة للصبح وجرب ولو مرة وصية "اسهروا" دى.


6-حاول تطلع *بمزمور جديد تحفظه* فى الـ10أيام دول وتردده على طول


7- فى ناس بتيجى فى الـ10أيام دول وتحاول *تتناول كل يوم* أو يوم ويوم، وتحاول تغسل عقلها وقلبها فى القداس.


8- لو انت خادم قول انا قصرت فى الخدمة قوي، انا *هاذكر أسماء كل الخدام والمخدومين* اللى معايا .


9- اعتبر ان 31-12 نهاية العالم، طيب شوف بقى من هنا لـ31/12 الساعة 12 هتعمل ايه؟!، ممكن ترن فى دماغك *فكرة عمرك ما فكرت فيها، أو ربنا يحط فى قلبك شعور عمرك ما حسيت بيه* قبل كده، أخر 10 أيام فى عمرك، هتاكل ازاى، هتنام ازاى وهتتكلم فى ايه


10- لو واحد فيكم بيكتب *خبرات أو مذكرات*، ساعات بيبقى مناسب انك تفتح المذكرات دى وتقلب.. لو كانت تحضيرات اسأل نفسك: انا عملت ايه من الكلام ده كله..


11- اعلى فى *العطاء* بدل الـعُشر خليها الربع ولا الـنص .


12- ساعات شباب فى أخر 10 أيام يعمل ميطانيات كتير أو ينام على الأرض أو يصوم للغروب.. نفسه يقدم ذبيحة حب لربنا ممثلة فى *جهاد مكثف* من قلب تائب


13- ممكن يكون واحد أهمل فى قراءاته الروحية ويقول فى أخر 10 أيام *هاقرأ كتاب من كتب البابا* زى كتاب الوداعة والتواضع أو التوبة والنقاوة وأذاكره كويس عشان ادخل على السنة الجديدة والفكرة بتاعة الكتاب دى شغلانى


14- مع وجود السيديهات والعظات، ممكن الواحد *يعمل مؤتمر لروحه*، تسمع له 3- 4عظات وتكتب وتقف بعد كل وعظة تصلى وترنم، تاخد جرعة مكثفة لنفسك


15- *نظرة إلى بيوتنا*.. لأن أحياناً يكون أهلنا تعبانين شوية أو صعبان عليهم مننا من انشغالنا عنهم، قول حقه عليا، اهملته بسبب الخدمة، طيب خاطره واهتم بيه وشجعه

16- *الخطايا المتكررة* زى: الادانة والقلق... الخ، صلى كل يوم وقول: شيل عنى يارب كذا وكذا كأنك فى مرحلة خطيرة وعايز ربنا يشيل عنك قبل الهزيع الأخير


- خد *فكرة واحدة* من دول، وقول يارب ساعدني فى أخر 10 أيام دول عشان أعملها

- وعندنا مفهوم مريح يسندنا هو أصحاب الساعة الحادية عشر، يعنى ربنا قبل ناس تشتغل فى الأخر خالص وأعطاهم الأجرة كاملة بس خدوها جد.. قل له يارب: عايز الحق الكام يوم الأخارى دول عشان اقدمهم ليك
فيه ناس نجحت قبل كده فى التداريب دى، فده يبقى حافز ليك انك تكمل

[Mary Naeem]

شكرا يا لولو
تداريب لنهايه السنه لابونا داود لمعى