|
 |
 |
 |
|
رقم المشاركة : ( 1 )
10 - 07 - 2012, 10:29 AM
|
|||||||||||
|
|||||||||||
 صوت خارجي : كان في بيت جميل عايشين فية ماما و كوكي و كيفين تعالوا و في يوم ماما تعبت قوي و كانت عيانة خالص طيب يا تلاي هنعمل اية ؟؟؟ تعالوا نشوف كوكي و كيفين عملوا اية مع ماما ؟ كيفين: حمد الله على سلامتك يا ماما... نشكر ربنا الدكتور طمنا و قال إنك هتكوني كويسة بعد لما تاخدي الدواء ماما:شكراً يا كيفين يا حبيبي... نشكر ربنا كوكي: و أنا كمان يا ماما هأصلي كل يوم إن بابا يسوع يشفيكي بسرعة ماما: يلا يا ولاد غيروا هدومكوا لحد لما احضر العشاء كوكي: لأ يا ماما إنتي تعبانة... أتفضلي يا ماما حضرتك ارتاحي و أنا و كيفين هنجهز الأكل ماما: ماشي يا كوكي... و انت يا كيفين ساعد أختك الصغيرة كيفين: من عنيا يا ماما... ارتاحي انتي بس. كوكي: يا رب ماما تخف قبل عيد الأم علشان نقدر نحتفل بيها كيفين: ماتقلقيش يا كوكي ماما هتبقى كويسة إن شاء الله كوكي: اوعى يا كيفين تكون نسيت تجيب لماما هديتها كيفين: عيب عليكي...ده أنا أشتريت لماما حتة هدية ...إنما إيه... هتعجبها قوي كوكي: و أنا كمان جبت لماما هدية صغيرة كانت هي محتاجاها... بص كده... كيفين: إيه ده... جونتي... ديه هدية ديه؟ كوكي: ايوة دة جوانتي علشان ماما تطلع بيه الأكل السخن من الفرن... هي كانت محتاجاه كيفين: جوانتي للفرن!!! تعالي شوفي الهدايا اللي بجد... بصي أنا جبت إيه... طقم خلاط و معاه عصارة برتقال علشان ماما تعملي العصير اللي بحبه كوكي:الاه حلو قوي.... بس المهم انك تكون جايبة علشان يساعد ماما في شغل البيت مش علشان تعملك فية برتقال و بس ...ماشي .... كيفين : ماشي ... ماشي .... كوكي : المهم يلا يا كيفين انت هات الأكل من التلاجة و انا هأجهزه في المطبخ كيفين: بصي يا كوكي انا ورايا ماتش على الكمبيوتر , و عقبال ما أخلصه تكوني انتي جهزتي الأكل كوكي: الاه... يعني مش هاتساعدني زي ما ماما قالت؟ طيب علشان خاطر ماما مش هي تعبانة و إحنا لازم نساعدها؟ و بعدين إن ماكنش علشان هي تعبانة فعلى الاقل علشان خاطر عيد الأم كيفين: يا كوكي انا جبت لماما هدية كبيرة و غالية... اعتقد إن ده كفاية... اما انتي فهديتك صغيرة قوي... فممكن تساعدي ماما انتي بدل الهدية الصغيرة ديه كوكي: بس يا كيفين ماما هتزعل لما تلاقيك مش بتسمع كلامها كيفين: ما انا هأبقى اقولها اننا كنت تعبان... يلا بقى لأحسن أنا جعان قوي كوكي: ماشي يا كيفين براحتك... بس ما تنساش تدي لماما الدواء في ميعاده بالليل كيفين: و الدواء ميعاده الساعة كام بالظبط كوكي: الدواء الأول ميعاده الساعة 1 و التاني الساعة 4 كيفين: يا سلام و انتي عاوزاني أصحى الساعة 4 كوكي: يا كيفين ما انت عندك بكره أجازة و بعدين انت نسيت ياما ماما سهرت جنبنا طول الليل و إحنا عيانين كيفين: لا يا كوكي مانستش.... بس ... اصل.... طيب ربنا يسهل... ممكن بقى تحضري العشاء بسرعة علشان الحق انام و اصحى تاني كوكي: حاضر يا كيفين... بس ممكن من فضلك تلف هديتي في ورق الهدايا ده. كيفين: حاضر... لما نشوف اخرتها... ياه انا نعسان قوي... انا هالف الهدايا و انام... يا سلام أدي الهدايا و لا بلاش... حتى شكلها يملى العين مش هدية كوكي دي الصغيرة اللي عاوزة عدسة مكبرة علشان الواحد يشوفها... كده تمام... اهو الواحد يفرح قلب ماما بدل ما أنا علطول تاعبها و مش باساعدها... اما ألحق انام بقى شوية لحد لما كوكي تحضر العشاء.... صوت خارجي : و فعلا يا ملايكة كيفين لف الهدايا و بعدين نام كيفين و بعد شوية حلم بالملاك الحارس يا تري اية اللي هيحصل تعالوا نشوف ؟؟ كيفين: إيه يا كوكي خلصتي الأكل؟... إيه ده ... إيه النور ده... انت مين...؟ الملاك: انا ملاكك الحارس يا كيفين... كيفين: أهلاً أهلاً يا ملاكي الحارس.... إيه ده هو انت واخد الهدايا ديه و رايح فين؟ الملاك: انا واخد الهدايا بتاعتك انت و كوكي اوديها لماما... كيفين: ايوه بس استنى كده... ديه هديتي... صح.... الملاك: تمام يا كيفين... كيفين: امال الهدية الكبيرة ديه بتاعت مين يا تري ؟ الملاك: ديه هدية كوكي لماما... كيفين: هدية كوكي؟ بس ديه هدية كوكي كانت صغيرة قوي!!! إزاي كبرت كده؟؟؟ الملاك: يا كيفين... تفتكر إيه اللي يفرح قلب ماما أكتر؟ هدية كبيرة و لا انك تسمع كلامها و تساعدها ؟ كيفين: أعتقد يعني... متهيالي !!!! الهدية الكبيرة ... و علشان كده انا جبت لماما هدية كبيرة... الملاك: لا لا يا كيفين... مش الهدية الكبيرة اللي تفرح قلب ماما... الهدية اللي تفرح قلب ماما بجد يا كيفين هي انك تسمع كلامها و تساعدها و تعمل كل اللي تطلبه منك لأنها بتحبك قوي و كل اللي بتطلبه منك اكيد بيكون علشان مصلحتك. كيفين: أيوه بس!! هو إيه اللي حصل لهدية كوكي؟؟... ده ..ده انا اللي اففلها بنفسي و كانت صغيرة قوي الملاك: علشان كوكي يا كيفين طول الوقت بتسمع كلام ماما و تساعدها و اي حاجة ماما بتطلبها بتعملها علطول... و علشان كده كل ما كوكي تعمل حاجة حلوة مع ماما انا احطها لها جوة الهدية لحد ما بقت الهدية كبيرة قوي كدة و اتملت بحاجات كوكي الحلوة ... كيفين: عندك حق يا ملاكي ... انا فعلاً ماكنتش باسمع كلام ماما في أي حاجة و عمري ماكنت باساعدها و لا انفذ اللي بتطلبه مني... بس اوعدك من هنا ورايح مش هأعمل كده تاني و هأعمل كل اللي انت قلت عليه علشان افرح قلب ماما بجد الملاك: برافو عليك يا كيفين... سلام...سلام يا كيفين... كيفين: إيه ده ... ده كان حلم حلو قوي... عندك حق يا ملاكي انا لازم افرح قلب ماما... يا كوكي...يا كوكي... أستني انا جاي اساعدك في تحضير العشاء... صوت خارجي : و فعلا يا ملايكة كيفين اتعلم انه يفرح قلب ماما لما يسمع الكلام و يساعدها مش لما يجيب هدية كبيرة و بس و احنا كمان اللي عايز يفرح قلب ماما يسمع الكلام و يساعدها علشان كلنا نقولها كل سنة و انتي طيبة يا احلي ماما 
|
 |
| أدوات الموضوع | |
| انواع عرض الموضوع | |
|
| قد تكون مهتم بالمواضيع التالية ايضاً |
| الموضوع |
| فنكش في المدرسة ( اسكتش للاطفال ) |
| قصة برج بابل ( اسكتش للاطفال ) |
| اسكتش قصة زكا ( للاطفال ) |
| فنكش وملاك عيد الأم(اسكتش للاطفال) |
| اسكتش من مصر دعوت ابني (للاطفال) |
العرض العادي
