طريق إبليس
كلنا عارفين إن مافيش أسهل من إن الواحد يعمل خطية !! .. دى حتى بولس قال: " حينما أريد أن أفعل الحسنى , أجد الشر حاضر عندى " ( رومية 7: 21) .. تخيل لما بولس يقول كده !!! يعنى أنا مش لوحدى فى الخيبة دى ...طب والقائد فى الطريق ده ... اسمه إيه ؟ .. اسمه :
1-الشيطان : يعنى المقاوم .. مقاوم لكل عمل روحى بيعمله فى وسط شعبه ...
2-إبليس : يعنى المشتكى .. ينصب لك الفخ .. ولما تقع فيه .. يروح يشتكى عليك عند الله !
3-الكذاب وأبو الكذاب : يعنى ما يقولكش حاجة صح أبداً ...
ده غير أسماء تانية كتير .. من ضمنها : الشرير , القتال , المجرب , عدو الخير , رئيس سلطان الهواء , رئيس سلطان هذا العالم .. مش بس كده .. ده من بجاحته ... تبقى ماشى وراه .. وعلى قد ما يقدر يذلك ويبهدلك .. !!!
طب ده بالنسبة للى هاشوفه فى حياتى إذا مشيت فى طريق إبليس : ذل وبهدلة ونكد .. طب وبعد الموت ؟ ...
" إن كان أحد لا يثبت فى ( المسيح ) يطرح خارجاً كالغصن , فيجف ويجمعونه ويطرحونه فى النار , فيحترق " ( يوحنا 15: 6 )
بعد الموت ... بعيد عنك .. هاكون فى مكان فيه حريقة ليل ونهار ... ومافيهوش مصلحة مطافى تطفى .. لان مافيهوش مصلحة مياه أصلا ( يعنى مش هلاقى ميه أبل بيها ريقى ).. ومافيهوش مصلحة كهرباء .. يعنى حتى مش هاقدر أشوف اللى بيتشوى جنبى ..!!
