ربى راجل

[walaa farouk]

- مافيش حاجة اسمها تعملى لابنك ضفاير ..الرجاله مش بتضفر شعرها حتى لو عاملاه عند مدام فلفت اللى خدت فى راس ابنك 400 جنيه.. احلقيله
- البونى تيل اللى عاملاه فى راس الواد ده ماينفعش اسمها زعرورة على فكرة قولتلك احلقيله
- الشريط اللى بالعرض اللى على دماغ ابنك ده ما اسموش هيد باند و بقى رجالى اسمه توكه و الرجاله مش بتلبس توك ودى الواد يحلق
- الله يخرب بيت شعر ابنك اللى محيرك لو كان الشعر عزيز مكانش طلع لحب العزيز أعقلى بقى سيشوار ايه اللى بتعمليه للواد ..وديه يحلق جمعه و جمعه بعد الصلاه مع ابوة ربنا يهديكى
- خلصنا راسه ننزل على اللبس مافيش رجاله بتلبس ترتر و لا هدوم بجليتر دى مش شياكة خالص على فكرة
-مافيش حاجة اسمها تلبسيه غوايش مش علشان سموها حظاظة بقت تنفع لا هى غويشه برضوا هاتيله ساعة احسن و ارجل
- ماينفعش تكلمى ابنك و تقوليه روحى و تعالى و حبيبة ماما القطة ..ده بيعمل خطأ مفهومى عن العيال ماتحيريهوش هو ولد و لا بنت ده ما اسموش دلع دى اسمها وكسة
- ادى ابنك الفلوس يدفع فى المحلات و المواصلات و ياخد الباقى علشان يتعلم انه راجل
- عارفة لو شفتك بتحطى للولد زبده كاكاو فى شفايفه تانى هعمل فيكى ايه ؟؟؟ .. بلاش صباع الروج ده ابنك شفايفه مشققه حطى له جيل و لا فازلين اى حاجة بس مش تعوديه يمسك قلم روج هتندمى صدقينى
- ايه اللى جابلك الفكرة انك تحطى لابنك مانكيير و تلبسيه طرحة و تصوريه ؟؟ غلط غلط غلط بتحطى فى دماغة ان ده مقبول... ماترجعيش تصوتى بعد كده
- لما تمشى فى الشارع مع ابنك اديله الاكياس يشيلها و أنتى بتقوليه انت الراجل ماينفعش اشيل طول ما انت موجود من غير ما تزودى الحمل قوى .. علميه انه هو المسئول من طفولته علشان لما يكبر يشيل عنك و عن اخته و عن مراتة
-لما تديه مصروف كل يوم قوليله هتجيب لاختك ايه و انت راجع .؟؟..علميه انه ماديا مسئول عن غيره خصوصا البنات
- كل ما تحطى أكل بصي له و قوليله عجبك ؟لو قال ايوة قوليله طيب ليه مقولتش تسلم ايدك يا ماما ؟؟ علشان تبقى عاده ..و لما ما يعجبوش علميه يقول شكرا على تعبك يا ماما بس انا بحب الحاجة الفلانيه اكتر ..علميه التقدير ليكى و لمراته من بعدك خليها تدعيلك
-لو تعبتى ماتخليهوش يلعب خليه جنبك و اطلبى منه يعمل اى حاجة علشان انتى تعبانة ..علشان يتعلم يحس بغيره
- خليه بيشيل طبقه و يعلق هدومه و يناولك حاجات ..خلى حديث خيركم خيركم لأهله قدام عنيكى
- بلاش الالوان البينك و الفوشيا و هو صغير قوى لما يكبر شويه عادى أصبرى علشان بس ارتباط الالوان دى بالبنات ..ساعات ده بيشتتهم
- الراجل المحترم طالع من بيت محترم زى ما هو مش صح أنك تقلبيه بنوته برضوا مش المطلوب انك تقلبيه بلطجى خليكى وسط
- أنك تعلمى أبنك رسم و موسيقى عادى هيبقى راجل باذن الله ملوش علاقة ده
- الرجاله بتعيط مافيش حاجة اسمها بطل عياط انت راجل ,, اسمها انت قوى هى أكيد مش بتوجع قوى لان الرجاله بتتحمل و قويه ..
- مافيش راجل دلعه ساسو و ميمى و لولو .. نقى حاجة عدله الله يسترك
- ماتنسيش تحلقى للواد😏 ربوا رجاله أبوس ايديكم ..هما دول اللى جاى

[Mary Naeem]

- مافيش راجل دلعه ساسو و ميمى و لولو .. نقى حاجة عدله الله يسترك
- ماتنسيش تحلقى للواد�� ربوا رجاله أبوس ايديكم ..هما دول اللى جاى
ربنا يباركك

[walaa farouk]

ميرسى على مرورك الغالى