بنتكلم عن يسوع بس احنا مش زى يسوع !!
بنقول احنا منه شكلهُ بنجيب اسمه فى كل كلمه بس هو مش كده .. بننقد وندين ونحط فى اخر السطر اسمه !!
بنجرح ونهين وكأننا حكام وبكل حاجه فاهمين وفالاخر علشان نبان اننا مخلصين بنختم بأسمه ..
بناخد اشكال والوان من الوداعه والقداسه والتدين بس مش عارفين ناخد طبعهُ ..
يسوع مع الكل طيب مع الكل حنين مع الكل بيعذر ويصبر
يسوع بيواسى الخاطى والغلطان بيحن على المستضعف والتعبان .. يسوع بيسبنا احنا ندين بعض . لكن هو بيقول اذهب وانا لا ادينك .. يسوع عنده رحمه عنده مليون سبب علشان يتحنن عليك . انما احنا بنتكلم عن يسوع لكن مفيناش قلب يسوع عندنا عين واحده يا ظالم يا مظلوم معندناش ابدا رحمه ونحط نفسنا مكان المحكوم .. حساباتنا كلها ده ايه وعمل ايه ويملك ايه واحنا للاسف مانملكش شعره واحده من شعور راسنا .. بنتكلم عن يسوع لكن معرفناش يسوع كل واحد عامل يسوع خاص بيه .. انما
يسوع يبقى ابو الرأفة واله كل تعزيه ..
يسوع اللى بيحن بيضم الخطاه بيرحم الكل . الخاطى قبل البار
ياريت نعيش يسوع الاول وبعدين نتكلم عنه او بأسمه
اصل اللى عاش يسوع مش هايعرف ابدا يكسر حد مش هايقدر ابدا يقيم حد مش هايكون غير قلب طيب وبجد
اصل اللى عاش يسوع قلبه هايبقى شبهه .
هو قال تعلموا منى لانى وديع ومتواضع القلب !! وايه كمان فتجدوا راحه لنفوسكم ..
كل اللى بيتعلم منه بيبقى زيهُ بياخد طبعهُ التواضع والوداعه
يارب علمنا نكون زيك قبل مانتكلم عنك
