|
 |
 |
 |
|
رقم المشاركة : ( 1 )
12 - 07 - 2017, 09:06 PM
|
|||||||||||
|
|||||||||||
|
أوحش حاجة في الثانوية العامة.. انها بتربط قيمتك بدرجتك .. فا لو جبت درجة قليلة الناس هايبصولك بنظرة وحشة، ومش كدة بس ده أنت نفسك هاتقِل في عين نفسك. ولو جايب مجموع كبير فا أنت كدة برنس مكلش زيّ. وكأن ده اختبار لتحديد القيمة والهوية، مش كام ورقة بنكُب فيهم معلومتين حافظينهم وخلاص. عن تجربة شخصية، كنت في تانية ثانوي (ايام ما كانت ثانوية عامة سنتين) جايب ٩٧٪ ، وفاكر اياميها كنت طاير من الفرحة وماشي راسي في السماء ورجلي على الارض.. اللي هو أنا مفيش اجمد ولا اكثر قيمة منّي.. ودخلت هندسة، واكتشفت مع الوقت اني مبحبش هندسة وانه لو رجع بيا الزمن كنت دخلت فلسفة أو حاجة ادبية أو حاجة نفسية، لأن ميولي وشغفي كلُّه ناحية الكتابة والتاريخ والمجال النفسي حتى، لكن ماتخيّلش نفسي مكمّل مهندس باقي حياتي. اومال ليه دخلتها؟ يمكن عشان احس بقيمتي اكتر.. يمكن عشان المجتمع كان عايز كدة .. يمكن عشان مكنش حد هايفهم يعني ايه حد جايب مجموع كبير وداخل كلية قليلة (لو التقييم بالدرجة يعني).. أو يمكن عشان دي كانت اعلى حاجة ممكن ادخلها بمجموعي اللي تعبت اني اجيبه، فا كان زي ما تقول دخلتها "استخسار" مش حُب. وللأسف ماشي بدعوات اهلي انجح سنة واشيل سنة. وأولويتي دلوقتي لقراياتي الشخصية في الحاجات النفسية والأدبية، حتى الكام شغلانة اللي اشتغلتها في الوقت ده مالهومش علاقة بهندسة، كلها حاجات أنا بحبّها .. يمكن عشان كدة كنت ناجح فيها. بقول الكلام ده ليه؟ عشان اوفّر على اي حد غلبان مخدوع بوهم "المجموع" سنين هايضيّعها في مكان مش بتاعه .. بيدرس حاجة مش بيحبّها عشان بس المجتمع وأهله يفرحوا بيه .. أو طمعاً في مكانة إجتماعية وهمية، أو خوفاً من أنه مايلاقيش شُغل فا يدخل حاجة مضمونة .. صدقني مفيش حاجة مضمونة، المضمون هو بس اللي بتحبّه.. اللي هاتعافر عشانه وتُبدع فيه، واللي برضو هاتلاقي مليون شغلانة ليه وهاتنجح اضعاف ما كنت هاترمي نفسك في مكان مش بتاعك. وعشان برضو أقول كلمة نفسي كل اللي بيقرا دلوقتي يفهمها .. "قيمتك مش في مجموعك"، ده وهم .. الحياة اوسع والنجاح أكبر بكتير من رقم على ورق .. لو جبت درجة قليلة أنت زي ما أنت مانقصتش حاجة، ولو جايب ١٠٠٪ أنت برضو زي ما أنت مازدتش حاجة عن اي حد تاني. والعِبرة مش بالمجموع .. العبرة بإنك تكون في المكان اللي ربنا خلقك ليه وتكون ناجح فيه بجد (واللي هو بعيد تماماً عن مجموعك في الثانوية العامة). اخيراً .. ⁃ أي مجموع تجيبه أشكر ربنا عليه. ⁃ إحتفل .. افرح.. اعزم نفسك على اكله حلوة وهيّص مع اصحابك ورحوا اتفسحوا وانسوا اي حاجة قبل كدة.. وماتخفش تقول درجتك مهما كانت، أنت قيمتك اكبر بكتير من شوية ارقام. ⁃ إرمي كلام عيلتك ومجتمعك واهلك الرخمين المتطفّلين اللي دايماً بيقارنوا بينك وبين اصحابك، خد كل كلامهم السلبي التنافُسي ده وارميه في الزبالة. أنت محدّش بينافسك ولا بيجري وراك .. أنت ربنا حطّك في الارض دي لهدف بتاعك أنت بس، ومحدش هايسرقه منك أو ياكل من نصيبك .. ركّز انك توصلّه وملكش دعوة بحد. ⁃ وأنت بتختار كلّيتك .. ارمي فكرة (المجتمع .. الأهل .. اصحابي .. كلية قمّة .. هلاقي شغل ولا لأ .. هاتدّيني برستيچ ولا لأ .. ) ارمي كل الهجص ده على جنب واسأل نفسك السؤال البسيط ده .. أنا بحب ايه؟ وايه اللي ممكن أكمّل حياتي بعمله من غير ما أزهق؟ وأنا متأكد أنك هاتختار صح .. وهاتنجح في أي حاجة هاتختارها .. ببساطة عشان بتحبّها! #ثانوية_عامة #موّال_كل_سنة #يولع_المجموع #خش_اللي_بتحبّه #تاني_يولع_المجموع مينا طوسن 
|
|
13 - 07 - 2017, 01:24 PM
|
رقم المشاركة : ( 2 ) | ||||
|
† Admin Woman †
|
رد: موال كل سنة
وأنا متأكد أنك هاتختار صح .. وهاتنجح في أي حاجة هاتختارها .. ببساطة عشان بتحبّها
|
||||
|
|
|
13 - 07 - 2017, 08:58 PM
|
رقم المشاركة : ( 3 ) | ||||
|
..::| الإدارة العامة |::..
|
رد: موال كل سنة
ميرسى على مرورك الغالى مرمر  |
||||
|
|
 |
| أدوات الموضوع | |
| انواع عرض الموضوع | |
|
| قد تكون مهتم بالمواضيع التالية ايضاً |
| الموضوع |
| لا أنام وحدي |
| الصليب لواء المسيح والملائكة يحبون لواء ملكهم |
| لما آجى أنام |
| لما آجى أنام |
| حلويات منال, اطباق منال, مطبخ منال,معجنات منال,وصفات |
العرض العادي
