حاجات لازم تعملها كأب لو عندك بنت

[Rena Jesus]

4 حاجات لازم تعملها كأب لو عندك بنت -



1) امدحها

كل البنات - حتى وهما صغيرين :D - بيحبوا يسمعوا الكلام ده ..
كل ما تسمع المدح والحب والحاجات دي منك ..
كل ما هيقل عندها حتة إنها تدور عليها برة! تدور على حد يقولها الكلام ده!
ويا عالم هيبقى مين!

مثلاً: "إييييه الجمال ده" .. "فستانك تحفة" .. "إنتي ذكية جداً"

أيوة أنا بتكلم على بنتك لو عندها مثلاً من سنتين وإنت طالع

في التوقيت ده تلاقيها بقا بتتكسف وتلف بإللي هي لابساه وتضحك كأنها ملكة جمال المطابخ!

ببساطة .. مدحك ليها .. بيرسخ عندها قيمة واحدة ..
إن أهم راجل في حياتها كلها شايفها بنت جميلة وتحفة وعسل ..
ومفيش حاجة تبني ثقة البنت أكتر من كدة!

----

2) إديها الدعم - ببساطة دايماً تكون هناك معاها

تمرين سباحة؟ حفلة تخرج حتى لو من الحضانة -
معلش عارف إنها حاجة غبية إنهم يعملوا حفلة تخرج من الحضانة ؟
بتعمل كيكة بايظة في المطبخ مثلاً :D؟
هي أخدت قرار إنت مش مقتنع بيه زي مثلاً إنها عايزة تعمل كذا وكذا -
بعد لما كبرت يعني -؟

دايماً خليك هناك وادعمها وقدملها النصايح اللازمة لإلي بتمر بيه ..
شجعها ومتوقفهاش مدام مش هتضر نفسها وده خط قيد مهم جداً محدش ينساه ..
لأني بشوف ناس بترمي ولادها في أي بتاع ويقولك يعتمد على نفسه!
وهما في الحقيقة عايزين يريحوا دماغهم مش أكتر!

طيب لو فشلت في أمر ما وإنت كنت عارف كدة ..
ابعد تماماً عن حتة "مش أنا قولتلك! شفتي بقا!" دي مش وظيفتك ..
إنت كدة بتهد فيها اعتمادها على نفسها وثقتها

وظيفتك يا برنس .. إنك تدعمها .. إنك تحسسها إنك جنبها .. إنك ضهرها ..
إنها لما هتحتاج حد، مش محتاجة تنده عليك لأنك معاها ..
دي وظيفتك ومحدش يقدر يملاها غيرك مهما كان مين حتى لو أمها!

----

3) سبها تعيط ..

أه بجد عارف إنه مزعج بس معلش

بس أنا مش بتكلم على البنات الصغيرة تحديداً (لأن عياطهم زي صوت وبور الزلط)
بس على حتى الكبار شوية

العياط عند البنات والستات بصفة عامة شيء غير مفهوم للرجالة ..
وكمان الرجالة مش بيحبوه لأنهم بيحسوا بكارثة حصلت لما بيشوفوا بنتهم أو مراتهم بتعيط ..
فيبدأ يسأل فيه إيه وهو منزعج جداً .. والست مبتحبش كدة!
البنات والستات بصفة عامة كائن عاطفي ..
ساعات العياط بيبقى من غير سبب واضح أو مقنع ليك ..
المهم إن بنتك تبقى عارفة إنك مقدر ده .. وتساعدها على تجاوز ده ..
من غير متقعد تقولها: "خلاص .. انسى كل إللي فات .. كبري دماغك .. بلاش عياط"
وإلى ذلك من نصائح أفلام الانتقام دي كأنك بتحاول تحضها على الانتقام من الوحش في أخر مرحلة!

ساعتها هي هتبصلك كأنك زومبي بيقولها حاجة غريبة جداً!

أيوة أصل العياط ده عامل زي بيضة كيندر ..
مينفعش متشتريهوش لما تروح السوبر ماركت .. حاجة منطقية جداً على فكرة!
إنت بس إللي مش فاهم!

----

4) حب أمها

حب أمها جداً - إللي هي مراتك على فكرة لحسن تفتكر إني بتكلم على جدتها ولا حاجة
احترم أمها .. وأرائها قدامها ومن وراها ..
ببساطة .. لازم تقدر إن إللي جابلك بنتك الحلوة دي بعد ربنا وفضله هي مراتك ..
فلازم تحترمها
إللي هتتعلمه بنتك من معاملتك لأمها ..
أكتر بكتير جداً من إللي ممكن تقراه في 100 سنة أو تقوله في محاضرات ..
أو تقعد تفهمهولها قبل الجواز!

نص الجوازات بتفشل بعد كدة بسبب إن البنت شافت أبوها أو أمها بيتعاملوا مع بعض إزاي وفي اللاوعي بتحاول تطبق إللي شافته على مدار حياتها بحذافيره وممكن يبقى غلط وممكن يبقى صح!
وساعات بتفشل بسبب المسلسلات التركي والأفلام الهندي! :D
لكن الحقيقة التي لا تقبل جدلاً ..
إنها هتقلده وهتتعلم منكم أكتر بكتير من أي حد!
ببساطة:
حب أمها أوي .. أوي كمان!

--------

أهم حاجة مننساش ..
"إن وراء كل بنت عظيمة .. أب عظيم بيحبها أوي"

[sama smsma]

معلومات قيمة عن تربيه البنات
ربنا يفرح قلبك

[walaa farouk]

وظيفتك يا برنس .. إنك تدعمها .. إنك تحسسها إنك جنبها .. إنك ضهرها
موضوع رائع يا رينا
ربنا يفرح قلبك

[Mary Naeem]

رووووووووووووووعة يا قمراية

ربنا يفرح قلبك حببتي

[MenA M.G]

4 حاجات لازم تعملها كأب لو عندك بنت -


معلوماات قيمة جداً

[Rena Jesus]

ميرسى لمروركم الغالى

[مورا مرمر]

موضوع جميل ومتميز
ربنا يفرح قلبك

[Rena Jesus]

ميرسى لمرورك الغالى