أنا اتنشلت يا جماعة

[walaa farouk]

في يوم صحيت لقيت نفسي مخضوضة قوي ، فطرت ونزلت شغلي وأنا برده مخضوضة، قلت دي شوية مشاعر مزعجة وهاتروح بعدين، لكن لقيتها يتزيد.
اتكلمت مع زمايلي وزميلاتي في الشغل وسألوني عن رأي في موضوع كدا، لكن ماعرفتش أقول رأيي، أصلي لسه مخضوضة، مش عارفة أفكر ومش عارفة أكون رأي ومش عارفة أختار، أصل أنا من يومها وأنا متاخدة وخايفة ومخضوضة، رغم إني حياتي ماشية، باشتغل شغلانه بتأكلني عيش وبتفرج على التلفزيون أو أدخل ع النت بالليل وساعات أفكر هاتجوز إزاي ومين ومش باعرف الاجابة واتخض زيادة فابتدي أغير الموضوع، تقريبا أكتر حاجة باعرف إني عايزاها هي النوم. على طول عايزة أنام حتى لو كنت لسه صاحية من النوم. لكن إللى مخليني نطقت هو إن النوم كمان مش لاقياه .
أنا حاسة إني ضايعة ومافرقش حاجة عن فراخ أم محمد جارتنا، بتاكل وتنام. لكن أنا مش فارخة أنا حتى مش باعرف أكاكي.
أنا اتنشلت يا جماعة، حاسة إني مسروقة مني، أنا مش لاقياني، مش عارفة أنا مين وعايزة إيه، أنا مصرية ولا فرعونية ولا عربية، أنا أصولية ولا ليبرالية، بني آدم ولا فرخة مش عارفة تكاكي؟
حد يدور معايا على نفسي إللي ضاعت مني في الزحمة، نفسي أطلع لمكان نور أعرف أشوفها فيه ؟ عايزة أعرف سبب ضياعي وتوهان هويتي. من سنين وأنا بصرخ الصرخة دي

"إلحقوني ....أنا اتنشلت يا جماعة"
وما فيش فايدة!!!
عارفين ليه ماكنش في نتيجة؟

علشان طول الوقت بدور على مين نشلني ومش بدرو على الحاجة اللي ضاعت مني، طول الوقت بأحاول ألوم الناس وأقولهم : "إنتوا اللي ضيعتوني وتوهتوني عن نفسي" كنت فاكرة إني بكده هالاقيها، كنت فاكرة إني لما ألومهم وأكون عنيفة معاهم وساعات كمان أنافقهم هايرجعولي نفسي.

لكن النهاردا أنا شايفة حاجة مختلفة، أنا غيرت صرختي وخليتها "ارجعي يانفسي، أنا بارحب بيكي من تاني، أنا آسفة لأني أهملتك وضيعتك بإيدي"

[Mary Naeem]

مشاركة جميلة جدا

ربنا يبارك حياتك

[MenA M.G]

موضوعك مميز .. طرح رائع
ربنا يبارك خدمتك

[walaa farouk]

ميرسي كتير على مروركم الغالى