ادخلوا المطحنة برجلكوا اليمين.

[Rena Jesus]

آه،
بمُناسبة الناس اللي can't wait to graduate و مستنيين يخلصوا من المخروبة اللي هما فيها؛
اتبسطوا، اتصوروا، افرحوا و اخرجوا. ذاكروا مع بعض و اقفوا سوا بعد كل امتحان.
انزلوا كتير اوي في الاجازة، و اتصوروا. كمان كام شهر هتقعدوا تتفرجوا علي الصور دي و تقولوا يااه .

الدنيا هتفرقكوا و مواعيد شغلكوا هتختلف و مش بعيد تسافروا محافظات و دول تانية تفرقكوا.
اللي هيتجوز مواعيدُه مش هتظبط مع اللي لسه سينجل و الدنيا هيبقي فيها اولويات.

هتتغيروا و الدايرة هتضيق و الناس هيقلوا من حواليكوا تدريجيا، و مش هتلاقي سبب للتغير ده بس انتوا هتتغيروا.

رفاهية انك تصحي من النوم تقرر متنزلش عشان ملكش مزاج دي هتتلغي. و عدم تحمل مسؤلية افعالك و النتايج المترتبة عليها؛ ده هيبقي اوبشن ملغي.
زي ما رفاهية ان امك تدخل عليك الفصل في تاني حصة و تقولك هات شنطتك هنروح دي اتلغت، برضو رفاهية انك متذاكرش و تنجح بالرأفة هتتلغي.
الحياة العملية عادة مبيبقاش فيها رأفة.

استمتعوا ببعض يا جماعة، اوقات الجامعة اه مقرفة و احيانا متعبة بس فيها حاجات كتير حلوة تهوّن.
تتخرجوا بالسلامة و سَموا و ادخلوا المطحنة برجلكوا اليمين.

[Mary Naeem]

مشاركة جميلة جدا

ربنا يبارك حياتك

[Rena Jesus]

ميرسى لمرورك الغالى

[walaa farouk]

ميرسى على مشاركتك الجميلة

[Rena Jesus]

ميرسى لمرورك الغالى

[MenA M.G]

موضوعك مميز .. طرح رائع
ربنا يبارك خدمتك

[Rena Jesus]

ميرسى لمرورك الغالى