جربوا تكونوا بشر

[walaa farouk]

من يومين دخلت اجيب اكل لبنتي من كنتاكي ، وكنت شايلها على كتفي وفي ايديها لعبها ، بلونه كبيرة ومسدس خرز
المهم اديت للكاشير 100 جنيه وقولتله اديني وجبه اسناك بوكس
رجعلي الباقي 172 جنيه
قولتله معلش انا فاكر اني مديلك 100 مش 200
قالي متأكد !
قولتله انت هتشككني في نفسي ليه ، الى حد كبير ايوه دافع 100 بس
قالي طيب بسيطة
وراح طلع الالة الحاسبه وفتح الدرج وبدأ يعد الفلوس اللي في الدرج ويشوف الطلبات اللي طلعها علشان يعرف الـ 100 جنيه من حق مين
لقيت اتنين جايين من جوه ووقفوا جنبي وبيقلوله خير !!
كان منظر قبيح جدا في المكان رغم انه كوميدي في نفس الوقت
قولتلهم خير فيه حاجه !!
وبتاع الكاشير بنفسه قالهم فيه حاجه !!
فسألوه بيطلع الفلوس اللي في الماكينه ليه !
حكالهم القصة
وهنا بداوا يستوعبوا ان المسدس اللي في ايدي لعبة وان البنت اللي اتخضت بسببهم دي بنتي وان الراجل اللي قدامي ده بيعد الفلوس علشان يعرف الـ 100 جنيه بتاعت مين
مش السبب اللي فهموه من كاميرات المراقبه اللي قدامهم جوه بإن واحد خاطف بنت ومخبي بيها المسدس وبيثبت بتاع الكاشير علشان يطلع كل الفلوس اللي في الدرج
متأثرين تماما بفيلم عصابة حماده وتوتو :/

وهنا ادركت تماما قيمة النظرة الكامله ،
ادركت تماما اني قبل ما قدم سوء النية لازم اقدم قبلها 99 حسن نية
تعرفوا ليه العتاب بيسبب الصلح !!
لأن كل طرف بيشرح للتاني وجهة نظره اللي اتفهمت غلط
الزعل بيجي نتيجة التسرع في تكوين صورة كامله

جربوا تفهموا ، جربوا تتأنوا ، جربوا تقدموا حسن النوايه ، جربوا تكونوا بشر
هتلاقوا الحياة اختلفت ..

[ايمن ثروت]

جميلة جدااااااا

[Rena Jesus]

ميرسى ربنا يفرح قلبك

[Mary Naeem]

ربنا يبارك حياتك

[walaa farouk]

ميرسى كتير على مروركم الغالى

[MenA M.G]

موضوعك مميز .. طرح رائع
ربنا يبارك خدمتك