خلوني احكيلكم علي كام حاجه...

[Rena Jesus]

كتبت احداهن على صفحه من صفحات الفيسبوك قائله
"خلوني احكيلكم علي كام حاجه...

- من كام يوم روحت لدكتور يعتبر أشهر واحد في مجاله , كشفه سعره مبالغ فيه جدا و مع ذلك العياده شغاله لقبل الفجر بشويه...أول حاجه لفتت نظري أنه بيطول في الكشف جدا و قبل ما أدخله كنت واخده قرار ان دي أول و أخر مره علشان كنت فعلا زهقت...بصرف النظر أنه شاطر جدا كطبيب بس الي أكتشفته أن الناس بتروحله علشان أحترامه و تفهمه لنفسية المريض...و رغم شهرته و نجاحه هو أنسان متواضع جدا و بيتعامل بمنتهي الذوق و الأدب مع الي قدامه...يعني بتخرج من عنده مطمن و مرتاح نفسيا قبل جسديا و تاخد قرار بينك و بين نفسك انه فعلا يستحق انك تروحله و تستناه بالساعات....من ساعتها مش عارفه أبطل أدعيله بكل خيرلأنه فعلا يستاهل
علي الجانب الأخر من فتره بابا تعب و راح لدكتور شخصه غلط و سود الدنيا في وشه و أتكلم معاه بمنتهي العجرفه و قله الذوق من غير ما يراعي ان الي قدامه مريض و مفروض نوصله المعلومه بمنتهي الأنسانيه قبل كل شئ و مش محتاجه أقول ان كل ما بنفتكر اليومين الي عشناهم بسبب الدكتور ده بندعي فعلا عليه بدل ما ندعيله

- كان معايا ولد في الشغل أسمه .........الولد ده مجتهد جدا و محترم و رغم اني كنت أقدم منه في الشغل
عمره ما أستخسر فيا معلومه و لا فكر مرتين انه يعلمني حاجه انا مش عرفاها عمره ما نفسن علي حد و لا حقد علي حد...لما بتيجي سيرته كل الناس بتشكر فيه و بتدعيله و لحد النهارده لما بستخدم حاجه علمهالي بكون فعلا ممتنه جدا ليه و بفرح لما أسمع انه كبر في الشغل و بتمني ليه كل خير
علي الجانب الأخر الواحد قابل في الشغل نوعيات مريعه ...ما بين الي بينفسن و يخبي الي يعرفه و الي يتمني لغيره الشر و يلف و يدور علشان تساعده و وقت ما تحتاجه و لا يعملك حاجه و الي ياخد مجهودك بمنتهي البجاحه و الأريحيه كأنه حق مكتسب...النوعيه دي عمرها ما بتتقدم لأن الي بيركز مع غيره بينسي يركز مع نفسه و لا يتعلم و لا يكبر بيفضل في مكانه او بيقل و مع كل ده بيخسر كل الي حواليه

- كان فيه محل علي طول بروحه مع زوجى يشتري بدل لمناسابات مختلفه و مهما اقنعته نغيره مش بيرضي علشان عم فلان بيشتغل في المحل ده..راجل بسيط و جميل و بشوش و بيفضل يهزر معانا من أول ما بندخل لحد ما بنمشي...ممكن تعجبنا حاجه يقولنا بلاش دي في واحده زيها بس أرخص...او تعجبنا حاجه يقولنا دي خامتها اي كلام مش هتعيش...تحس ان عنده ضمير و قلبه عليك انت مش هدفه يكسب المكان و خلاص...اخر مره عرفنا ان عم سيد خبطتته عربيه قدام المحل و هو مروح و توفي...زعلنا عليه كأنه واحد من أهلنا...كم المرات الي جه فيها علي بالي و دعيت للراجل ده و انا كل معرفتي بيه لا تتعدي كام مره خلاني فعلا مش مصدقه مردود العمل الطيب ممكن يكون قد ايه...الحمد لله اتعمله عمره من كام اسبوع..راجل توفي و رزق بعمره من شخص يعرفه معرفه شخصيه علشان بس كان راجل بشوش و عنده ضمير
علي الجانب الاخر الواحد ممكن يكتب كتب عن البياعين و سواقين التاكسي و الناس عموما الي بتسرقك و تغشك و تستنصح عليك او تعاملك بتعالي و قله ذوق لو محتاج منهم حاجه ..الناس مش بتفكر ان ربنا شايف و ان كل ده مش بيروح و راجع ليهم في يوم من الأيام

الي عايزه أقوله عمر ما معامله وحشه و لا نفسنه و لا سرقه زودت رزق حد و ان الناس بتتنازل عن مبادئها و بتتصرف تصرفات وحشه جدا علشان خايفه علي رزقها الي كده كده مكتوب و بيجري علينا مش احنا المفروض نجري عليه و ندوس علي الناس و علي أساسيات المعامله الكويسه علشان نكوش علي كل حاجه...
و بجد المعامله الكويسه و الضمير أسهل طريقه انك تضمن حب الناس و احترامهم...و ان دعوه حد ليك او عليك مش هينه خالص و خصوصا لو ليه حق عندك...
و اخيرا يا رب الناس الي قصرنا معاهم علشان ظهروا في حياتنا في وقت غلط يسامحونا و نفضل كويسين مع الي حوالينا علي قد ما نقدر

[Mary Naeem]

ياريت نقدر نعمل كدا يا رورو

مشاركة جميلة جدا

ربنا يبارك حياتك

[walaa farouk]

ميرسي على مشاركتك الجميلة رينا

[Rena Jesus]

ميرسى لمروركم الغالى

[marit jesus]

موضوع جميييييل جدا

[Rena Jesus]

ميرسى لمرورك الغالى