المكان: امام حمام السباحة
الزمان: في يوم رحلة تبع المدرسة
الحدث: مكالمة تليفونية خلال الموبايل من ولد لمامته
"ايوه ياماما، بقوللك التيشيرت بتاعي و الشورت و كمان نظارة الغطس مش لاقيهم. تعالي شوفيهملي "
و طبعا انا و بقية الموجودين مزبهلين من المكالمة. .
و مفكرناش حتى نرد عليه
يا ترى السوبر مامي دي هتعمل ايه؟
هل هتخترق قوانين السرعة و تطير لنجدة ابنها اللي تقريبا في محافظة تانية؟😅
ولا هتستعمل الأشعة فوق الارجوانية عشان تلاقيله حاجته من خلال ذبذبات التليفون؟
على فكرة.. الولد ده مش الوحيد اللي بيضيع حاجاته
ولا الوحيد اللي بيعتمد على مامته اعتماد كامل في ترتيب حاجته
و مش هو برضو الوحيد اللي اما بيبقى راجل بيطلع عين مراته في طلبات زي دوريلي على فردة الشراب و على القميص الكحلي
بس انا ياما نبهت و ياما فكرت و في الآخر برضو انا اللي بدور على الحاجة
و ياما حرمت من المصروف بسبب اهماله و هو ولا هو هنا و كأنني معملتش حاجة
طيب ليه ده كله بس؟!
ليه بتعاقبيه بحاجة زي كده؟ عشان ميكررش الغلطة؟
بس العقاب ده لا يمتد للغلط بصلة و مش بيجيب نتيجة لأنه معملش عند الولد اي ارتباط شرطي و متركزش في ذاكرته
اومال هعمل ايه؟
الحل ببساطة في انك الأول تعلميه ازاي يحافظ على حاجته
التيشرت يتحط فين اول ما يتقلع ..
الشرابات تطبق ازاي و نشيلها فين
و هو الوحيد اللي مسؤول عن الترتيب و مفيش حد هيعمل ده بداله مهما حصل
و الله عملت كل ده
بس لسه...
طيب دلوقتي بعد كل ده محطش حاجته في مكانها.. و ضاعت
سيبيها تضيع
نعم؟!ازاي يعني!!
زي ما بقولك كده.. هو مش هيحس بقيمة الحاجة طول ما ماما هي اللي بتلم و بتدور
بمنتهى الهدوء كده. قوليله انها ضاعت و انك متقدريش تعملي حاجة
بس ده ممكن ينهار من العياط و الزعل
اكيد.. طبطبي عليه و اسأليه تقدر تعمل ايه عشان الغلطة دي متتكررش؟
بديهي انك يرد و يقوللك انه هيحط كل حاجة مكانها بعد كده و يحافظ عليها
بس حبيب قلبي ضاع منه لبس المدرسة و كده المديرة هتزعقله لو راح من غيره
و هو ده المطلوب بالضبط
انه يعرف نتيجة قراره و تأثيرها على حياته
جمدي قلبك
عشان مش يبقى المرة دي التيشيرت و بعده البنطلون و بعد كده توصل للكتب
اسمحيله يتعرف على قوانين الدنيا و يعرف هي ماشية ازاي
في علم التربية الحديث ده اسمه Natural consequences
او النتيجة الطبيعية
و هي اقدر بكتير من العقاب في تقويم سلوك الأطفال
و هتعلمه ازاي يتحمل مسؤولية نفسه من غير ما تعيدي الأمر عشروميت مرة
افتكري انك بتربي راجل
الرجالة بالذات لازم يتعلموا المسؤلية من بدري
مش بس البنات على فكرة
في يوم من الأيام مش هيلومك ابنك اما يبقى راجل شايل هم نفسه
و هيدعيلك انك صنعتي منه انسان واعي و متحضر و قادر على اتخاذ القرارات الصح
صدقيني هيدعيلك
