شويه أفكار ممكن تغير من قلقنا شويه

[Rena Jesus]

بنواجهه الفترة دي قلق وتوتر بسبب الاحوال الماديه المتلخبطه اليومين دول...
كتير مننا مترقبين وعلي اعصابها ...
هنعمل ايه في المصاريف .الاسعار غليت..ازاي هنقدر نتعامل مع الوضع ده.

شويه أفكار ثمرة مناقشات ممكن تغير من قلقنا وتساعدنا بشكل ايجابي وياريت اللي عنده افكار او حلول مجربه يشاركنا بيها.

1- الوعي بحجم الحدث اللي أنا فيه شخصيا.
في نغمه تشاؤم وشكوي متواصله ...فخلينا نكون واعيين بأبعاد موقفنا إحنا الشخصي..متعممش..ومتتبناش مشكله غيرك وتبتدي تشتكي وتقلق وممكن متبقاش مشكلتك اصلا.

2- ترتيب الأولويات...
اشوف ايه اولويات مصروفاتي دلوقتي واعيد ترتيبها واشوف ايه اللي هقدر ابدله او اتنازل عنه.

3- التواصل بشكل واضح وصريح مع أفراد الاسره
والاطراف المشاركه في نفس الوضع...نتكلم مع بعض تأثير اللي بيحصل علينا وايه الدور اللي كل واحد ممكن يقوم بيه ..وإيه اللي محتاجينه من بعض عشان نعدي الفترة دي.

4- تبادل المنفعه...
مش كل حاجه لازم نشتريها بالفلوس..كل واحد يشوف ايه الخدمه اللي ممكن يقدمها لحد وياخد مقابلها خدمه او مساعده تانيه...
ففي كل مجموعه اصحاب او عيله نشوف كل واحد يقدر يقدم إيه...مثلا لو انتي بتعرفي تدرسي وصاحبتك بتطبخ حلو.. ممكن تدرسي لولادها وهي تقدملك اكل في المقابل.

5- خلق اشكال واساليب جديده للدخل المادي...
زي شغل فري لانسر او اوبر وكريم او الصناعات اليدويه .

6-الاكثار من العطاء...
ومش المقصود عطاء المال بس..
دلوقتي في احتياج لصدقات تانيه كتير زي عطاء العلم (تعلم الناس العلم اللي عندك)..
عطاء الوقت(تساهم بجزء من وقتك في عمل خير او مساعده حد محتاجك)
عطاء عملك(شغلك اللي بتاخد عليه فلوس...تشتغله مع حد محتاج بدون مقابل)..
نفرز الحاجات الزايده عن احتياجنا ونديها لمستحقيها.

7- حفظ النعمه...
حفظ الموارد من الاكل والمياه والكهرباء وكل الموارد اللي تحت ايدينا ..منرميش اكل..
منسيبش المياه مفتوحه(في كل استخدامتنا وضوء وتنظيف) منسيبش نور مفتوح.

8- شكر وتقدير النعمه....
ندرب نفسنا نشوف النعم اللي في حياتنا..نلمس فضل ربنا علينا ..اسرة حوالينا..ذاكرة شغاله..حواس بتقدرنا نقوم بمهامنا..ونعم كتير حوالينا ..

10- نفكر نفسنا ان الوضع مش مستمر...
دايما في تغيير في الاحوال ...مفيش وضع ثابت.