كتير من البنات والسيدات في مجتمعنا اتربت على ان احتياجاتها بتيجي في المرتبه بعد...أي حاجه
بعد أهلها واللى شايفينه مناسب...
بعد زوجها وظروفه وطلباته...
بعد ولادها ومتطلباتهم..
فبالمعني الحرفي بتتعلم تدفن نفسها ورغباتها وأحتياجاتها...
بعد فترة بتفقد التميز أصلا وتستبدلها باحتياجات ورغبات التانين...
وتبقي زي ما هما عايزنها...
ولو سالتها سؤال مباشر انتي عايزة ايه...
هيكون معرفش..اللي هما عايزينه..اللي انت شايفه.
وبنقابل بعد شويه ان هما مش راضيين...
وتفضل تغير في نفسها وتتلون بمطالبهم وتدفن وتطمس نفسها الحقيقيه
بعد سنين تيجي تشتكى...أنا تعبت محدش عاجبه حاجه وانا خلاص طاقتي خلصت...
بتيجي دايما في مرحله ازمه بينها وبين زوجها...
او في مرحله طلاق او انفصال...
او مرحله كره الحياه وفقد لكل معاني الحياه وكله بقى شبهه بعض روتين معنديش اى نفس لاي حاجه.
ولان اللى ادفنت جوا مش هتسكت كتير...بتطلع تقاوم وتكسر الدنيا ....
يا بتطلع في شكل جبروت وغضب وعصبيه على كل حاجه وكل حد...
يا بتطلع في انسحاب تام من الحياه ومفرداتها و خطوات نحو الاكتئاب..
يا بتطلع في لفت مباشر للانتباه في شكل لبس او مكياج او اهتمام بزياده...
يا بتطلع في ادمان شغل او تليفزيون او شوبينج او اكل او حتي رياضه...
لازم الاساس اننا نطلع الشخصيه المدفونه جوا ...
الحقيقه الاصليه دي بكل مميزاتها وضعفها و تشم نفسها...تتسمع....تتطمن وتهدي....
تعيش من تاني وتظهر بكل الحق اللى اداهولها ربنا في الحياة..
اللى قادرة تعيش وتتعامل مع التحديات وتستمتع بالحياه وتبدع وتحط بصمتها في كل شيء...
اللى مش محتاجه حد يكملها...الواثقه من نفسها..
اللى قابله نفسها وشكلها بكل حاجه...الجميله في تفاصيلها
وساعات من كتر الطاقه اللى بذلتها في إرضاء الاخرين على حسابها ...
مبنلاقيش طاقه تستخدمها لنفسها...
لازم تبتدي الأول تشتغل على دي لحد ما تبقي مستقرة بعدها تبتدي تبحث وتدور وتنقب عن الكنز المدفون.
لكل البنات والسيدات أعرفى انتي عايزة ايه وعبري عنه بهدوء وبدون صدام...
متردميش ومتستسلميش اللى عايزين يردموا ويدفنوا نفسك....
في الغالب انتي اول واحده بتساعديهم.
اللى انتي عايزاه واللى هما عايزينه بنقدر نوفق بينهم كتير...
انتي بس اللى متخيله يا صدام يا استسلام..
لكل الأمهات والاباء والازواج....
اسمعوا وطبطبوا قبل ما تنفجر او تنسحب ...ونقابل العواقب.
