رسالة من شهيدة(كلمات جميلة)

[magy]

كتبت رساله على ورقه بالعاميه.
===========
"انا نازله الكنيسه وانتو تعالوا بعديه"
بخور باكر بتريحنى وحضرت كمان العشيه
من يبكر الىّ يجدنى ويشوفنى كمان زى المجدليه.
مافيش شئ يعطلنى..لا الشغله دى ولا الشغلانه ديه
محضره هدومى من بدرى.. تغطى من راسى لرجليه
دى الملايكه مغطياها جناحاتها أمام الهيبه الالهيه
مكنتش عارفه انى مش راجعه الضهريه
من بره بره بالطريقه ديه
اصلى من همى وشوقى لربنا كنت طالبه الموته ديه
ايه واخده من عيشه تعب من الصبح للمغربيه
لوم واهانات على تقصير واتهامات على كسل وتبذير
يمكن ف السما اسمع تقدير.. نعماً من فم القدير
وعظات بكل وسيله.. و برضه الهموم مش قليله
وأقول لروحى أهدى وأرسي...عدى وأنسى...
ألقاها من الغلا...ولا من مناهده البنت و"الولا"
من الزحمة وصعوبه الانتقال..ولا الخوف من النشال
من أخبار العنف والخراب. ولا الأمل اللى بقى سراب
نسيت ألمى وقت القداس ولقيت كلامه أغلى من الماس.
ولما سأل الكاهن فين قلبكم..قلت عنده وياريت اروحله قبلكم.
مشيت فى طابور طويل اخد الدم فى ماستير..
اتارينى هااقابل الملك زى ما قابلته أستير.
سمع طلبتى بعدها بساعه..ساعه خوف متألمه ومرتاعه.
صوت مدوى ماسمعتش صرختى..بس المهم انه.. كستنى هدمتى.
على أرض الكنيسه رقدت فى سكات..ولأول مره شفت فوقى أجمل ايقونات.

وفجأة قالى ملاك ألمك راح..
وصلتى مكان فيه الكل مرتاح.
كل اللى فاكراه أيقونة الآب..
طب ممكن توصل لأهلى جواب.
الأكل اللى بره فى التلاجه حطوه.
والغسيل قبل المطر ابقوا لموه.
والرز من الحصى لازم تنقوه..
والولد الصغير لما يرفس غطوه.
.وشعر البنوته قبل المدرسه ضفروه.
ولو سألوا الصبح عنى..قولولهم أبو اليتامى أحن منى.
أما أبوكم فأنا مسمحاه..حمله تقل ربنا معاه.

ولا اقولك ياملاك..مش مهم كل ده فانى..
وصل بس رساله لكل زوج انانى
حط مراتك فى عينيك..ندم الدنيا لو راحت مش هيكفيك.
ورساله كمان من العدرا لبناتها..الحياء والطهارة سر جمال ايقوناتها.
وقول للناس كفاياهم لهفه ورا كل حدوته
انا شايفه الأرض كلها من السما فاتفوته.

رساله باكتبها على ورقه بالعاميه
" انا طلعت السما وانتم تعالوا بعديه"
وماتنسوش تشكرولى الست ديه
كانت جايبالى فى شنطتها هديه

إمضاء
شهيده من شهداء الكاتدرائية

[Rena Jesus]

رووووووووووووووعه
ميرسى ربنا يفرح قلبك

[Mary Naeem]

ربنا يبارك حياتك

[walaa farouk]

ميرسي على مشاركتك الجميلة ماجى