ارحمنى يا ربى انا الخاطى

[Ramez5]

لا أحد يَعلم ما أصابك، لا أحد يَعلم كيف هي معركتك الخاصة مع الحياة، ما الذي زَعزَع أمانك، وقَتـل عفويتك، كم كافحت وكم خسرت، لا أحد يعلم حقًا مَن أنت.
جبران خليل جبران

الناس اللي حواليك مش بتشوف منك غير القشرة البرانية .. مجرد طبقة خفيفة من ع الوش .. علشان كدة دايما حكمهم بيكون مش مظبوط او ناقص او ملهوش اي علاقة أساسا بيك .. المثل بيقول " الناس ملهاش غير الظاهر "
الظاهر كان عشار بياخد أموال مش من حقه .. لكن اللي جوا القلب كان واحد تايب طالع فوق الجميزة علشان نفسه يشوف يسوع و لما يسوع راح بيته و وافق يدخل يتعشي معاه حصل خلاص للبيت ده .. لان يسوع كان شايف اللي جوا القلب مش اللي ع الوش .
الظاهر كان واحد فريسي عامل نفسه بيحب يسوع و عازمه جوا بيته و اول لما شاف ساكبة الطيب بتعيط علي رجلين يسوع ادان المرأة وأدان المسيح جوا قلبه .. ربنا شاف ساعتها قلبه و عِرف هو بيفكر في ايه رغم انه كان ساكت و اللي ع الوش مجرد صمت .
الظاهر كان واحدة سامرية جاية تشرب من البير وقت الضهر .. الظاهر كان ان المسيح جاي يكلم واحدة غريبة عنه والمفروض ميتكلمش معاها والتلاميذ لما شافوه استغربوا .. لكن المسيح شاف قلبها و كان عايز يروي عطشها و يشبع جوعها و يسدد احتياجها لانه عارف كل اللي جوا قلبها رغم ان اللي ع الوش كان سقوط وخطية و عار .
الظاهر كان واحد من رجالته .. ماشي معاه في كل وقت و امين للصندوق .. تلميذ من تلاميذه .. مصدق كلامه ومؤمن بيه .. لكن اللي جوا القلب كان طمع وخيانة و غدر .. ربنا شاف اللي جوا قلبه رغم ان لحد اخر وقت كان قاعد معاه بياكل العشاء الأخير .
انت مش شايف من اللي قدامك غير اللي ظاهر ع الوش .. لكن القلب متعرفش عنه حاجة .. متعرفش وجعه .. متعرفش معاناته ولا ألمه .. متعرفش صدقه من كذبه .. يبقي تعمل زي الكتاب ما قال :
„مَنْ أَنْتَ ٱلَّذِي تَدِينُ عَبْدَ غَيْرِكَ؟ هُوَ لِمَوْلَاهُ يَثْبُتُ أَوْ يَسْقُطُ. وَلَكِنَّهُ سَيُثَبَّتُ، لِأَنَّ ٱللهَ قَادِرٌ أَنْ يُثَبِّتَهُ.“
رُومِيَةَ 14:4
„وَاحِدٌ هُوَ وَاضِعُ ٱلنَّامُوسِ، ٱلْقَادِرُ أَنْ يُخَلِّصَ وَيُهْلِكَ. فَمَنْ أَنْتَ يَا مَنْ تَدِينُ غَيْرَكَ؟“
يَعْقُوبَ 4:12
ارحمني من اني ادين غيري .. خليني اشوف يارب الخشبة اللي ف عيني

ماريان عادل

[walaa farouk]

ميرسي على الموضوع الرائع رامز
ربنا يبارك خدمتك الجميلة

[Mary Naeem]

مشاركة جميلة جدا

ربنا يبارك حياتك

[Rena Jesus]

موضوع رائع
ميرسى ربنا يبارك تعب محبتك