المرحلة الفموية للطفل

[Rena Jesus]

الطفل بيحط الحاجات ف بقه، أي حاجة وكل حاجة وده هو الصح وهيفضل يستخدم بقه ف التعرف على الكون حواليه لغاية المرحلة الفموية ما بتخلص بامتلاكه حاسة تانية يقدر يستقبل\يرسل بيها (الكلام مثلا).

هنا ف المرحلة الفموية، حقيقة مطلقة إنك تؤمن إن الطفل بيتعرف على الحاجات بحطها ف بقه ، وانك بمنعه (كخ – الحق الواد هيحطها ف بقه شيلها من ايده) انت زي ال بيغمض عين حد بايديه، متخيل بتحدّ تطلّعه ومعرفته ازاي؟

هو ده ال بتعمله لما تمنع البيبي يحط الحاجات ف بقه.. لذلك دور الوالدين الوحيد الصحيح في المرحلة دي حاجتين:
1- التأكد من نظافة الحاجات ال بيحطها ف بقه
2- التأكد من عدم خطورتها أو إمكانية بلعه ليها وخد بالك بالك إن بق الطفل بيكبر، يعني الحجم الآمن للعب وهو عنده 4 شهور، هو حجم خطير وقابل للبلع وهو عنده 11 شهر، فلازم يحصل فرز شهري للعب.

لذلك ابتداءً من بلوغ الطفل 4 شهور ومرور أخطر مرحلة بسلام (اول 3 شهور)، لازم نفكها عليه شويه.. ولازم تعرف إن الطفل مش كائن غير مُدرك بيحط الحاجات ف عينه ويعور نفسه بكل حاجة يمسكها، ولو مسك سلسلة المفاتيح بتاعتك أول حاجة هيعملها إنه يخرم عينه بالمفتاح، لاء.. الطفل كائن محدود الإدراك آه، لكنه واعي!

مولود كائن السرعوف لو جيت تقرب صباعك من عينه هيغمضها عشان يحميها، هو سرعوف ولسه مولود وصغير آه، بس أجهزة جسمه شغاله لانه كائن حي، كذلك ابنك.. مثلا قولي صباع ايده الرفيع الصغير، مش بيحطه جوا عينه ويخذقها ليه؟!
عشان هو واعي، ولو افتراضًا جربت انت نفسك تحط صباعك ف عينه، هيقفل عينه فورا ويبعد عنك بوشه ولو كررت الفعل هيعيط ويصوت ويبتعد عنك بأي شكل.. ليه هو بيعمل كده؟ لانه واعي وعارف إن ده هيأذيه.

نفهم من كده انه مش هيخزق عينه بالمفتاح أول ما يمسكه. إمتى يعور نفسه بالحاجة؟ لو ماسك حاجة ووقع عليها وخبطت فيها وهو بيقع.. وده مش المفروض يحصل لإنك مراقب ومتابع وكل حاجة تحت اشرافك وانتباهك الكامل.

إذن الطفل يعمل ال هو عاوزه (بعيدا عن الحاجات الخطرة طبعا)، يتعرف على الموجودات بالشكل الطبيعي ال الفطرة محدداه في مراحل عمره المختلفة، كل ده تحت اشرافك ومتابعتك.
وخليك عارف إن ابتداءً من 6 شهور، الطفل لو واثق في نفسه وانت واثق فيه، ومعوده طول الشهور ال فاتوا انه يمسك أي حاجة حوالية بثقة يتعرف عليها ويقلبها ف ايده ويحطها ف بقه للتعرف عليها بهدوء وسلام من غير زعيق وشد منك وجذب وعياط ورفص منه، فهو طفل (وعيه بيتنامى تدريجيا بشكل متوازي مع نمو عضلاته)، يعني ايه الكلام ده؟

يعني ابنك من 6 شهور ل سنة ، لو مش متعود يمسك الحاجات حوالية، مثال نضارتك مثلا، وبلغ سنة من العمر، وقمت مرة واحدة مسكته النضارة بتاعتك، هيكسرها فورا، ليه؟
لان عضلات ايده أقوى من إدراكه، فمش هيعرف يتحكم ف ايده ونضارتك هتتكسر اثناء الاكتشاف، بينما لو وهو من 6 شهور، بيمسك نضارتك (ف الوقت ال عضلات ايده لسه ضعيفه متماشيه مع ادراكه)، فهو هيتعرف على نضارتك، هيقلبها ف ايده، هيحطها ف بقه، هيقراها ويبرمجها ويتعرف عليه ويكوّدها ف مخه.

شهر ورا التاني، الشهر التاسع مثلا، الاتناشر مثلا (البنات غير الاولاد) لما عضلات ابنك تقوى وتبقى قادرة على كسر النضارة، مش هيكسرها، لانه متعود عليها خلاص، مبرمجها ومتعرف على أكوادها ف مخه
وقيس ده على كل الحاجة التانية (غير الخطرة)..

- نأكد على كل اللى فات..
1- الطفل بيحط أي حاجة ف بقه عادي ودورك تأمينها ليها واكبر خطأ ممكن ترتكبه (وفقًا لكتب التربية) إنه تمنعه عن التعرف على الحاجات، بتربي إنسان ضيق الأفق محدود التطلُّع.

2- الطفل مش كائن منعدم الوعي هيقتل نفسه باول حاجة يمسكها، طالما كل حاجة بتحصل تحت اشرافك الكامل غير المنقوص ولو لثانية واحدة فكن مطمئن.

3- تعرُّف الطفل السابق على الحاجة (وقت ما كانت عضلاته لسه ضعيفه) بتتيحله فكرة كاملة عن التعامل الصحيح مع الحاجة، وده بيجنبك (اما عضلاته تبقى كبيرة) انه يتعامل بشكل خاطيء مع الحاجات، لإن وعيه كبر مع عضلاته والاتنين بقوا قد بعض.
لذلك..

الطفل لازم يكون واثق في نفسه، الثقة مش هتتأتى غير لما يتعرف ويُدرك الحاجات حواليه.. ثقته مش هتيجي غير لما يمد ايده على حاجة عينه شايفاها، فتتحطله ف ايده وانت واثق فيه، مش تشدها من إيده!
ثق ف طفلك.. لإن ثقته في نفسه مش هتجيله غير لما انت تثق فيه، الثقة دي هتتنقله وهيشب إنسان متزن واثق قادر على التعامل مع المحيط حواليه بثقة واحترافية.

كمان في حاجة، لما تبقى واثق في طفلك وهو واثق في نفسه، أما تمنعه من حاجة، هيمتنع عنها بهدوء، وده بيحل مشاكل كتير جدا حولين عدم سمعان الأطفال للكلام..
لذلك..
الطفل كائن ذكي بالفطرة، متحولوش لكائن غبي بالممارسة

[walaa farouk]

ميرسي على الموضوع المهم رينا

[Mary Naeem]

مشاركة جميلة جدا

ربنا يبارك حياتك

[Rena Jesus]

ميرسى لمروركم الغالى