تأملتك ياربى وانت وسط الجموع .. فى الهيكل شايف مكان مش للصلاة . للاسف مكان للبيع
فى وقتها حسيت انة بيحصل معانا ... قلوبنا من الخطايا مليانة .. وانا المشتريات ..
ابليس شغال علينا بيع فى كتير من المزادات ..
بيراهن ويقول .. دة خلاص خضع للملذات والشهوات ... عاوزاك ياربى تدخل وتقول .. ان هيكلك المقدس فيا محفور .. ومينفعش فى الهيكل اتباع وانا ملكك ياملك القوات ...
هيكلك يارب انت قدستة ... وانا بأفعالى وقساوة قلبى وخطيتى دنستة
تأملتك ياربى وانت داخل اورشليم .. وكانو ا الناس فرحانين مبسوطين
والجموع استقبلتك بزعف النخيل ... وقلوبهم فى سعادة وتهليل
ساعتها قولت لما انت ياربى دخلت مدينة .. الجموع كانت بتهتفل يافادينا
وانا .... انا اللى انت مالك على قلبى وكيانى .. ازاى قلبى ساكت مش بيحكى
مش بيحكى على الفرح اللى جواه .. والنعمة اللى دايما ساكناه
فى لحظتها عرفت واتأكدت .. انى انا ....
انا يهوذا الخائن .. لانى اهتميت بأمور العالم
انا الجلاد .. بخطيتى على ضهرك ضربتك بالسياط
انا المسمار . كل دقة بتنزل على ايدك نار .. ما انا اصلا غلطان
انا الحربة اللى المها صعبة . طعنتك فى جنبك وخرج دم ومية
انا الحبل اللى على ايدك ورجليك اتلف .. ودايما فى حياتى بدور والف
انا الشوك اللى جوة التاج ... لبستة ليك انت ياملك الارباب
وانا مســـــــــــــــــــــواش .. ومع ذلك حبتنى وفدتنى ... وبدمك يارب عزتنى وقوتنى
حب الهى كبير يارب ....... اتهنت واتعذبت وعلى الصليب اترفعت
ارحمنــــــــــــــــى ياربى وســــــــــــــامحنى ... ياملكــــــــــــــى والهـــــــــــــى خلصنـــــــى
