حوار بيني وبيني !!

[walaa farouk]

"يارب امنحني #السكينة لأقبل.. وامنحني #الشجاعة لأغيّر.. وامنحني #الحكمة لأعرف".
السكينة والشجاعة والحكمة.. يا ترى مين فيهم المفروض تيجي قبل التانية؟ هل لما أتغيّر هقدر أقبل نفسي بكل ما فيها، ولا لازم أقبلني الأول عشان أقدر أتغير؟ طيب والحكمة؟ إمتى وإزاي أحس إن عندي الحكمة اللي أقدر أشوف بيها الفرق بين الاتنين؟ وإزاي أقدر أحدد الفرق ده أصلاً؟
أسئلة كتير بتحاصرني وقت الضغط أو الخوف، ولما أفشل في إجابتها بحس إني تايه، وأرجع تاني أسأل نفسي من أول وجديد: أنا مين؟ أنا عايز إيه؟ ولغاية فين قادر أقبلني بكل ما فيّ؟ لغاية فين مستعد أضحّي وأقاوم وأتعب عشان أتغير؟ وقبل كل ده، هو أنا ليه عاوز أتغير؟
يمكن عاوز أتغيّر لأني مش قادر أقبلني؟ يا ترى القبول أصعب ولا #التغيير؟ أسئلة صعبة تطرح وراها أسئلة أصعب.. والاجابات تايهة وملهاش بر.
- طيب وآخرتها؟
- ملهاش آخر.. نجيب محفوظ قال الحقيقة بحث وليست وصول.
- يعني مفيش أمل؟
- مفيش بحث من غير أمل.
- بحث من غير وصول يساوي يأس.
- البحث في حد ذاته وصول.
- وصول لإيه؟
- لمعرفة الفرق بين اللي محتاج أقبله واللي أقدر أغيره.
- برضو لسه السؤال ملوش إجابة.. القبول أصعب ولا التغيير؟

#القبول لو مكانش ناتج عن رغبة حقيقية في التغيير يبقى استسلام.. والتغيير لو مكانش مبني على القبول يبقى تغيير مزيف ونَفَسه قصيّر. يعني الفكرة مش مين فيهم الأصعب، ولا مين قبل مين. القبول والتغيير مش مراحل بتعدي واحدة بعد التانية، القبول والتغيير بيكملوا بعض في كيان واحد ومسيرة واحدة، مسيرة مش سهلة أكيد، لكن الأصعب إني أمشي فيها وأنا مش واعي بمدى قبولي لنفسي، ولا صدق رغبتي في التغيير.
منتهى السكينة إني أقبل اللي مش قادر أغيّره، حتى لو كان هو أكتر شيء نفسي أغيره.
منتهى الشجاعة إني أعترف بعدم قدرتي على تغيير اللي محتاج أقبله.. وأواصل تغيير اللي أقدر أغيره.
يا رب ساعدني أتغير من غير ما أفقد قبولي للحاجات اللي مش هتتغير.

[Kerolos_Faik]

الرب يبارك تعب محبتك

[walaa farouk]

ميرسي على مرورك الغالى كيرلس

[Rena Jesus]

ميرسى ربنا يفرح قلبك

[Mary Naeem]

مشاركة جميلة جدا

ربنا يبارك حياتك

[walaa farouk]

رينا
مارى
ميرسي كتير على مروركم الغالى