- للأسف 😔 كل شوية واحد أعرفه يفركش خطوبته ، ومن أسبوع ، للأسف 😞 ، صديق عزيز عليا ، مسافر بره مصر من فترة ، طلق مراته اللي اتجوزها عن حب ، بعد ما خلف منها ولد..
👇👇
- المشكلة إن كل واحد فيهم كان مرتبط وخاطب عن حب ❤ وكل واحد فيهم مش لاقي سبب محدد للانفصال، محصلش مشكلة ضخمة، محصلتش كارثة يعني، كل واحد فيهم كان فاكرها مجرد خناقة وهتعدي، بس معدتش.. الطرفين سكتوا، بعد ما استنزفوا قدرتهم على العتاب.. سكتوا ومشوا من حياة بعض.
👇👇 ، اللي حصل هو تراكم لمشاكل وخلافات صغيرة ، متحلتش ، ومكنش فيه نقاش، وفجأة لقوا نفسهم مش قادرين يكملوا.. مع إنه أكد إنه مش مبسوط وهو لوحده، وبرضو لو رجعلها مش هيبقى مبسوط؛ فبيفضل وحدته.😔
👇👇
- واللي بأشوفها كل يوم في العلاقات الإنسانية اللي بتبوظ ، وتحديدًا العلاقات العاطفية ، بداية من الخطوبات اللي بتتفسخ، والعلاقات اللي بتبوط وبتفركش، وحتى الطلاق.. في معظم الأحيان مبيبقاش فيه مشكلة كبيرة، بيبقى فيه "تراكم".. تراكم خناقات صغيرة متحلتش، تراكم تصرفات بتضايق الطرفين، ومش قادرين يلاقولها حل.. مبيتكلموش، كل مرة الخناقة بتنتهي، من غير ما تنتفي أسبابها؛ والنتيجة إن نهايتها بتكون بداية لخناقة جديدة..
👇👇
- و زي ما أي علاقة بتتبني خطوة بخطوة ، برضو بتتهد خطوة بخطوة .. متبقاش ماسك فاس وبتهد في الشجرة بدأب وتصميم ، وتستغرب أوي لما تقع فوق دماغك! تكرار الإهمال والطناش/ التهديد بالبُعد كل شوية/ الهروب من تحمُّل المسئولية/ المقارنة بالغير/ التعايش مع النكد والخناق على إنه طبيعة العلاقة خلاص .. كل دي حاجات تقتل الحب ، وتقتل أي مشاعر طيبة بين أي اتنين مهما كانوا بيحبوا بعض.
👇👇
- النُضج مهم .. مهم للاستمرارية بشكل ميخليش العلاقة اللي أنت فيها حمل شايله على ضهرك ، ولا مجرد أمر واقع أو شيء اتعودت عليه .. واهتموا بتراكمات التفاصيل الصغيرة ؛ عشان دي اللي بتهد كل شيء في النهاية.
