اسئلتى وإجابات الله

[walaa farouk]

+ فى الايام الاخيرة تابعنا جميعاً اخبار انتقال وسفر عشرات من الاطفال والشباب والشابات الى السماء ... اعمارهم بين 3 سنوات ولا تتعدى العشرينات

منهم من سافر فجأة بدون اى سابق انذار ومنهم من سافر بعد حادثة او بعد صراع مع المرض
#فيلوباتير_شريف #ليديا_اكرم #ليديا_ولوجيستين_افرام #كريستين_منير #سالى_عطالله #جلورى_شوكت #انجى_شاكر #ماريز_سامح
وغيرهم كتير اوى مش هيكفيهم بوست واحد

والسؤال اللى بيشغل بالنا كتير .... لــــيه؟؟ ليه يارب سمحت بكده ... دول اطفال وشباب وشابات ... اديتهم لنا ليه لما انت هتاخدهم؟؟
على الرغم من لحظات التعزية اللى كنت باعيشها اوقات كتير بعد سفر ابنى لكن كانت بتيجى لحظات ضعف كتير والاقى نفسى بسأله ليه؟؟

ليه مسبتش ابنى شوية كمان؟؟
وكانت الاجابة ... طب وبعدين؟؟
+ وبعد ما اسيبه سنين كتير تانى ... كنت تضمن ان مكانه يكون الملكوت؟؟

- طبعاً لا يارب مكنتش اضمن.
- طب اديتهونى ليه من الأول؟؟
+ كنت باعته ليك عشان اقولك باحبك ... ولما اخدته كنت عايز اتأكد انك بتحبنى.

- يارب انت عارف انى بحبك بس ده ابنى!!
+ وانا قلتلك "من أحب أباً أو أماً أكثر مني فلا يستحقني، ومن أحب ابناً أو ابنة أكثر مني فلا يستحقني" ... انت ناسى انه بتاعى وانا كنت باعته عندك وديعة؟

- ايوة يارب بس دى تجربة صعبة اوى ... انا قلبى بيتعصر عليه ... بحبك وبحبه هو كمان ... مقدرش اقولك حاجة هو ملكك وابنك وانا وكل ما املك ملك ايديك ... بس برضه مش قادر استحمل ... الوجع شديد اوى.
+ ايوة يابنى حاسس بيك وعارف انك بتتألم.

- بجد يارب حاسس بوجعى وألمى ... طب انت فين؟؟ .. مش بترفع عنى الوجع ليه؟؟
+ يابنى انا باسمح بالألم فى حياتك عشانك انت ... عشان حياتك ... عشان انت تبقى اقوى واحسن.

- حياتى؟!! هى فين حياتى دى يارب ... ابقى اقوى؟؟ طب ازاى؟؟ ازاى هاكون احسن؟
+ يابنى انت باصص على حياتك على الأرض ... لكن انا باصص على حياتك الأبدية ... انت لما تقبل التجربة وتقبل انك تشيل صليبك بفرح ... مكانك فى الملكوت هيكون احسن ... اكليلك هيكون اكبر.

- ايوة يارب بس انا مش قادر....
+ لا هتقدر وانا معاك...

- ايوة يارب بس اوقات كتير باحس انك مش معايا!! وباتعب اوى....
+صدقنى يابنى بيتهيألك ... انا علطول معاك وساندك ... بس اوقات باسمح انى ارفع ايدى عشان انت تتعلم ... وباشوف هتقدر تستحمل ولا لأ...
فاكر لما كنت بتعلم ابنك المشى ... مش كنت اوقات بتسيبه يقع؟؟ ولما بيقع كنت بتسيبه يفضل واقع؟؟ ... انا باعمل معاك كده ... بانشف عضمك .. وبتأكد من حبك ليَّ

- ايوة يارب بس انا مش قادر.....
+ لو لوحدك مش هتقدر ... انت ناسى لما قلتلك "بدونى لا تقدرون ات تفعلوا شيئاً" ... لكن لو سندت عليَّ هتقدر ... ولما احس انك ضعفت خالص انا هاشيلك

- طب ما تفضل ساندنى وشايلنى علطول يا ابويا....
+ لا يابنى مينفعش ... يبقى عمرك ما هتتعلم ... وكمان هاتضيع إكليلك ... إكليلك بيتحدد على حسب جهادك وإحتمالك وصبرك وثقتك فيَّ.

- طب يارب ما انت كنت بتسند الشهداء وبتبعتلهم ملاك يشفيهم....
+ ايوة يابنى بس هما كانوا بيتحملوا آلامات وعذابات وبيتوجعوا وفى وقت معين كنت باجى أرفع عنهم ... وإلا مكانوش اخدوا اكاليل.

- يعنى يارب لازم الألم؟؟
+ أيوة يابنى ... وصدقنى عشان مصلحتك ... وكل ما تتعب افتكر المجد اللى مستنيك فوق ... وخليك فاكر ان إبنك فرحان عندى ... انا اخدت حتة منك للسما عشان انت تتعلق بالسما.

وده كان حوار دار بينى وبين ربنا من خلال وعوده اللى وعدنا بيها.
الحوار ممكن يكون محصلش بشكل ملموس عشان انا ماستهلش ان ربنا يكلمنى ... لكن انا حسيته والردود دى ربنا كان بيبعتهالى من خلال اب او اخ او صديق او كلمة قريتها فى كتاب ...
ده وعد ربنا لينا.
ساعدنى يارب اشيل صليبى بشكر وامشى وراءك عشان توصلنى لبر الأمان
ادينى يارب معونة اتحمل الوجع والألم .... وإدينى انى اعاين ملكوتك على الأرض هنا.

[Mary Naeem]

مشاركة جميلة جدا

ربنا يبارك حياتك

[walaa farouk]

ميرسي على مرورك الغالى مارى

[اوفا]

ربنا يعوضك

[walaa farouk]

ميرسي على مرورك الغالى اوفا

[Ramez5]

ميرسى على الموضوع
ربنا يبارك خدمتك

[MenA M.G]

موضوع مميز .. مشاركة رائعة
ربنا يبارك خدمتك

[walaa farouk]

رامز
مينا
ميرسي كتير على مروركم الغالى