من كتر ما بنسيب ونتساب في العلاقات، ونقرب شوية وبعدها نزهق.. ومن كتر ما الموضوع بقى سهل ومنتشر.. وبقى الطبيعي انه "اشطة انا فركشت.. أنا زهقت.. أنا بخاف من الالتزام.. أنا غيرت رأيي".. بقينا ندخل العلاقات وعاملين حسابنا انها كدة كدة هاتخلص.. وأن المشاعر دي مهما كانت قوية ماهي الا مشاعر مؤقتة، والشخص اللي معايا ده ماهو الا محطة في حياتي هتاخد وقتها وتمشي.
والغريب بقى دلوقتي انه الحُب الطبيعي اللي بيكمل للآخر بقى حاجة غريبة أوي علينا.. حاجة شبه مستحيلة كدة، نُبصلها من بعيد نتحسّر.. لأنها بتفكرنا بفشلنا ونفسنا القصير في العلاقات.
فا اللي حاصل دلوقتي انه احنا ولا بقينا مرتاحين في العلاقات السريعة، ولا قادرين على الحُب اللي بجد. وكأنها دايرة مُفرغة مابتخلصش.
ولأننا برضو بنستسهل في العلاقات، بقى الطبيعي اننا نمشي في النُص، نمشي لما نزهق، أو نتساب لما اللي قدامنا يزهق (على حسب مين اللي زهق الأول).
الحل من رأيي في كلمة واحدة.. "العهد".
الالتزام والاخلاص.. الحفاظ على العلاقة حتى لو عدت بوقت صعب..
حتى لو مزاجي اتقلب..
حتى لو مبقتش مُتحمس وعندي نفس الطاقة بتاعة الاول..
واللي بحسه فعلاً، أن الحُب اللي بيكمل ده مش حاجة بتلاقيها أو تنزلك من السماء وأنت وحظك بقى تلاقيه او متلاقيهوش، الحُب ده علاقة بتبنيها.. وكل يوم بتختار انها تنجح.. وبتحارب (حتى نفسك) عشان تنجح.
الحب_مش_بالساهل
الحل_هو_العهد
