اتخطبت كتيير

[Rena Jesus]

نشرت فتاه مشكلتها على احدى صفحات الفيس قائله
اتخطبت كتيير
رابع مره اتخطب واكتشف اني مش هاقدر اكمل معاه ، فعلا مليان عيوب زي التلاته اللي قبله ،
صدقني انا مش باتبطر ، بس بجد عيوبهم اصعب من اني اتعايش معاها ،
والغريبه ان ماما المره دي واثقه اني صح و شايفه عيوبه ،
لكن مصممه اني اتجوزه علشان شكلنا الاجتماعي وبتقولي الناس تقولي عليكي ايه لما تنخطبي كل يوم وتفشكلي ،
وبتحلفلي انه هايتغير بعد الجواز ، انا بجد مخنوقه وخايفه اكمل ، بس برضو خايفه اكون غلط .

الرد :
بوسيلي ماما وقوليلها سيبي البت تفشكل احسن ما ترجعلك بعد 9 شهور مضروبه وبعيلين كمان ،
قوليلها يا ماما مافيش حد بيتغير بعد الجواز ، بالعكس كلنا ف الخطوبه بنظهر اجمل مافينا ،
يعني دي احلي صوره للمنيل خطيبك ، وزي مابنقول دايما مافيش بني ادم خالي من العيوب ،
بس الفيصل هو قدرتنا علي تقبلها والتعايش معاها او لا ،
لو اتجوزتيه علشان خوفك من كلام الناس تبقي دخلتي في مأساه الجواز الاضطراري او الهروبي،
اللي نتايجهم معروفه ،

قولي لماما الخطوبه اتعملت علشان البنت المحترمه تكتشف صفات العريس جوا بيت ابوها مش علي الكافيه ،
وعادي جدا جدا انها تتخطب خمسين مره لحد ما تلاقي العريس المناسب ،



ولا انتوا ايه رأيكم؟؟؟؟؟؟؟؟؟؟

[marit jesus]

انا رايى كدا برضو
مستوى اجتماعى ايه وكلام فاضى ماتهتميش بالشكليات والظاهر اهتمى بالاشياء الداخلية
الشكليات مش هاتنفعك بعد ماتتجوزىه وتتعبى طول عمرك وتفضلى تتدفعى تمن الغلطة دى مدى حياتك

[dodo dodo]

اه فعلا عندك حق
وبعدين ع رأى البابا شنوده
فك الف خطوبه ولا فك جوازه

[Mary Naeem]

سيبك منك مادام مليان عيوب
وربنا اكيد هيبعتبك نصيبك
وسيبك من الشكليات

[Rena Jesus]

ميرسى لمروركم الغالى