محدش بيتغير بعد الجواز

[Rena Jesus]

اللي عينيه زايغة قبل الجواز .. هاتفضل زايغة بعده
واللي بيحب العَك قبل الجواز.. هايفضل يعُك بعده
والأناني قبل الجواز.. هايتعب ويتعِب اللي معاه بعده
والشكّاك قبل الجواز.. هايخلي حياة اللي معاه جحيم بعده
واللي بيزهق كتير قبل الجواز.. هايزهق أكتر بعده
والدكتاتور في قرارارته قبل الجواز.. هايبقى مُتحكم أكتر بعده
والبخيل.. واللي بيعمل الف حساب للناس.. والمُتقلب.. والبارد في مشاعره..
واللي بيمد ايده.. واللي مابيعرفش يتكلم.. والمرتبط بأهله ارتباط مريض..
وعديم الشخصية.. والسطحي.. للاسف كل دول هايفضلوا زي ما هُما بعد الجواز..

من الاخر بقى.. محدش بيتغير بعد الجواز.. محدش بيتصلح عشان ارتباط..
اللي بيتغير بيبقى عشان نفسه الأول، ومن غير ضغط أو سبب خارجي.. ل
انه لو المؤثر خارجي.. التأثير هايبقى ضعيف ومؤقت وهاينتهي بانتهاء المؤثر..
فترة الحُب أو الخطوبة مثلاً.. ويرجع الشخص لطبيعته بعد الجواز.

فا لو اللي معاك فيه عيوب أنت مش قابلها،
اركن خيالك الرومانسي واحلامك الرهيبة في التغيير على جنب، واقبل انه مش هايتغير بعد الجواز..
أو امشي من دلوقتي.
والسؤال دلوقتي مش هو.. "أغير شخصية اللي قدامي ازاي؟"،
لكن.. "هل فعلاً هاقدر اعيش بقيت حياتي مع الشخصية دي ولا لأ؟".
ولو الاجابة لأ.. إبعد، لأنه مش هايتغير.

لو أنت فيك عيب قاتل للعلاقات، ارجوك إلحق نفسك قبل ما تظلم حد معاك..
أو كمل بمرضك ياسيدي لوحدك أنت حُر..
مش لازم تنشره في أسرة جديدة وتطلّع عيال مشوهة نفسياً بسببك..
لو أنت مريض او عيوبك قاتلة ومش ناوي تتغير لنفسك.. ماتتجوزش، وقف التشوّه عندك..
مش ناقصين بيوت خربانة وشباب متدمر.. لأن الجواز في الحالة دي مش حل، ده هايزود المشكلة أكتر.

[walaa farouk]

ميرسي على مشاركتك الجميلة

[marit jesus]

فعلا عندك حق يارينا
ميرسى على موضوعك الجميل

[Mary Naeem]

موضوع مميز

شكرا يا قمر

[Rena Jesus]

ميرسى لمروركم