كن إيجابي

[Marina Greiss]

الهدف:
مدخل مناقشة لموضوع بعنوان "كن إيجابي".


اللعبة:
لاعب الاولاد ماتشين كرة لمدة قصيرة من الوقت:
- في الماتش الأول، وزع اللاعبين على مواقع محددة. اصدر قانون إن كل لاعب يلتزم بمكانه، مايتحركش منه (يفضل مستني لما الكرة تجيله؛ ممكن في بعض الأحيان يتدخل الخدام لتحريك الكرة لو لزم الأمر).
- الماتش التاني ماتش كرة عادي، و ممكن للاعبين الحركة عادي جدا.


اسئلة للمناقشة:
- إحكيلنا عن الماتشين.
- حسيت بإيه في الماتشين؟ إيه الفرق ما بينهم؟
- أنهي ماتش استمتعت بيه أكتر؟ تفتكر ليه؟
- طيب بره الماتش، تفتكر المبادئ دي ليها معنى أكبر؟


توضيح هدف اللعبة للخادم:
في الماتش الأول، بيشعر اللاعب أنه مقيد.. مافيش في ايده كتير يعمله. اخره بيتمنى الكرة تجيله في إتجاه معين أو بينادي على غيره علشان يحاول يوصلها له.
في الماتش التاني، اللاعب حر و قادر إنه يجري في إتجاه الكرة ويحركها في الاتجاه الصح (إتجاه الجون).
حياتنا زي الماتش: الحقيقة ان احنا عايشين في ماتش رقم 2.. ربنا إدانا مواهب وحرية. اوعى تكون فاكر انك في ماتش رقم 1.
يا ترى إنت مقيد نفسك و فاكر ان دورك مش مؤثر؟ "لا تقل إني ولد" اوعى تستهين بقدراتك والوزنات اللي ربنا ادهالك. خليك إيجابي، واتحرك ناحية الهدف.