ما لا تعرفه عن السوشي

[Mary Naeem]

ما لا تعرفه عن السوشي

عتقد لو عرضنا سوا طريقة عمل السوشي هتفهموا المكونات اكتر وهتعرفوا قد ايه هوا صحي وأكلة بسيطة أوي بس فيها فن ورقي ومخ نضيف.

أعتقد ان السوشي مش زي أي أكلة جديدة بناكلها برا السوشي لايق جداً يتعمل في البيت ويطلع حلو جداً كمان لانه سهل ومفيهوش تركات صعبة لو عملته كذا مره وعملته صح هتقدر تطلعه حلو ببساطه لان لا في صوصات مثلا معقدة ممكن تفلت منك أو قوامها ميظبطش أو درجة السواء ولا هي خبيز محتاج دراسة وفن وناس شاربة المهنة عشان متطلعش وحشة.

الموضوع بسيط

لو عرفت تجيب المكونات (وهي سهلة تجيبها ) وتنفذ الخطوات هتطلع بنتيجة مرضية بس الأهم تعمله وانت حابب تعمله وعندك الشغف.. الأكل أياً كان بيعتمد على «النفس».

لو حابيين نعمل سوشي في البيت نجيب المكونات منين وازاي؟

المقال ده هيقولك

أولاً في تلات أنواع رئيسية وتقليدية والمشهورة للسوشي
النيجيري، الساشيمي ولفائف الماكي

هنتعلم ازاي نعمل أسهل واحد فيهم واللي لايق يتعمل في البيت كبداية وفي تنوع كبير وتقدروا تتفننوا فيه وتعملوه على ذوقكم.

هنبدأ بالماكي Maki rolls

المكونات:

-نوع السمك يا سالمون ني، يا تونة نية، يا صوابع الكابوريا الصناعية، يا جمبري كبير مقلي ( زي ما تحبوا فننوا )

-رز السوشيsushi rice

( رز السوشي طبعاً بيدي نتايج أحسن بس غالي شويتين وبيتباع عادي عندنا، بس معلومة معظم مطاعم مصر اللي بيقدموا سوشي لو مش كلهم بيستخدموا الرز المصري لأنه بيشبهه كتير لانه حبة صغيرة برضه فا استعملوه انتوا كمان )

-أعشاب بحرية غير مملحة «seaweed nori »
( طبقات كدا ورقية خضرة بيتعمل بيها السوشي )

-خل رز rice vinger

(بيتباع في أزايز زي الخل العادي شفاف بس لونه أصفر )

-سكر

-ملح

-نوعين على الأقل خضار ( خيار، افوكادو، جزر )

(اللي جايين دول اختياري مش شرط )

-صوص صويا soy sauce

-جنزبيل مخلل pickled ginger

-وسابي wasabi

-كافيار من أي لون ونوع للتزيين

- سمسم للتزين

الطريقة:

١-بنختار السمك لو مثلاً صوابع الكابوريا الصناعية «على سبيل المثال عشان أسهل حاجة ممكن نجيبها والأسهل لو عايزين بس تجربوا جيبوا علبة تونة نوع السمكة الباكور أنضف حاجة في السوق».
وبناخد مثلاً الخيار والجزر كخضار وطبعاً النوري أو أعشاب البحر

٢-بنغسل كوبايتين الرز لحد ما يبطل يعكر المياه وتبقى المياه صافية.

3- بنحط الرز في حلة مبتلزقش ونحط مياه ونبتدي نسلق الرز من غير زيت ولا زبدة ولا أي حاجة لحد ما تغلي المياه وبعدين نوطي النار على الرز لحد ما يتشرب كل المياه بس نحاسب ميتلسعش -

٤- نخلط خل الرز مع السكر ورشة الملح

٥- بنسيب الرز يبرد خالص ويهدى وبعدين نصب عليه الخليط بتاع خل الرز والسكر وبنفضل نقلب فيه لحد ما يتماسك كدا و(يبقي ملزق شوية بس نحاول منغرقش الرز ( على كيس الرز كوباية خل عليها ربع كوباية سكر ورشتين ملح ونقلب كويس

٦- هنبتدي بقا نجيب ورقة الأعشاب البحرية ( النوري ) على الوجه الخشن ونحط الوجه الناعم تحت على الحصيرة الخشبية ونبتدي نبل ايدينا بالمياه ونفرش الرز على النوري بالتساوي نسيب حته من الأطراف منحطش عليها رز من جانب واحد عشان يلزق لما نلفه في الآخر.

٧- هنعمل خط بايدينا كدا في نص الرز أكننا بنغرس ايدينا فيه بس بالراحة عشان نحط في الخط ده قطع خيار مستطيله متوسطه الرفع وزيها أفوكادو أوالجزر وقطعة مستطيلة برضه من الكابوريا الصناعية أو التونة اللي اتفقنا عليها «معئنها مش بتتقدم في المطاعم بالشكل ده بس عشان نجرب» المهم بنحط قطع التونة مع الخضار في النص في الخط اللي حفرناه بشويش.

٨- بنبتدي نلف الحصيرة لحد ما تعدي الخضار والتونة وبعدين بنرجع تاني بالحصيرة بس ونجيب الرول تاني عند أول الحصيرة ونلف لفة كمان وبعدين آخر لفة بناخد الرول كله وهوا خلاص اتلف لآخر الحصيرة ونتبت عليه بايدينا ونخليه شكله متناسق كا رول مستطيل وعشان يلزق في نفسه جامد.

٩- بنجيب سكينة حامية جداً جداً ونقطع بيها الرول ده لـ٤ أو ٨ قطع على حسب عايزينه رفيع ولا تخين والأحسن واحنا بنقطع نقطعه الأول لنصين وبعدين نقطع كل نص لاتنين أو أربعة زي ما نحب عشان يبقوا متقطعين بنفس السوا السوشي لازم يبقي شكله حلو ومتناسق.

جربوا تعملوا كام رول واتعلموا أول واحد هيطلع مبعجر مش مشكلة التاني هيطلع أحسن وهكذا وغيروا كمان الحشو ممكن تضيفوا جبنة كريم تشيز في كذا نوع في السوق ممكن مايونيز ممكن جمبري مقلي بدل التونه أو الكابوريا وطبعاً التونة النية أو السالمون الني من السوبر ماركتس الكبيرة.

١٠- قدموا الرول بعد ما يتقطع في طبق مستطيل شيك وجنبه الجنزبيل ومعجون الوسابي والصويا صوص في طبق صغير أوي وطبعاً عيدان الأكل واللي مش ييعرف يتسعملهم، ياكل بأيده.

دلوقتي فاضل تعرفوا هتجيبوا كل ده منين

الفا ماركت أو مترو ودول فروعهم كتيرة، بس أنصح بالفا ماركت فيه اختيارات أكبر وكمان فيه سالمون ني بتاخد الوزن اللي انت عايزه تمن الكيلو ١١٨ جنيه.

للي عايز كواليتي أعلى ممكن فروع محل جورميه بس غالي جداً للي حابب.

كل المعدات والمكونات اللي ذكرت فوق دي من المحلات دي ومتوافرة وأسعارهم حلوة مش غالية زي مانتوا ممكن تتخيلوا.

وطبعا الخضار من أي حتة.

وبالهنا