نص وكواليس التصريحات التي رد بها الفنان خالد أبوالنجا
تنشر «المصري اليوم» نص وكواليس التصريحات التي رد بها الفنان خالد أبوالنجا، على سؤال للصحيفة حول مهرجان القاهرة السينمائي، خلال لقاء قصير انعقد على هامش المهرجان.
وانتقد «أبوالنجا»، في تصريحاته، توقف المهرجان لعامين، وأرجع سبب ذلك لما سماه «التفكير الأمنجي»، والذي اعتبر أنه سيكون سببًا في «ضياع البلد»، وأنه «السبب في انتهاك حقوق الإنسان بتهجير سكان الشريط الحدودي في سيناء»، متوقعًا أن «الناس سيرددون هتاف ارحل قريبًا بعد الفشل في أداء مهام ما بعد التفويض».
«المصري اليوم»: ما رأيك في مهرجان القاهرة السينمائي هذا العام، خاصة وأن البعض بيوجه انتقادات شديدة جدًا له؟
«أبوالنجا»: «أول سؤال كلنا اتسألناه المهرجان بعد عودته، وإننا لازم نقف جنب المهرجان بعد عودته. أنا أسف جدًا، أنا أسف جدًا هو وقف ليه؟ أنا مش عايز اتكلم عن عودته، أنا عايز اتكلم ليه وقف».
أحد الحضور: بسبب الأحداث اللي كانت بتحصل..
«أبوالنجا» (مقاطعًا): «وهو مفيش أحداث النهاردة؟ فيه أحداث. يبقى إذن اللي وقف المهرجان ده، حد في الآخر مش مقدر إنه لو أنت عايز تثبت البلد دي الحالة الأمنية فيها صح، فأنت تعمل المهرجان وتعرف إزاي تأمنه، فاللي لغى المهرجان حد لازم ندور عليه، مين اللي أخد القرار ده، لغاية دلوقتي أنا مش فاهم مين اللي أخد القرار ده، ده حد لازم يتحاكم، (ضاحكا) عسكريًا».
واستدرك «أبوالنجا»، وسط ضحكات الحضور وتعقيبهم على فكرة المحاكمة العسكرية لمن اتخذ قرار وقف المهرجان: «لأ طبعًا أنا مقصدش عسكريًا، مفيش حد المفروض يتحاكم عسكريًا، أنا بهزر. الفكرة أنه التفكير العسكري الأمني ده هيودينا في داهية، ألغي المهرجان يا عم مش مهم طز البلد بتضيع».
وعقّب «أبوالنجا»: «لو فكرنا كده البلد هتضيع والمهرجان هيروح، عشان من الآخر خالص هو ده التفكير اللي هيخبطنا في الحيط، هو ده التفكير اللي هيخلي العيال تتهجر من بيتها في سيناء ويضيع حق من حقوق الإنسان، مينفعش أنت تعمل كده علشان تأمن البلد، مش من حقك، (ضاحكًا بسخرية) لو أنت مش عارف تأمنها من غير ما تاخد حقوق الناس، يبقى أنت مش عارف تبقى في مكانك، سيبه».
«أبوالنجا»: اللي عايز أقوله في الآخر، إن التفكير الأمني أو الأمنجي بالطريقة دي هو أخطر ما يمكن يواجهنا في هذه البلد، بيلغي مهرجانات وبيهجر الناس من بيوتها، ده انتهى، إحنا عملنا ثورة علشان نلغي ده، لما كلنا كده نتخوف ويحصلنا إرهاب إن لأ البلد هتضيع لأ الحقونا، يبقى أنت مش عارف تعمل مهمتك، أنت أخدت تفويض من الشعب علشان تأمن في شهرين، إحنا بقالنا 8 شهور، وياريت قدامك عدو ذكي، ده أنت قدامك المتأسلمين دول أغبى ما شفنا في حياتنا، حاجة عجبة، يعني مفيش حاجة بيعملوها إلا لما بتكره الناس فيهم، ومش عارف تعمل شغلك؟! إذن هذا انتهى.
«أبوالنجا»: «أنا رأيي إن الربيع العربي والثورات العربية قالت حاجة أسمى من كده بكتير جدًا، وهي إن إحنا لا يمكن نخاف ومن حقنا إن احنا نختار، وبيتهيألي إن وصلنا دلوقتي إننا نبتدي نفهم إنه لو أنت مش قادر تعمل مهمتك، أه إحنا خايفين على البلد وقلبنا على البلد، بس ده مش معناه إنك تقول لي أنت خاين علشان بقول أنت لازم تمشي وحد تاني يجي بدالك قادر يقوم بده، أنا أسف جدًا، أنت مش قادر تقوم بده، أمشي أرحل، هنقول تاني قريب تاني شكلنا».
وتعرض «أبوالنجا» بسبب تلك التصريحات لـ«المصري اليوم»، لهجوم حاد من عدد من الإعلاميين والسياسيين، بلغ حد تقديم بلاغ ضده، الإثنين، للنائب العام يتهمه بـ«الخيانة العظمى».
المصدر
المصري اليوم
