|
 |
 |
 |
|
رقم المشاركة : ( 1 )
05 - 04 - 2014, 04:38 PM
|
|||||||||||
|
|||||||||||
|
هو الرجل مبقاش رأس المرأة ولا ايه ؟؟!!  كانت السادسة مساء حين دق جرس الباب ليعلن وصول أبونا هدرا في أول زيارة لمرثا و ريمون .. كان الاثنان في انتظار الزيارة منذ فترة اذ انهما تربيا سوياً على يد أبونا هدرا وهذه أول زيارة لأبونا بعد شهرين من الزواج في بيتهما الجديد و ابتدأ ريمون بالكلام " أبونا احنا لازم نعمل دورات للخدام .. محدش فيهم عارف حاجة في الانجيل .. يعني عندك مرثا مثلاً .. أمينة خدمة ولا تعرف حاجة خالص في الانجيل ..كل حاجة أقولها عليها تقول لي ازاي تأخد القرار لوحدك و تبقى عاوزة تتدخل في كل قرار أخده ..بذمتك يا ابونا هو مش الانجيل قال .." قاطعته مرثا " بلاش كل حاجة تقول الانجيل ..ربنا ادانا عقل و أنا زيي زيك ولازم نفكر سوا مش انت اللي تأخذ القرارات " ضحك ريمون و قال " يا بنتي الانجيل بيقول " الرجل رأس المرأة " اعترضي على كلام ربنا بقى !! " " أكيد فيه حاجة تانية و فيه مليون آية بتقول ان البنت زي الولد عند المسيح " فقام ريمون بسرعة و أحضر الانجيل ليفتحه على الآية فوراً اذ كان يضع عندها علامة خاصة كبيرة .. و ابتسم أبونا هدرا حين وجد تحت الأية عدة خطوط بألوان مختلفة حتى انها محت الايات المجاورة لتبدو كأنها الآية الوحيدة في الصفحة .. ثم ابتسم ريمون اذ اطمأن ان الاية لسة موجودة و قال لأبونا " ما تقول حاجة يا ابونا هو الرجل مبقاش رأس المرأة في الزمن دة ولا ايه ؟؟!! " فضحك أبونا هدرا و قال له " أنا لو منك .. أحاول أخبي الأية دي من الانجيل خالص .. أو أشيل الاصحاح كله و عمري ما أخلي مراتي تقرأه " ريمون مندهشاً " ليه بس ..دة فيه كل المصلحة " أخذ أبونا هدرا الانجيل من ريمون و قرأ " لان الرجل هو راس المراة كما ان المسيح ايضا راس الكنيسة و هو مخلص الجسد (اف 5 : 23)...ثم أغلق الانجيل و قال " انت طبعاً فرحان ان الرجل رأس المرأة ..لكن عمرك ما كملت الآية لتفهم يعني ايه " كما ان المسيح ايضا راس الكنيسة و هو مخلص الجسد " عاوز تبقى رأس المرأة .. تعال شوف مسيحك ازاي بقى رأس الكنيسة .. ازاي اتعرى على الصليب علشان هي تبقى متزينة بالبر .. ازاي عطش في الجبال علشان يغني كنيسته بجسده و دمه .. ازاي كأن يأخذ رأيها في كل حاجة زي ما كان يسأل فيلبس قبل اشباع الجموع يعمل ايه و يديله المشورة ويشجعه على التنفيذ .. ازاي كان بيصلي ليالي كل الأيام في الجبال للآب علشان خاطر (عروسه ) كنيسته تبقى واحد فيه ومعاه .. ازاي لما كنيسته ( متمثلة في أمنا العذراء ) في عرس قانا الجليل طلبت رأي و هو مش موافق تنازل عن رأيه تماماً و نفذ رأيها طالما لا يوجدبه خطأ .. ازاي وضع نفسه للألم مكان كنيسته و فدية عنهم ..و لما كان في البستان طلب ان كنيسته ( التلاميذ ) يمشوا من البستان و يقبضوا عليه هو بس ... ازاي لما كنيسته مقدرتش تشيل معاه حمله الثقيل بسبب ضعفها و انكرته مع بطرس أخذها في حضنه تاني و سامحها و حسسها انها أحلى حد في الدنيا .. ازاي كان بيثق فيها انه سلم الكنيسة مسئولية خلاص العالم وصعد للسماءومعندوش اي خطة احتياطية غير انه يعتتمد على كنيسته الضغيرة انها تغير العالم ..و عروسته كانت قد المسئولية .. ازاي انه عمره ما تسلط عليها ولا أجبرها حتى على قرار واحد من باب انه رأسها ..بل حتى قرار انها تتركه (مثل الابن الصال ) تركه لها و ظل في الانتظار .. ازاي كا بينفرد بكنيسته كل يوم بعيد عن العالم على الجبال أو في البحر و يقضي وقت معاها خاص يتكلموا بس فيه سوا و يناقشوا ويسألوا كل حاجة .. ازاي اهتم بيها في أقصى لحظات ألمه و هو على الصليب انها لا تكون محتاجة لشئ .. ابتسم ابونا هدرا حينما راي ريمون تسللت دموعه و قبل يد زوجته كأنما يعتذر لها عما سبق .. فأعطاه ابونا الانجيل قائلاً " مسيحك عمره ما تسلط .. عمره ما انفرد بقراراته .. المسيح تراس علينا بالصليب .... الاصل في الرئاسه هو ابوة ...من اراد ان يكون فيكم عظيما فليكن خادما للكل ..عمره ما اعتد برأيه بل كان يضع رأي كنيسته قبله انت محتاج تقرأ كل ده علشان تفهم يعني ايه مسيح و كنيسة قبل ما تطلب انك تبقى راس الكنيسة .. و اوعى تطلب تكون رأس ..قبل ما تبقى الأول زي المسيح " 
|
 |
| أدوات الموضوع | |
| انواع عرض الموضوع | |
|
العرض العادي
