البسى بذكاء تبقى اجمل ( نصايح عن الازياء )

[Mary Naeem]

البسى بذكاء تبقى اجمل ( نصايح عن الازياء )

مش عارفه ليه حبيت اعمل موضوع عن الازياء والموضة وكده يمكن بسبب حبى للازياء والاكسسوارات بشكل عام ( ده غير انى ساعات بعمل الاكسسورارت بنفسى فى البيت )

المهم خلينا نبتدى ببعض الحاجات اللى عايزة اشاركو بيها


1- اعرفى ان مفيش بنت وحشة فى المطلق انما فيه بنت بتعرف تظهر جمالها وتلبس صح وبنت مش بتعرف


2- متجريش ورا الموضه وخلاص لان مش كل الموضة او اللى منتشر ممكن يليق عليكى ويبقى شكله حلو عليكى لان ده بيعتمد على حاجات كتيرة , منها شكل جسمك ,طولك , لون بشرتك


3- خلى عندك ثقة فى نفسك لان ده بينعكس على مظهرك


4- خليكى بسيطة فى اختيار اللبس والمكياج لان الجمال فى البساطة مش البهرجة



5- خلى دايما عندك حاجات basic فى اللبس بتاعك زى بنطلون جينز شكله حلو و بنطلون اسود يمشى على كل الالوان والبس


نيجى بقا لبعض الحاجات اللى عايزة اعلق عليها :


1- البنطلون الجينز ال skinny يعنى الحقيقة البنطلون اسمه skinny , يعنى رفيع معنى كده انه معمول للبنات الرفيعين ومفيش عندهم زيادات فى اى مناطق معنى كده ان لما تلبسه بنت وزنها زايد شوية بيبقى شكلها مش حلو ابدا ابدا حاولى تبعدى عن ال skinny لو جسمك زايد شوية ( مش قصدى اقول حاجة عن الممتلئات بس البنطلون ال skinny بيتخنك زيادة اصلا لانه معمول للنحيفات اصلا )



2- الوسط الساقط , بصراحة انا مش بحبه ومش عارفه ايه لازمته فى الحياة
خلى بالك مش اى واحدة ينفع عليها الوسط الساقط , النحيفات واللى مش عندهم زيادة فى منطقة البطن ( لانها ممكن تكون نحيفة بس عندها زيادة فى المنطقة ديه ) هما اللى بينفع عليهم الوسط الساقط , ده غير ان الوسط الساقط لوحدة بيضغط على القولون وبيخليه يتنفخ وبيعمل بطن من غير داعى وبيبقا شكله وحش فعلا ده غير ان فعلا لو طولك قصير الوسط الساقط بيقصر اكتر



3- red lipstick الروج الاحمر بقا منتشر اوى اليومين دول وخصوصا الاحمر الدم , خلى بالك هو طالع موضه اه لكن مش اى واحدة ينفع عليها اللون ده بنات قليلين جدا اللى بينفع عليها اللون ده لانه صارخ جدا ولو حطتيه وهو مش لايق عليكى هيخلى شكلك شبة البلياتشو للاسف



4- توحيد اللون , متلبسيش ابدا لون موحد , يعنى مثلا مش تلبسى كل حاجة لونها احمر على بعض كأنك وقعتى فى كاتشب ولا اسود على بعض
لازم تكسرى اللون بحاجة


, تكسرية بأكسسوار لونه مختلف او شنطة لونها مختلف



5- اكذوبة ان الشنطة والجزمة لازم يكونو لون واحد , الكلام ده مبقاش دلوقتى خالص ومينفعش مع البنات الشابات ينفع مع تيته وماما هما اللى يلبسو الشنطة والجزمة لون واحد
انما للشابات الاجمل دلوقتى انهم يكونو لونين مختلفين عن بعض بس طبعا مش يكونو لونين ضاربين اوى ضد بعض يعنى يكونو بردو الى حد ما متوافقين مع بعض
الشنطة والجزمة يكونو متوافقين فى حالة السهرات مثلا
والافضل يكون عندك جزمة لونها nude اللى هو لون الجسم ده او شنطة نفس اللون لان الون ده بيمشى مع اى الوان تانية من الشنط او الجزم



6-بردو الشنطة والجزمة مش شرط ابدا يكون ليهم علاقة بالوان
اللبس يعنى مش علشان لابسه بلوزة صفرا لازم تمسكى شنطة صفرا شكلها بيبقا ممل جدا , الاجمل هو لخبطة الالوان بس تكون الوان متناسقة مع بعضها بس فى نفس الوقت مش موحدة لان الالوان الموحدة بتديكى مظهر ممل وكبير فى السن



7- المكياج الصارخ فى الصبح , المكياج التقيل او الصارخ ( ده لو بيليق عليكى ) ده وقته بليل مش فى الصبح والشغل
مينفعش مثلا تحطى ماسكارا تقيلة جدا الصبح وانتى رايحة الشغل يفضل الوان ترابيه هادية الصبح علشان الالوان الصارخ وال smokey eye الصبح مع ضوء الشمس ممكن تخلى شكلك يبقا زى البهلوان



8- اللبس الضيق اوى والفضفاض اوى , متلبسيش لا ده ولا ده اللبس الضيق اوى وخصوصا لو جسمك مليان بيخلى العيوب كلها تبان وبيركز اكتر على عيوب الجسم
والفضفاض اوى بيخليكى تبانى مليانه حتى لو رفيعه
البسى what fits you المقاس الصح على حسب وزنك وشكل جسمك

هرجعلكو تانى لو افتكرت حاجة