"ليه يا رب ؟ " .. " ليه يا رب ؟ " .. "

[نصيف خلف قديس]

"ليه يا رب ؟ " .. " ليه يا رب ؟ " .. "

ليه بيحصللِّى كده ؟ اشمعنى أنا " عبارات قلتها كتير .. وانتظرت أكثر ولكن للأسف : لا إجابة
لقيت ربنا بيقوللّى : أجاوبك بتاع إيه ؟ وأجاوبك ليه ؟ .. هوه فيه علاقة شخصية بينى و بينك علشان أجاوبك ؟!؟ ... اللى بيني و بينك عامل زى الشارع الـ one way .. شارع اتجاه واحد .. من تحت لفوق بس .. شارع مابتمشيش فيه غير عربيّات ماركة : " طلبات " و ماركة " تظلمات" ، و كل فين و فين لمَّا تمر فيه عربية ماركة : " تشكرات " … !!! لأنك لمّا بتقعد قدَّامى ( ده لو قعدت أصلاً ) بتقول الكلمتين اللى عندك وبتجرى ... مابتستنّاش علشان تسمعنى عايز أقولّك إيه أو عايز منك إيه .
سَكتّ .. هاقول له إيه ؟ .. ما هى دى الحقيقة .. أنا على طول مشغول و ورايا 100 حاجة .. وما بفتكرش ربنا إلاَ لما تحصللّى مصيبة ! .. وقتها باصرخ وأقول له : " إلحقنى " و " ليه يارب ؟ " إلى آخر قائمة الشكوى و الاعتراض ... مع إن على العكس ، لما بيدِّينى عطية ، ماباقولش " ليه يارب ؟ " و يا افتكرت أشكره ، يا مفتكرتش !
فى وقت ما ، زادت علىَّ الضغوط جداً
.. وحصللّى زى ما بيقول الكتاب :
" هكذا قال الرب : أُضيِّق عليهم لكي يشعروا " . أرميا 10: 18
وشعرت فعلاً إني لازم أعيد حساباتى مع نفسى … دلوقت أمامى طريقين وقائدين مالهمش ثالث :
(1) طريق إبليس . (2) طريق الله
* بالنسبة لطريق إبليس : كلنا عارفين إن مافيش أسهل من إن الواحد يعمل الخطية !!… ده حتّى عم بولس قال : " حينما أريد أن أفعل الحسنى ، أجد الشر حاضر عندى" رومية 7: 21تخيَّل لما بولس نفسه يقول كده !! يعنى أنا مش لوحدى فى الخيبة دى ..
طب و القائد فى الطريق ده . اسمه إيه ؟ اسمه : (1) الشيطان : يعنى المقاوم … مقاوم لكل عمل روحى بيعمله الله فى وسط شعبه . (2) إبليس : يعنى المشتكى .. ينصب لك الفخ .. ولما تقع فيه .. يروح يشتكى عليك عند الله ! (3) الكذَّاب و أبو الكذَّاب : يعنى ما يقولّكش حاجة صح أبداً … ده غير أسماء تانية كتير … من ضمنها : الشرير ، القتَّال ، المجرِّب ، عدو الخير ، رئيس سلطان الهواء ، رئيس سلطان هذا العالم … مش بس كده .. ده من بجاحته .. تبقى ماشى وراه .. و على قد ما يقدر يذلَّك ويبهدلك !!
فى طريق إبليس : ذل و بهدلة و نكد.
طب و بعد الموت ؟
بعد الموت .. بعيد عنك … هاكون فى مكان فيه حريقة ليل نهار … و مافيهوش مصلحة مطافي تِطفِّي … لأن مافيهوش مصلحة مياه أصلاُ ( يعنى مش هلاقى ميه أبل بيها ريقى)بالنسبة لطريق الله :
الكتاب بيقول : " ما أضيق الباب و أكرب الطريق الذى يؤدى إلى الحياة ، وقليلون هم الذين يجدونه !" متى 7: 14
يعنى الشخص اللى هايمشى فى الطريق ده ، لازم يكون سوبر مان علشان يقدر يقول للخطية :
" لو اتنططِّى قدَّامى … مش هاعملك برضه !!"
طب أروح فين أنا ولاَّ أعمل إيه ؟ … ده أنا باقول للضعف : " قوم وأنا أقعد مكانك …" يعنى حتى يا رب لو أنا اخترت طريقك … مش هاعرف أمشى فيه.
لقيته بيقوللى : لا يا حبيبى ، الموضوع مش متوقِّف عليك أنت … ضعيف ولاَّ قوى ، لأن : " الخطية خاطئة جداً " رومية 7: 13" مش بس كده … ده التقرير الإلهى صدر بإن :
" الجميع أخطأوا و أعوَزهم مجد الله " رومية 3: 23
افتح كتابك المقدس واقرا يوحنا 15: 5
"أنا الكرمة وأنتم الأغصان. الذي يثبت فىّ وأنا فيه، هذا يأتي بثمر كثير، لأنكم بدوني لا تقدرون أن تفعلوا شيئاً."
واخد بالك في كلمة " بدونى " بعد النون فيه إيه ؟ .. " الياء " دى بتعود على المسيح .. يعنى بدون المسيح ، أنت ولا هتصد ولا هترد !.. لكن لما هتبطّل تمشى بدماغك ، وتسلمنى حياتك .. هتقدر تقول مع عمّك بولس : " أستطيع كل شئ فى المسيح الذى يقوِّيني. " فيلبى 4: 1
لأن وقت ما هتسلِّم حياتك للمسيح ، هو اللى هايخلِّيك تمشّى جسدك بالطريقة اللى تليق بواحد من أولاد الله لكى " لا يستحى بهم الله أن يُدعَى إلههم. " عبرانيين 11: 16 ، و هاشبَّعك و أفرَّحك .. و هتقدر تقول :
دوسي يا نفسي بعز... على كل المغريات (قضاة 5: 21 )
يمكن ظروفك ما تتغيّرش.. لكن إنت اللى هتتغيّر … واللى كان بيسعدك وقتياً زمان .. أصبحت تنفر منه الآن … وهتلاقي روحك إن إنت مابقتش إنت … بقيت واحد تانى … واحد جديد :
طب و القائد فى الطريق ده … اسمه إيه
الاسم الأول : " المحبه "
لما بحث الناس عن كلمة يخبروا بيها عن طبيعة الله اختاروا كلمة " المحبة " : ( الله محبة )
" ليس لأحد حب أعظم من هذا : أن يضع أحد نفسه لأجل أحبائه ". يوحنا 15: 13 " هكذا أحب الله العالم حتى بذل ابنه الوحيد لكي لا يهلك كل من يؤمن به بل تكون له الحياة الأبدية ." يوحنا 3: 16
- معلش يا رب .. أنا عايز أقولّك إن إنت أكيد بتحب بس اللى بيحبّوك ... اللى عايشين لك .. اللى مش بيقولوا لك زيّى : كان نفسى أصلّى و أقرا في كتابك ، لكن أعمل إيه ؟ .. مافيش وقت !…
وإنت مافيش فيك حاجة عِدلة تتحب … بحبك
وأنت مدينى ظهرك ومشغول عنى … بحبك و مستنّيك بكيت....
وكل يوم
نطلب من يسوع ان يجعلنا بالحب نعرف كم هو مقدار الحب المقدم لنا منه
فحب يسوع هو كل الحب

[بنتك يايسوع]

بجد جميل اوووووى اووووى
موضوع اكتر من رااااااائع
ميرسي ليك جداااااا

[نصيف خلف قديس]

شكرااااااااااااا...........اختى

لمرورك الجميل وردك الاجمل

ربنا يبارك حياتك وخدمتك

[Mary Naeem]

موضوع رائع جدا
ربنا يفرح قلبك

[Ebn Barbara]

توبك جمييل جدا استاذ نصيف
ربنا يباركك

[حمامة السلام]

ربنا يبارك فى خدمتك

الجميلة ويفرح قلبك دايما

[نصيف خلف قديس]

[رمانة]

مشاركة مميزة الرب يباركك

[نصيف خلف قديس]

شكرااااااااا........ربنا يبارك حياتك وخدمتك

ويعوض تعبك كل بركة