هتولدى قريب و بتجهزى حاجة البيبى ؟؟ خدى بالك من الحاجات دى

[Marina Greiss]

مستلزمات رعاية البيبى


و هانتكلم فيه عن :

1- سرير البيبى Baby crib و ما يتعلق بأماكن نومه




2- كرسى السيارة Car seat و ما يتعلق بأمانه فى السيارة




3- عربة البيبى baby stroller و ما يتعلق بأدوات انتقاله




4- المشاية Baby walker و ما يتعلق بحركته




5- كرسى إطعام البيبى baby feeding chair و ما يتعلق بطعامه








طبعا مش لازم كل أم تجيب كل الحاجات دى
ده بيبقى حسب احتياجها و ميزانيتها
و عادى جدا ممكن تستغنى عن بعضهم او حتى كلهم

يتــــــــــــبع

[Marina Greiss]

- سرير البيبى Baby crib و ما يتعلق بأماكن نومه



طبعا ف الاسابيع الاولى بعد الولادة .. بيكون اسهل للأم ان البيبى ينام جمبها ع السرير
لانها بتبقى تعبانة و مش هاتقدر كل شوية تقوم تشيل و تحط البيبى
ف لو الام خايفة انه ينام جمبها لاحسن لاقدر الله تخبطه ولا حاجة
ممكن تكتفى بمرتبة صغيرة جمبها ع السرير زى دى



و لما يكون البيبى نايم تقفل عليه الناموسية كده



و بالتالى لو اتقلبت و هى نايمة و ايدها جت عليه ولا حاجة مايبقاش فى مشكلة


بعد شهر ولا شهرين بتكون الام خلاص اتعودت على مواعيد نوم و صحيان البيبى
و هى نفسها بتكون استردت صحتها الحمد لله
وقتها ممكن تفكر تجيب سرير منفصل للبيبى
ممكن تخلى السرير ف اوضتها او تحطه ف اوضة تانية براحتها

اشهر انواع سراير البيبى
هى النوع الخشبى ده و بيسموه Baby crib




ده لو هاتجيبيه تخلى بالك ان

1- الفتحات اللى بين الخشب دى ماتكون ضيقة اوى بحيث البيبى لو دخل ايده بينها تتحشر ولا واسعة اوى بحيث البيبى مايعرفش يدخل راسه ولا جسمه منها

2- المرتبة اللى هاتتحط فيه مايبقاش فى فرق بينها و بين جوانب السرير بحيث البيبى و هو بيتقلب مايقعش فيها
و فى ملحقات جاهزة بتيجى مع المرتبة بتحيط جوانب السرير عشان نتجنب المشكلة دى




3- جوانب السرير تكون مربوطة ف بعض كويس مش مفككة بحيث مايكونش فى فراغ الطفل يحط صباعه فيتحشر فيها او يتعور
و دى بنخلى بالنا منها خصوصا لما يعدى فترة ع استعمال السرير
و فى شركات تغلبت ع المشكلة دى بإنها عملت تصميم دائرى من السرير بدل المستطيل
زى ده كده





4- ارتفاع جوانب السرير ما يكونش اقل من ثلاث ارباع طول البيبى على الاقل
عشان لما يقف فيه مايكونش عرضة انه يتقلب منه
و هاتلاقى النقطة دى واضحة ف الصورة اللى فاتت
و كل ما البيبى يطول تنزلى مستوى السرير اكتر

5- مكان السرير
يكون بعيد عن الشباك بمسافة كافية ان البيبى مايطولوش
يكون بعيد عن اى اسلاك البيبى ممكن يطلع ايده و يشدها
يكون بعيد عن ترابيزة مثلا البيبى يقدر يزق اللى عليها او ياخد من عليها حاجة يحطها ف بؤه


النوع التانى من السراير بيسموه Baby cradle
بيبقى شبه الخشب بس هزاز
زى كده



ده - ف رأيى الشخصى - مش عملى اوى
مش هايفيد الطفل غير فترة قصيرة ف الاول اللى هو بيبقى ع طول نايم فيها
لكن بمجرد ما يعرف يتحرك و يقف هايبقى خطر عليه الا لو فيه خاصية انك توقفيه تخليه ما يتمرجحش
ده غير انه مش بمستويات تقدرى تغيريها بما يناسب البيبى


بعد ما البيبى يكبر شوية و يعرف يزحف و يطلع و ينزل من ع السرير
هيحتاج يكون فى السرير فتحة صغيرة يخرج و يدخل منها زى كده


و ف نفس الوقت ماشلناش الحاجز الخشبى بالكامل لسة
عشان لما يتقلب و هو نايم ما يقعش لاقدر الله


فى نوع تانى من السراير مشهور دلوقت شكله كده



ده بيبقى baby bed + baby play yard ف نفس الوقت
يعنى سرير و مكان للعب البيبى
و فى قطعة بتتزود فوق ده لتغيير الحفاض

و فى منه بيتطبق و يتفرد عشان ما ياخدش مساحة و سهل تنقليه ف اى حتة





و بيبقى فيه فتحة لدخول و خروج البيبى لوحده

[Marina Greiss]

- كرسى السيارة Car seat و ما يتعلق بأمانه فى السيارة



ده هايبقى مهم للى عندهم عربية
خاصة لو الام هى اللى هاتسوق و خارجة بالبيبى لوحدهم مش معاهم حد
و ف بعض الدول اصلا القانون بيلزمهم بإن الكرسى ده يكون موجود والا يتعاقبوا
بس الحمد لله احنا ف أم الدنيا مصر مفيش اى مشاكل

المهم

لما هتروحى تشترى كرسى سيارة هاتلاقيه يسألك عن وزن البيبى
" الوزن اهم من السن لان مش كل البيبهات اللى أد بعض ف السن بيبقو أد بعض ف الوزن "

و هاتلاقى ان كراسى السيارة متقسمة تلات اقسام

1- المواليد لحد 13 كيلو
و لو بالسن هايبقى لحد سنة



2- من 9 كيلو لحد 18 كيلو
بالسن هايبقى من 9 شهور لحد 3 سنين و نص تقريبا



3- من 15 كيلو لحد 36 كيلو
بالسن هايبقى من 3 سنين لحد 12 سنة



و دول كلهم هايختلفوا فى حجم الكرسى و ف طريقة وضعه ف السيارة

مثلا بتاع المواليد لحد 13 كيلو
بيتحط ضهره للسواق و وشه لمؤخرة العربية
زى كده





و ده على عكس المعتقد الشائع ان كرسى البيبى بيتحط عادى وشه قدام و ضهره ورا
و الوضع ده هو الآمن لانه بيوزع تأثير الصدمة على الكرسى بطريقة افضل



مع الوضع ف الاعتبار
ان لو العربية فيها نظام الوسادة الهوائية يبقى مش هاينفع تحطى كرسى البيبى ف الكرسى اللى قدام جمب السواق
هايتحط ف الكراسى اللى ورا بس

بعد كده لما البيبى يكبر شوية بيبقى الكرسى اكبر و بيتحط بالطريقة العادية
زى كده





امتة هتحتاجى تجيبى كرسى اكبر للبيبى ؟
لما البيبى يكبر بحيث بداية أذنه من فوق تعدى ضهر الكرسى
لكن مش مشكلة تكون رجله اطول من الكرسى عادى


طيب ازاى تشترى الكرسى المناسب ؟

- و انتى رايحة تختاريه هتاخدى البيبى و العربية معاكى عشان تجربى الوضع كامل هايبقى عامل ازاى
- الكرسى يكون مناسب لسن و وزن الطفل و مريح ليه
- الكرسى مناسب لعربيتك و سهل تحطيه و تشيليه
- طول حزام الامان ف عربيتك مناسب لحجم الكرسى و هايمسكه كويس
- لو فى اوضاع للنوم و الجلوس مثلا جربيها شوفى سهل تحوليها ولا لا



فى حاجات تانية موجودة عشان أمان البيبى غير كرسى السيارة
زى المراية دى



لان البيبى هايبقى ضهره للأم ف المراية دى تخليها تبقى شايفاه و مطمنة عليه

او لو البيبى قاعد بوشه عادى بس ف ضهرها ممكن تستخدم مراية زى دى


و حاجة تانية
ده استيكر بيتلزق ع العربية من ورا بيقول ان فى بيبى ف العربية
ف العربيات اللى وراكى تاخد بالها و ماتخبطش فيكى ولا تتنرفز انك ماشية بالراحة مثلا
كده يعنى




و دى شبكة عشان تحمى الطفل من الشمس




و ماتنسيش تجيبيله لعبه يتلهى فيها عشان مايعيطش كل شوية و يلهيكى عن السواقة
و تكونى محضرة رضعات مثلا او اى حاجة بيحتاجها البيبى

[Marina Greiss]

- عربة البيبى baby stroller و ما يتعلق بأدوات انتقاله


دى بتهم اكتر الامهات اللى بتخرج بالبيبى كتير و تعمل شوبنج ف المول و كده
لكن لو ست بيت مش بتخرج غير كل فين و فين ممكن ماتحتاجهاش اوى

و انتى بتشترى عربية البيبى هتاخدى بالك من ايه ؟؟

1- انها تكون واقفة مستوية ع الارض مش ناحية نازلة و ناحية طالعة
2- جربى لو علقتى عليها الشنطة من ورا هاتفضل ثابتة و لا هاتقع
لانك بعد كده ممكن تبقى معلقة الحاجة و تنسى و تشيلى منها البيبى تقول العربية مقلوبة ع طول
3- العربية اللى تعجبك جربى تمشى بيها شوية جوة المحل شوفيها مريحة ليكى ولا لا
4- لو فى فرق ف الطول بينك و بين زوجك يبقى افضل تجيبى العربية اللى ايدها فيها مستويات بتطول و تقصر
عشان تبقى مريحة ليكو انتو الاتنين
5- جربى تمشى بيها بسرعة اكبر شوفى رجلك هاتخبط ف العجل بتاعها ولا كله تمام
6- اتأكدى انك تقدر تحودى بيها بسهولة عشان ماتعملكيش مشاكل ف الاماكن المزدحمة
7- لو بتتطبق و تتفرد جربى بنفسك شوفي سهل تتطبقيها و تفرديها ولا صعب
8- شوفى لو حجمها و مساحتها و هى متطبقة و مفرودة مناسبة ليكى ولا لا


دلوقت هانشوف انواع عربيات الاطفال

1- العربات خفيفة الوزن Lightweight Strollers



دى ميزتها انها خفيفة فى الوزن و صغيرة فى الحجم و مش بتاخد مساحة و هى متطبقة
ف حلوة للى بيخرجوا و يسافروا كتير و مناسبة جدا للخروجات زى المول و الاماكن الزحمة

فيها باسكت من تحت تحطى فيه مستلزمات الطفل
و فيها شمسية تحميه من الشمس

يعنى تعتبر النوع الاقتصادى الموفر اللى بيجمع بين الامكانيات و الفلوس

2- العربيات التقليدية



دى بتبقى اكبر و اتقل
و لما بتطبق بتاخد مساحة اكبر
فى منها انواع بيبقى فيها امكانية انك تطبيقها بإيد واحدة
و فى منها بموسيقى
ممكن تبقى اصعب ف الاماكن المزدحمة

3- عربات الركض Jogging Strollers



دى عشان بعيد عنكو و عن السامعين الامهات اللى بتمارس رياضة الجرى
تجرى ازاى الست و معاها الواد يعنى ؟؟ ف عملولها عربية مخصوصة بعجلات كاوتش
و فيها فرامل بأة و حركات كده
مالناش دعوة بيها

4- عربة طفل + كرسى سيارة Travel system



ده بيبقى طقم مع بعضه
كرسى السيارة بيبقى ليه قاعدة بتتثبت فى العربية و بيتركب عليها الكرسى و يتشال بسهولة بدل كل مرة نقعد نربط احزمة الامان و كده
و لما بيتشال الكرسى بيتركب على عربية البيبى بسهولة
يعنى مش محتاجين نشيل البيبى نفسه عشان نحطه ف العربية بتاعته و كده
ده طبعا بيحتاجه الناس اللى بتخرج كتير و تبقى مستعجلة ف شيل و حط البيبى
او الناس اللى عندها عربية بدل ما تجيب كرسى سيارة لوجده و عربية لوحدها تجيب الطقم ع بعضه

5- عربية لاكثر من طفل
سواء توأم او حد اكبر من حد
ف حسب السن هاتجيبى المناسب

[Marina Greiss]

- المشاية Baby walker و ما يتعلق بحركته




دى مش هاتكلم عليها كتير

لان اخصائيين الاطفال قالوا ان مالهاش اى ميزة للطفل
بالعكس
الطفل اللى بيستخدم المشاية بيتأخر ف المشى شهر تقريبا عن الطفل اللى مش بيستخدمها
ده لانه بيعتمد على قوة اندفاع المشاية مش على عضلاته هو

ثم ان تعلم المشى و الحركة عند الطفل بيتطلب انه يشوف رجله و الجزء الاسفل من جسمه و هو ماشى
و ده مش بيبقى موجود ف المشايات اللى بيبقى فيها صينية قدام البيبى كده

ده غير المخاطر اللى ممكن تنشأ عنها
خصوصا لو مفهاش فرامل بتوقفها لو كان السطح اللى البيبى واقف عليه غير مستوى
ان البيبى مايقدرش يوقفها و يخبط ف حاجة
او لو فى سلم ينزلق عليه لاقدر الله

[Marina Greiss]

- كرسى إطعام البيبى baby feeding chair و ما يتعلق بطعامه




الطفل لحد 6 شهور من عمره مش بياكل حاجة غير لبن الام
لكن من اول ما يبدأ ياكل الاطعمة الصلبة .. بتبدأ الفوضى و البهدلة
و بيكون كويس انك تعوديه على مكان و نظام معين للاكل
مش تجرى وراه ف كل حتة بالطبق و يقع ع الارض و الكلام ده


ايه اللى ناخد بالنا منه و احنا بنشترى كرسى الطعام ؟

1- حزام الامان يكون بيتقفل كويس و تقدرى تضيقيه و توسعيه حسب الطفل

2- لو الكرسى بعجل لسهولة التنقل ، يبقى نتأكد ان فى فرامل عشان لو سبتى الطفل لوحده ف الكرسى و اتحرك جواه الكرسى مايجريش بيه

3- يكون بيطول و يقصر حسب الرغبة
لان ساعات هتحبى تأكليه و انتى واقفة و ساعات و انتى قاعدة
فيكون فيه اوضاع مريحة ليكى

4- يكون سهل التنظيف
لان وارد جدا كل اكله يقع نصها برة الطبق
ف الكراسى المتبطنة بقماش مش بيتفك دى كلها شهر بالكتير و هيبقى منظرها فلة شمعة منورة
فى حين البلاستيك هايتنضف بسهولة بعد كل اكلة لو حبيتى



دلوقت هنشوف مع بعض انواعه و مميزات و عيوب كل نوع

1- الكرسى التقليدى Standard high chairs




ده اشهر نوع

مميزاته :
1- أرخص من الانواع التانية
2- اخف ف الوزن
3- لما بيتقفل بياخد مساحة اقل مقارنة بالباقى و بالتالى سهل التخزين

عيوبه :
1- مش هاتقدرى تعدلى طوله
2- مفهوش امكانيات تانية هو كده شكله ثابت





2- الكراسى متعددة الامكانيات Multi-functional high chairs



مميزاته :
1- فيه امكانية تعديل الطول و درجة ميل الكرسى
ف هيناسب ان انتى او بنتك او زوجك تأكلوا الطفل
او حتى الطفل ياكل لوحده لما تعمليه على اقصر مستوى
2- فيه امكانيه انه يتطبق و يتفرد
3- مش اغلى كتير من النوع الاول

عيوبه :
1- ممكن يبقى تقيل
2- بياخد مساحة ف مش مناسب لو المكان مش واسع





3- الكراسى المتحولة Convertible high chairs





دى كراسى تستخدم لحد سن معين ككرسى طعام و بعد ما البيبى يكبر شوية تتحول تبقى كرسى عادى

مميزاتها :
1- الطفل بيحس انه كبر و بقى ليه الكرسى و الترابيزة الخاصة بتوعه ف ياكل بسعادة اكبر
2- لو هو من النوع الخشبى ممكن يبقى قطعة ديكورية ف الشقة و يستخدم ف حجرة الطفل عادى

عيوبه :
1- مش كل الانواع بينفع تطبق و تتفرد
2- بعض الانواع ممكن تبقى صعبة ف الفك و التركيب
3- اغلى من الانواع الباقية





4- الكراسى المحمولة Portable high chairs




يعنى كرسى بيتركب على اى كرسى سواء ف البيت او ف المطعم او اثناء زيارتك لاى حد او فى اى حتة

فى منه قماش


او بلاستيك


او نوع بتثبت على الترابيزة نفسها بدل الكرسى


مميزاته :
1- بيغنيكى عن كرسى البيت العادى بالاضافة انه مفيد ف الخروج
2- بيتطبق ف مساحة صغيرة جدا
3- خفيف الوزن ف سهل تشيليه ف اى حتة

عيوبه :
لو هاتشتريه للخروج بس مع وجود واحد تانى للبيت يبقى انتى كده بتضيعى فلوسك
غير كده مالوش عيوب تقريبا

[حمامة السلام]

تسلم الايادى
على الموضوع المميز

[Marina Greiss]

ميرسى ياايرو على مشاركتك الحلوة