قصة يشوع ومعركة أريحا "اسكتش"

[Marina Greiss]

الشخصيات: الراوي – يشوع – الله – الكهنة – الجنود



الراوي: لما الله بيوعد بمعجزة بيحققها، وكل إللي علينا نعمله هو إننا نتبع تعليماته.
يشوع وكل شعب إسرائيل إكتشفوا كده في معركة أريحا

يشوع: يارب،مدينة أريحا حواليها أسوار ضخمة جداً وسميكة، والبوابات مقفولة كويس
وعليها حراسة مشددة

الله: يا يشوع، أنا هاديلك مدينة أريحا كلها وكمان أنا هاسلمك الملك بتاعها وجنوده بين إيديك

يشوع: طب يارب إحنا المفروض نعمل إيه؟

الله: لف حوالين المدينة أنت والجنود إللي معاك مرة واحدة وإعمل كده لمدة 6 أيام،وهات 7 من الكهنة ويكون معاهم أبواق مصنوعة من قرون الخروف، الكهنة دول هيكونوا ماسكين الأبواق ورا التابوت. وفي اليوم السابع لف حوالين المدينة 7 مرات وفي اليوم ده خللي الكهنة ينفخوا في الأبواق وإنتوا بتلفوا. ولما تسمعوا صوت البوق قول للناس كلها يصرخوا بصوت عالي، وسور المدينة هايقع وكل الجيش هايدخل المدينة

يشوع: حاضر يا رب، هانعمل إللي أنت أمرت بيه

يشوع: يا كهنة، روحوا جيبوا تابوت عهد الله، إحنا هانلف حوالين أريحا بالتابوت وعايز سبعة منكم يمسكوا الأبواق قدام التابوت

الكهنة: إحنا هانعمل إللي أنت بتقولنا عليه يا يشوع

يشوع: يا جنود، إنتوا هاتتحركوا وهاتلفوا حوالين المدينة.شوية منكم هايمشوا قدام التابوت وشوية هايكونوا وراه. والتابوت لازم يكون محمي بيكم كلكم

الجنود: حاضر يا يشوع

يشوع: ماتهتفوش هتاف الحرب وماتعلوش أصواتكم ، محدش يتكلم طول اليوم ... أنا هاقولكم تهتفوا فتهتفوا


الجنود : حاضر يا يشوع

الراوي: وعمل الجنود زي ماتقالهم بالظبط، لفوا حوالين أريحا لمدة سبع أيام وبعد كده يشوع قالهم

يشوع: إحنا المفروض نلف حوالين مدينة أريحا لمدة 7 أيام و في اليوم السابع سبع مرات وإنهاردة لفينا 6مرات دلوقتي إحنا هانلف حوالين السور مرة كمان لكن المرة دي الكهنة هاينفخوا في الأبواق

الكهنة: حاضر يا يشوع هانعمل كده

يشوع: اهتفوا يا جنود، الله اداكوا المدينة اهتفوا للرب

(صوت البوق- صوت هتاف عال) (صوت السور وهو بيوقع)

يشوع: يا شعب إسرائيل، الله إدانا مدينة أريحا. خلينا نسبح الله, يا رب إحنا عملنا إللي أنت قولتنا عليه ومدينة أريحا بقت بتاعتنا... إحنا هنخصص المدينة دية للرب.

الله: أنا هاكون معاك يا يشوع

الراوي: لو عايز تقرا وتعرف أكتر عن يشوع ومعركة أريحا وإزاي يشوع قاد شعب إسرائيل للأرض إللي ربنا وعدهم بيها. كل ده موجود في سفر يشوع في العهد القديم في الكتاب المقدس.