وجود السلام بيفتح باب نقدر نشهد بيه عن الله 💜

[walaa farouk]

وَاطْلُبُوا سَلَامَ الْمَدِينَةِ الَّتِي سَبَيْتُكُمْ إِلَيْهَا، وَصَلُّوا لأَجْلِهَا إِلَى الرَّبِّ
، لأَنَّهُ بِسَلاَمِهَا يَكُونُ لَكُمْ سَلاَمٌ." (إرميا 29: 7)
كتير مننا سمع الآية دي 👆🏼 في اجتماعات صلاة على إنها دعوة للصلاة عشان البلد.
فكرت قبل كده هل ده كان المعنى الأصلي للآية؟🤔
الناس اللي اتقالهم الكلمات دي في أول مرة ماكانوش مواطنين عايشين في بلدهم.
دول كانوا أسرى!
شعب الله كانوا في السبي بعيد عن أرضهم..
بعيد عن الهيكل، عايشين في وسط شعب مش بس غريب عنهم،
دا هو الشعب اللي دمر أورشليم واخدهم للسبي.
عشان كده كلام ربنا ليهم كان صادم: "اطلبوا سلام المدينة."
ليه؟
لأن ربنا ماكانش بيطلب منهم يحبوا بابل أو يوافقوا على الظلم اللي حصل لهم.
لكن كان بيعلمهم الحكمة.. يعني بدل ما يعيشوا في غضب مستمر أو تمرد مش هتغير الواقع، قال لهم:
ابنوا بيوت.
ازرعوا.
اتجوزوا.
عيشوا.
واطلبوا سلام المكان اللي أنتم فيه.
لأن استقرار المدينة هيخليكم تقدروا تعيشوا وتخدموا وتنتظروا مواعيد ربنا.
الآية بتتكلم ازاي نقدر نعيش بحكمة وقت الشدة...
وإزاي المؤمن يقدر يكون نور حتى في مكان مش شبهه.
ويطلب الخير للمكان اللي موجود فيه، مش لأن كل حاجة فيه صح
، لكن لأن وجود السلام بيفتح باب نقدر نشهد بيه عن الله .. 💜