علشان تدخل الملكوت محتاج تفضى ظهرك من اللي تقيل على روحك

[walaa farouk]

كنت دايمًا متلغبط في الآية دي..
“مرور جمل من ثقب إبرة أيسر من أن يدخل غني ملكوت الله”.
. كنت حاسس إنها صعبة..
فيها نوع من القسوة كأن ربنا بيقفل الباب في وش الغني!
بس بعد وقت فهمت..
إن ربنا عمره ما بيقفل باب، هو بس بيفتح عيوننا.

“ثقب الإبرة” كان بوابة صغيرة في أورشليم،
اسمها كده فعلاً..
عشان الجمل يدخل منها كان لازم ينزل على ركبته
ويتخلّى عن كل اللي شايله فوقه.. كل حمولة ثقيلة على ضهره.
وساعتها فهمت.. مش القصة قصة فلوس، دي قصة قلوب مثقلة.

ربنا كان بيقولنا:
علشان تدخل الملكوت،
محتاج تفضى ظهرك من اللي تقيل على روحك..
من التعلقات.. من الكِبر.. من كل اللي شايف نفسك بيه.
انزل على ركبك، تخلّى،
وساعتها هتعرف تمشي جوّا الباب الصغير اللي اسمه “النعمة”.

الملكوت مش صعب
.. الصعب إننا نفضل شايلين اللي يمنعنا ندخله.