هرتاح امتى

[walaa farouk]

كتير قولنا لنفسنا:
"أنا لما هخلّص الحاجة دي هرتاح وأهدى،
لما أخلّص امتحانات الدنيا هتروق معايا."
"لما أشتغل حياتي هتبقى سهلة، لما أتجوز الدنيا كلها
هتضحكلي وهبقى سعيد طول الوقت."

والحقيقة إننا بنخلّص امتحانات، بنشتغل، وبنتجوز،
لكن مش دايمًا النتيجة بتكون إننا ارتحنا، برضه فيه ضغوط.

عارف ليه؟ علشان كل مرحلة جديدة ليها تحديات خاصة بيها.
التحديات دي لو أنا مش عارف هتعامل معاها إزاي،
هتضغطني وهتحسسني بتقل أكبر، مش راحة. ببساطة،
مفيش مرحلة مفيهاش ضغوط، مفيش مرحلة كلها ورد بس،
لكن فيه لحظات متعبة، فيه فشل، فيه صراعات،
وفيه حاجات مش مريحة لينا.

كل اللي سبقونا ونجحوا ماكانتش حياتهم مفيهاش ضغوط،
لكن اللي ميّزهم وخلاهم ينجحوا إنهم عرفوا إزاي يتعاملوا صح
مع ضغوطهم. إزاي الضغوط دي ما تكسرهمش؟
علشان كان عندهم المتانة النفسية اللي خلتهم يتوجّعوا
ويتألموا وينضغط عليهم أوي، بس قدروا يتحملوا
ويقوموا من جديد. عشان كده، اشتغل على متانتك النفسية
وخليك جاهز لكل مرحلة جديدة بتدخلها.