|
 |
 |
 |
|
رقم المشاركة : ( 1 )
02 - 10 - 2025, 01:30 PM
|
|||||||||||
|
|||||||||||
|
انت مش هاتدفع العشور ..يوم 20 مايو اصعب يوم فى حياتى ... انا شريف عمرى 53 سنه سويت معاشى مخصوص عشان اخد المكافأه مع الفلوس اللى محوشها والفلوس اللى استلفتها وأشترى حتة أرض معروضه عليا للبيع وبصراحه كانت فرصه لو ضاعت منى مش هاتتعوض .. لكن للأسف مافيش حاجه بتمشى زى ماحنا عاوزين ... مبلغ المكافأه مع الفلوس اللى معايا كان بالظبط هو تمن الأرض ، جات مراتى يوم 15 مايو ، وده اليوم اللى قبضت فيه المكافأه قالتلى ... - انت مش هاتدفع العشور ؟ قولتلها منا لو دفعت العشور مش هاعرف اجيب الأرض ومافيش حد هايرضى يسلفنى تانى ، يلا ربنا يسامحنا بقى .. جيت فى اليوم المشئوم اللى رايح اشترى فيه الأرض ،كانت الساعه 2 بعد الضهر وانا فى طريقى ، قامت خناقه شديده عند منطقة رمسيس، سدت الشارع ماحدش عرف يعدى ، عربيات تتكسر وملتوف وحجاره ، وناس بتقع كل شويه من الضرب ودمها سايح ، قام ساعتها شاب قلع التيشرت وغطا به وشه ، وشال انبوبه ، انا ساعتها كنت فاكره انه هايرميها على حد ، لكنه حطها فى نص الشارع وفتحها وجرى ، فى ثوانى بالظبط ، لاقيت الناس كلها بتجرى ، وانا بحكم سنى مش عارف أجرى وسط الزحمه دى كلها ومعايا الفلوس ، ماكنتش خايف على نفسى قد ماخايف على الفلوس ... من شدة جرى الناس ودفعهم لبعض ، وقعت فى الأرض وانا حاضن الفلوس بقوه شديده ، لغايه ما فجأه لاقيت الناس اتكاترت فوق منى وهم بيجروا ، فضلت ازعق ، ياناس هاموت ، حد يلحقنى ، واللى يدوس على وشى ، وكتفى ، وبطنى ، ماحدش سامعنى خالص ، فضلت اصرخ من الوجع وضيق النفس لغاية مافقدت الوعى تماماً ... مافوقتش غير وانا مركون على جنب فى الشارع وغرقان مايه والدم نازل من على وشى والناس بتفوّق فيا ... دورت على شنطة الفلوس مالقتش منها غير الحزام بتاعها مقطوع وماسكه فى إيدى ... ساعتها حسيت بالصدمه اللى بجد ، شقى عمرى وتعبى وحلمى راحو منى فى لحظه روحى صغرت جدا وحسيت انى بموت بالبطئ .. جسمى سايب اعصابى مشلوله ، عيونى ثابته مابتتحركش ، صراع شديد جوا عقلى مابين إستيعاب الكارثه والحزن على كل لحظه أمل ماتت منى ، الناس بتكلمنى مش حاسس بيهم ولا سامعهم ، قاعد مابنطقش بولا كلمه ... فضلت على الحاله دى لغاية ماجت الإسعاف ، وعملت فى المستشفى محضر بالفلوس المسروقه منّى ... دخلت فى حاله نفسيه شديده وإمتنعت عن الأكل تماماً لمدة يومين وكنت عايش بمحاليل الجلوكوز .. وفى يوم 25 مايو ، الساعه 11 الصبح ، اتصل بيا ظابط قسم الشرطه ، وقالى تعالى على المستشفى فوراً ... اول ماروحت هناك لاقيت شاب تقريبا سنه 35 سنه ، رفيع ، ووشه فيه علامات مطاوى كتيره ، عامل حادثه ورجله وايده مكسورين ، وكان بيبصلى جامد كأنه يعرفنى ... الظابط وقف وقالى .. - هو ده اللى سرقك ؟ قولتله للأسف معرفش لانى كنت فاقد الوعى ، وثانياً لو معاه الفلوس يبقى هو اللى سرقنى ... رد الظابط وقال ... - الشخص ده مسجل خطر ، وكاميرات الشارع رصدت وجوده فى الخناقه اللى حصلت ساعة تواجدك فى الشارع ، لكن للأسف وسط الخناقه والزحمه ماقدرناش نوصل مين اللى سرقك .. لكن الشخص ده ليلة يوم سرقتك عمل حادثه بموتسكل صينى فى شارع جانبى لشارع الخناقه ، وكان معاه شنطه، بسؤاله عليها قال شنطتى .. لكن لحسن حظك انى كنت واقف ساعة الحادثه ولما شوفت الشنطه والفلوس اللى فيها وقارنتها بمواصفات شنطتك ، وشوفت الحزام بتاعها مقطوع ، تأكدت انها شنطتك .. كشفت على بطاقة الشاب ده لاقيته مسجل خطر .. إتنقل للمستشفى من ساعتها وهو فى غيبوبه تامه ، وإنهرده فاق .. مبروك �� بصراحه انا كنت واقف وكل كلمه كنت بسمعها وكأنها رصاصة امل للحياه كانت بتضرب فى قلبى تحينى من جديد .. ابتسمت جدا وقولتله .. - انا مش عارف اشكر حضرتك ازاى ؟ قالى .. - لا ماتشكرنيش انا ، اشكر الشخص الامين اللى بلغ عن الحادث واحتفظ بالشنطه وسلمهالنا من غير ما تنقص جنيه ، وإعمل حسابك فى مكافأه 10% له عشان آمانته .. قولتله طبعا ده لو عاوز عمرى ادهوله .. حمدت ربنا ان الفلوس رجعت ، حتى لو نقص عشرها مش مشكله المهم انها رجعت أحسن من مفيش ، لكن جوايا زعل شديد انى مش هاقدر اشترى الأرض خصوص ان الفلوس نقصت بعد ما سلمت عشرها ماكفأه ، واصلا سعرها زاد خلال اليومين اللى عدو دول .. عدت الأيام وبالعافيه قادر أتعايش لغاية ما جه يوم 30 مايو اللى كان بمثابة قلبه لكل موازين حياتى ، وفيه فهمت حاجات كتير كانت غايبه عنى .. اليوم ده الساعه 12.35 الضهر ، لاقيت مراتى داخله عليا ووشها قالب ألوان بالجرنان وبتقولى ... - إلحق مش ده عنوان حتة الأرض اللى كنت عاوز تشتريها ؟ - اه مالها ؟ - صاحبها طلع نصّاب وباعها لعشرين واحد وهرب بالفلوس على بره ... مشاعر كتير حسيت بيها ، لكن اكتر شعور كان واخد حقه اكتر ، هو شعور الأسف .. لأنى بخلت على ربنا فى دفع العشور .. لو كنت دفعت العشور ،ورضيت بحكم ربنا وإرادته فى شرائى للأرض ، ماكنش حصل ليا ده كله ... لكن بردو ربنا مارضاش ليا بالخساره .. شكرا يارب . "آية (ملا 3: 10): هَاتُوا جَمِيعَ الْعُشُورِ إِلَى الْخَزْنَةِ لِيَكُونَ فِي بَيْتِي طَعَامٌ، وَجَرِّبُونِي بِهذَا، قَالَ رَبُّ الْجُنُودِ، إِنْ كُنْتُ لاَ أَفْتَحُ لَكُمْ كُوَى السَّمَاوَاتِ، وَأَفِيضُ عَلَيْكُمْ بَرَكَةً حَتَّى لاَ تُوسَعَ. " 
|
 |
| أدوات الموضوع | |
| انواع عرض الموضوع | |
|
| قد تكون مهتم بالمواضيع التالية ايضاً |
| الموضوع |
| كل حاجة هاتدفع تمنها بس مش كل حاجه في الحياه ليها تمن |
| ما هي العصور المظلمة |
| العشور |
| العشور |
| العشور والتقديمات |
العرض العادي
