فستان أطفال ..

[Rena Jesus]

_لو سمحتي عايزة فساتين أطفال عمر 6 شهور
=اتفضلي يافندم، الناحية دي كلها عمر 6 شهور

-طيب تمام.......... بكام الفستان دا لو سمحتي؟
=السعر مكتوب عليه يافندم

-لا مش مكتوب حاجة، في أرقام كتير مكتوبة مافيش منهم رقم ينفع يبقى سعر
=ازاي يافندم، مكتوب أهو، سوتوميت جنيه

-سو إيه؟!!!!
=سوتوميت جنيه يافندم

-سوتوميت جنيه ليه ياحرامية يا نصابين، دا الفستان مايكلفش نص متر قماش
=مايصحش الغلط دا يافندم، حضرتك عارفة فساتين الأطفال بتحتاج شغل كتير، بعدين المصنع اللي بينزل السعر دا، إحنا كسبانين عشرة جنيه بس

-عشرة جنيه يا حرامية، أهو نفس الفستان أهو و ب 500 جنيه
=يافندم قلتلك مايصحش الغلط دا، دا فستان غير دا

-لا دا نفس الفستان بالظبط
=لا مش بالظبط، دا لون ودا لون تاني

-وهو اللون يفرق في السعر ليه بقى إن شاء الله ؟!
=حضرتك كل لون له طول موجي معين غير اللون التاني، يبقوا ازاي نفس السعر !

-استني كده، مش بقولك نصابين، أهو نفس الفستان أهو ونفس اللون و ب 300 جنيه !!
=لا يافندم ،دا مقاس تاني، دا مقاس 3 شهور، وحضرتك عارفة إن كل مالمقاس يكبر بيتكلف قماش أكتر

-قماش أكتر إيه، انتي شايفاني مختوم على قفايا ! يعني عايزة تفهميني إن السنتي اللي المفعوصة دي بتكبره كل شهر بيقف ب 100 جنيه !!
=أيوة طبعاً يافندم، هو مش الشهر دا كلفك فوق ال 300 جنيه بامبرز؟! يبقى مستخسرة 100 جنيه زيادة في الفستان؟!!

-طيب خلاص خلاص، هاتيلي مقاس 3 شهور
=بس دا هايبقى صغير على بنت حضرتك يافندم !!

-مالكيش دعوة ،الجو حر
=يعني إيه؟!
-هالبسهولها وأسيب السوستة مفتوحة ..